މާފުށިން ގެއްލުނު ކުއްޖާ ފެނިއްޖެ ކަމަށާ އޭނާ މިހާރު އޮތީ ސިއްހީ މަރުކަޒަށް ގެންގޮސްފައި ކަމަށް ފުލުހުން ބުނެފިއެވެ. އޭނާ ސިއްހީ މަރުކަޒަށް ގެންދިޔައީ ކޮން އިރަކު ކަމެއް ފުލުހުން ހާމައެއް ނުކުރެއެވެ.
ކ. މާފުށިން މިއަދު ގެއްލިގެން ހޯދަމުން ދިޔައީ 14 އަހަރުގެ އަންހެން ކުއްޖާ ސިއްހީ މަރުކަޒުގައި އޮތް ކަމަށް ފުލުހުން ބުނީ އެ ރަށު ކައުންސިލާ ހަވާލާދީއެވެ.
"ދަ ޕްރެސް" އަށް މައުލޫމާތު ދެމުން އެ ރަށު ސިއްހީ މަރުކަޒުން ބުނީ އެކުއްޖާއަށް އެއްވެސް ގެންލުމެއް ލިބިފައި ނުވާ ކަމަށާއި އޭނާގެ ހާލު ރަނގަޅު ކަމަށެވެ.
އެ ރަށު މީހަކު "ދަ ޕްރެސް" އަށް މައުލޫމާތު ދެމުން ބުނީ، އެ އަންހެންކުއްޖާ ފެނިފައި ވަނީ އެ ރަށުގައި ހުންނަ ގަރާޖެއްގެ ތެރެއިން ކަމަށެވެ. އަދި އެ އަންހެން ކުއްޖާ ފެނުނު އިރު އޭނާ އޮތީ ހޭނެތިފައި ކަމަށާއި އޭނާ ސިއްހީ މަރުކަޒަށް ގެންދިއައީ އެހެންވެގެން ކަމަށް އޭނާ ބުނެއެވެ.
ކ. މާފުށިން 14 އަހަރުގެ އަންހެން ކުއްޖެއް ގެއިން ނުކުމެގެން ދިޔަ ގޮތަށް ހަބަރެއް ނުވެގެން ފުލުހުންނަށް ހުށަހެޅީ މިއަދު ހަވީރު 5:43 ހާއިރެވެ. އެ އަންހެން ކުއްޖާ ހޯދުމުގެ މަސައްކަތް މާފުށި ޕޮލިސްގައި މަސައްކަތް ކުރާ ފުލުހުންނާއި އެ ރަށު ކައުންސިލާއި، ރައްޔިތުން ގުޅިގެން ކޮށްފައި ވެއެވެ.
