ހދ. ކޭލަކުނުން 19 މީހުންނާއެކު ދަތުރު ކުރަމުންދިޔަ ދޯންޏަކަށް އެމްއެންޑީއެފުން އެހީތެރިކަން ފޯރުކޮށްދީފިއެވެ.
އެމްއެންޑީއެފުން ބުނީ، ކޭލަކުނުން 19 މީހުންނާއެކު ދަތުރުކުރަމުން ދިޔަ ދޯންޏެއް ގަދަ ކޮޅިގަނޑެއްގައި ޖެހި ދަތުރު ނުކުރެވިފައިވާ ކަމުގެ ރިޕޯޓް މިރޭ 7:27 ހާއިރު ލިވބިފައިވާ ކަމަށެވެ. އެމްއެންޑީއެފްގެ ނޮދަން އޭރިއާގެ ކޯސްޓްގާޑުންގެ އެހީތެރިކަމާއެކު ދޯނީގައި ތިބި މީހުން ހދ. ކުރިނބިއަށް ގެންގޮސްދީފައިވާ ކަމަށެވެ.
މިއަދު ހަވީރު މޫސުމާ ބެހޭއިދާރާއިން ވަނީ ރާއްޖޭގެ ބޮޑު ސަރަހައްދަކަށް މޫސުން ގޯޗްވާނެ ކަމަށް ބުނެ ވައިޓް އެލާޓް ނެރެފައެވެ. އެގޮތުން ހދ. އަތޮޅުން ފެށިގެން ގދ އަތޮޅާ ދެމެދަށް ގުގުރުމާއެކު ބޯކޮށް ވާރޭ ވެހޭނެ ކަމަށާއި، ވިލާގަނޑުގައި ގަޑިއަކު 40 މޭލަށް ވައި ގަދަވާނެކަމަށް ބުނެފައި ވެއެވެ.
މީގެ އިތުރުން އެ އިދާރާއިން މިރޭ 8 އިން ފެށިގެން ކުރިއަށް އޮތް 24 ގަޑިއިރު މޫސުން ލަފާކުރާ ގޮތުގައި ދެކުނުގެ އަތޮޅުތަކަށް އިރުދެކުނާއި ދެކުނުން ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި، އެހެން ހިސާބުތަކަށް އިރުއުތުރާއި އިރުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ބުނެފައި ވެއެވެ. ކަނޑުތައް އާދައިގެވަރަކަށް ގަދަވެފައި ވިލާގަނޑުގައި ގަދަވާނެ ކަމަށާއި ބޯކޮށް ވާރޭވެހޭނެކަމަށް ލަފާކުރެވޭތީ އާންމުކޮށް ހުރިހާ ފަރާތްތަކުން މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ.
