އިންޑިއާގެ ބާޒާރުތަކުގައި ރަނަށް އޮންނަ ޑިމާންޑް އިތުރުވެ، ރަނުގެ އަގުތައް އުފުލިއްޖެއެވެ.
މައުލޫމާތު ލިބޭ ގޮތުގައި އިންޑިއާގެ ރަނުގެ ބާޒާރުގައި ގަހަނާ ވިއްކާ ފަރާތްތަކުން ވަނީ ޕްރީމިއަމް ފީއެއް ނަގަން ފަށާފައެވެ. އެގޮތުން ރަސްމީ އަގުތަކަށް ވުރެ ކޮންމެ އައުންސަކުން އިތުރު 1.50 ޑޮލަރު، ޕްރީމިއަމް ފީއެއްގެ ގޮތުގައި ނަގަމުން އަންނަ ކަމަށް ޚަބަރު ލިބެއެވެ. އިންޑިއާގައި ރަނުގެ އަގު ކަނޑައަޅަނީ އިމްޕޯޓް ޓެކްސްއަށް ދައްކަން ޖެހޭ 12.5 ޕަސެންޓްއާއި ސޭލްސް ޓެކްސްއަށް ދައްކަންޖެހޭ 3 ޕަސެންޓްވެސް ހިމަނައިގެންނެވެ.
ކަންމިހެން އޮތްއޮތްއިރު އިންޑިއާއަށް ރަނުގެ އުފެއްދުންތައް ސަޕްލައި ކުރާ މިންވަރުވެސް ވަނީ އިންތިހާއަށް ދަށަށް ގޮސްފައެވެ.
އިންޑިއާގެ ބާޒާރުގައި ހުކުރު ދުވަހު ރަންވިއްކާފައިވަނީ 10 ގުރާމް، 37978 ރުޕީޒްއަށެވެ.
ބައިނަލްއަގުވާމީ ރަނުގެ ބާޒާރުގެ އަގުތަކަށް ބަލާއިރު އެންމެ ގިނަ އަދަދަކަށް ރަން ގަންނަ ޗައިނާގައި ރަން އައުންސެއްގެ ޕްރީމިއަމް ފީގެ އަގު އުޅެނީ 4-4.50 ޑޮލަރަށެވެ. ސިންގަޕޫރުގައި ރަން އައުންސެއްގެ ޕްރީމިއަމް ފީއެއްގެ ގޮތުގައި ނަގަނީ 0.50-0.60 ޑޮލަރާ ދެމެދު އަގެކެވެ.
