އިޓަލީވިލާތަށް އުފަން ކުރެހުންތެރިޔާ މާސެލާ ބަރެންގީއަކީ މި ދާއިރާގައި އާދަޔާ ހިލާފު ފަންނުވެރިއެކެވެ. އޭނާގެ ފަންނުވެރިކަން އެހެން ކުރެހުންތެރިންނާ ހިލާފުވަނީ، އޭނާގެ ކުރެހުންތަކުގައިވި ހަގީގަތާ އެއްގޮތް ސިފަތަކުގެ ސަބަބުން އެކަންޏެއް ނޫނެވެ. ތްރީޑީ ކުރެހުންތައް ކުރަހާ އެހެން ކުރެހުންތެރިންނާ ހިލާފަށް، މާސެލޯގެ އެންމެ ހާއްސަ ސިފައަކީ، ވީހާވެސް އާދައިގެ އާލާތްތަކެއް ބޭނުންކޮށްގެން ހަގީގަތާ އެއްގޮތް ކުރެހުންތައް ކުރަހަމުންދާ ކަމެވެ.
އެންމެ ކުޑަ ދުވަހުއްސުރެ ފެށިގެންވެސް މާސެލޯއަކީ ވީހާވެސް ހަގީގަތާ އެއްގޮތަށް ކުރެހުންތައް ކުރަހަން ހާއްސަ ސަމާލުކަމެއް ދިން ފަންނުވެރިއެކެވެ. އުމުރުން އެންމެ 18 މަހުގައި މާސެލޯ ކުރަހަމުންދިޔަ މަތިންދާ ބޯޓުތަކަކީ ވައިގެ ތެރޭގައި ދައުރުވާން މަތިންދާބޯޓުތަކުގައި ހަރުކޮށްފައިވާ ޕްރޮޕެލާތަކުގެ ކުދިކުދި ތަފްސީލުތައް ތްރީޑީކޮށް ފެންނަ ބޯޓުތަކެކެވެ. ބޮޑުވަމުން ދިޔަ ވަރަކަށް މާސެލޯގެ ހުނަވެރިކަންވެސް ދިޔައީ އިތުރަށް ފައްކާވަމުންނެވެ. ކަންމިހެން އޮތް ނަމަވެސް، އާމްދަނީ ހޯދުމަށް ކުރާ މަސައްކަތެއްގެ ގޮތުގައި މިކަން ކުރުންވީ މާސެލޯއަށް ކުރިމަތިލާންޖެހުނު އެންމެ ބޮޑު ގޮންޖެހުމަށެވެ.
އާޓް ސްކޫލްގައި މާސެލޯ ތައުލީމު ހާސިލުކުރަމުންދިޔަ ދުވަސްވަރަކީ، ގްރެފިކް ޑިޒައިންގެ ސިނާއަތަކީ ނުރައްކަލެއްގެ ގޮތުގައި ދެކެމުން އައި ދުވަސްވަރެކެވެ. އެހެންކަމުން، އޭނާގެ ހިތު ލޯބިޖެހިފައި އޮތް ހަގީގަތާ އެއްގޮތް ކުރެހުންތަކުގެ މަސައްކަތް މަޑުޖައްސާލުމަށްފަހު އޭނާ ކުރިއަށްދާން ހިފާލީ އާކިޓެކްޗާގެ ރޮނގުންނެވެ. ނަމަވެސް، އެއީ އޭނާއަށް އެންމެ ރަނގަޅު ކެރިއަރަކަށް ނުވިއެވެ. ބޮޑެތި ހިތާމަތަކަކާ ކުރިމަތިލާންޖެހި، ފިހާރައެއްގައި އެހީތެރިއެއްގެ ގޮތުގައި މަސައްކަތް ކުރަން ފެށިއެވެ.
މާ ގިނަ ދުވަސްތަކެއް ނުވެ އޭނާއަކީ ވަޒީފާއެއް ނެތި އުޅެންޖެހުނު ޒުވާނަކަށް ވިއެވެ. މިހާ ހިސާބުން މާސެލޯ އަނެއްކާވެސް ބެލީ އޭނާ އެންމެ ލޯބިވި މަސައްކަތާ ދިމާލަށް މިސްރާބު ޖެހުމަށެވެ. މިފަހަރު، ދުނިޔެ ފަތަހަ ކުރަމުންދާ އިންޓަނެޓްގެ ބޭނުން ފިސާރި ރަނގަޅަށް ހިފިއެވެ. ފުރަތަމަވެސް ހުޅުވީ ޔޫޓިއުބް އެކައުންޓް އެކެވެ. ހަގީގަތާ ވީހާވެސް އެއްގޮތަށް އެންމެ ފެންވަރު ރަނގަޅު ކުރެހުންތައް ކުރަހާނެ ގޮތް ދަސްކޮށްދޭ އިރުޝާދު-ވީޑިއޯތައް އެ އެކައުންޓަށް ޕޯސްޓްކުރަމުންދިޔައެވެ. މިމަސައްކަތް ފަށައިގަތްއިރު އޭނާގެ ޗެނަލް ފޮލޯކުރަމުންދިޔައީ އެންމެ 100000 އެއްހާ މީހުންނެއްކަމަކު، މިއަދު އޭނާގެ ޗެނަލަށް ސަބްސްކްރައިބް ކޮށްފައިވާ މީހުންގެ އަދަދު 1.7 މިލިއަނަށް އަރައެވެ. މިއަދު އޭނާއަކީ ޔޫޓިއުބަށް ހާއްސަ ކުރެހުންތެރިންގެ ލިސްޓުގެ އެންމެ ކުރިން ޖާގަ ހޯދާ ފަންނުވެރިއެކެވެ.
މާސެލޯގެ ޔޫޓިއުބް ޗެނަލުން ފެންނަ ކުރެހުންތަކުގެ ތެރެއިން ކޮންމެ ޕްރޮޖެކްޓްއަކަށްވެސް އޭނާ ވަގުތެއް ދެއެވެ. ކުރެހުންތަކުގެ ފުރިހަމަކަމާ އެއްވަރުގެ އެހެން ކަމެއްވެސް ފާހަގަކުރަންޖެހެއެވެ. އެއީ، އޭނާގެ އެއްވެސް ކުރެހުމަކީ އަގަކަށް ވިއްކާ ކުރެހުމަކަށް ނުވާ ކަމެވެ. އަދާ ޖެހުނުއިރުވެސް މާސެލޯގެ އެންމެ ކުރެހުމެއްވެސް އޭނާ ވިއްކާފައެއް ނުވެއެވެ. އެއީވެސް އެ ކުރެހުންތަކަށް އޭނާގެ ހިތުގައި ދެވިފައި އޮންނަ ހާއްސަ މަގާމެއްގެ ސަބަބުން، ވަގުތު ކޮޅަކަށް ނަމަވެސް އޭނާގެ ލޯމަތިން ކުރެހުންތައް ގެއްލެން ނޭދޭތީ ކަމަށް މާސެލޯ ބުނެއެވެ.
