ރ. އަލިފުށިން ފުރައިގެން މާލެއަށް ދަތުރުކުރަމުން ދިޔަ ބޯޓެއްގައި އިން މާބަނޑު އަންހެނަކު ހާލު ދެރަވުމުން ސީ އެމްބިއުލަންސްގައި އެމީހާ މާލެ ގެނެސްފިއެވެ.
އެމްއެންޑީއެފުން ބުނީ، އަލިފުށިން ފުރައިގެން މާލެއަށް ދަތުރުކުރަމުން ދިޔަ ބޯޓުގައި އިން މާބަނޑު އަންހެނެއް ކުއްލި ގޮތަކަށް ހާލު ދެރަވުމުގެ ސަބަބުން ސިއްހީ އަވަސް ފަރުވާއަށް އެދި ރިޕޯޓްކޮށްފައި ވަނީ މިއަދު 3:50 ހާއިރު ކަމަށެވެ. އެމްއެންޑީއެފްގެ މާލެ އޭރިއާގެ އެހީތެރިކަމާއެކު އެ އަންހެންމީހާ ސީ އެންބިއުލާންސަށް ނަގާފައިވަނީ ކ. ކާށިދޫގެ ހުޅަނގުން 12 މޭލު ބޭރުގައި އެ ބޯޓު އޮއްވާ ކަމަށް އެމްއެންޑީއެފުން ބުނެއެވެ.
އެ އަންހެންމީހާ ސީ އެންބިއުލަންސްގައި މާލެ ގެނެސްފައިވަނީ މިރޭ 7:13 ހާއިރު ކަމަށް އެމްއެންޑީއެފުން މައުލޫމާތު ދެއެވެ.
ރ. އަލިފުށިން ދަތުރުކުރި "ފޯ ސީ" ނަމަކަށް ކިޔާ ދޯނީގައި ދަތުރުކުރި މާބަނޑު އަންހެންމީހާއަކީ އުމުރުން 29 އަހަރުގެ އަންހެނެކެވެ.
މިރޭ އެންއެންޑީއެފުން ވަނީ، ހދ. ކޭލަކުނުން ފުރައިގެން ދިޔަ ދޯންޏަކަށް ވެސް އެހީތެރިކަން ފޯރުކޮށްދީފައެވެ. ކޭލަކުނުން 19 މީހުންނާއެކު ދަތުރުކުރަމުން ދިޔަ ދޯންޏެއް ގަދަ ކޮޅިގަނޑެއްގައި ޖެހި ދަތުރު ނުކުރެވިފައިވާ ކަމުގެ ރިޕޯޓް އެމްއެންޑީފަށް ކޮށްފައިވަނީ މިރޭ 7:27 ހާއިރެވެ. އެމްއެންޑީއެފްގެ ނޮދަން އޭރިއާގެ ކޯސްޓްގާޑުގެ އެހީތެރިކަމާއެކު ދޯނީގައި ތިބި މީހުން ހދ. ކުރިންބަށް ވަނީ ގެންގޮސް ދީފައެވެ.
