ޖުޑިޝަލް ސާވިސް ކޮމިޝަން (ޖޭއެސްސީ) އިން އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ އާއި ސުޕްރީމް ކޯޓުގެ ފަނޑިޔާރު އާދަމް މުހައްމަދު އަބްދުﷲ ސަސްޕެންޑް ކުރުމަށް ނިންމި ނިންމުން ބަލައިގަތުމަކީ ކުރައްވާފައިވާ ހުވައާ ހިލާފުން ކަމަށް އޭނާ ވިދާޅުވެއްޖެއެވެ.
ހުވައާ ހިލާފުވާ ކަމަށް ވިދާޅުވެ، ޖޭއެސްސީގެ ނިންމުން ބަލައިނުގަންނަން ނިންމަވާ، އުއްތަމަ ފަނޑިޔާރު ވަނީ ބަޔާނެއް ނެރުއްވާފައެވެ. އެ ބަޔާނުގައި، އޭނާ ވިދާޅުވީ، ފަނޑިޔާރު އާދަމް މުހައްމަދާއި އޭނާ ސަސްޕެންޑް ކުރުމަށް ނިންމާފައި ވަނީ ޣައިރުދޫސްތޫރީ އަދި ޣައިރުގާނޫނީ އިޖުރާއަތްތަކެއް ހިންގައިގެން ކަމަށެވެ.
އުއްތަމަ ފަނޑިޔާރު ވިދާޅުވީ، ސުޕްރީމް ކޯޓަކީ ޖޭއެސްސީގެ ދަށުން ހިނގަމުންދާ މުއައްސަސާއެއް ނޫން ކަމަށާއި، އެއީ އެ ކޮމިޝަނަށްވުރެ ދޫސްތޫރީ ގޮތުންނާއި ގާނޫނީ ގޮތުން ދިވެހި ދައުލަތުގައި ހުރިހާ ގޮތަކުން އިސްވެގެންވާ މުއައްސަސާއެއް ކަމަށެވެ. އަދި އުއްތަމަ ފަނޑިޔާރު އައްޔަނު ކުރުމާއި، އުއްތަމަ ފަނޑިޔާރުގެ މަސްއޫލިއްޔަތު އެހެން ފަނޑިޔާރަކާ ހަވާލު ކުރުމަކީ ޖޭއެސްސީއަށް ލިބިގެންވާ ބާރެއް ނޫން ކަމަށެވެ.
އުއްތަމަ ފަނޑިޔާރު ނެރުއްވި ބަޔާނުގައި ވިދާޅުވީ، ޖޭއެސްސީގެ ގާނޫނުން އެ ކޮމިޝަނަށް ލިބިފައިވާ ބާރުތަކަށް ބެލުމުން އޮޅުމެއްނެތި އެ ކޮމިޝަނަށް ފަނޑިޔާރެއްގެ މައްސަލައެއްގައި ގޮތުގައި ބެލޭނީ ސުލޫކީ މައްސަލައެއް ކަން ސާފުވާ ކަމަށެވެ. އަދި އެ ކޮމިޝަނަށް ރާއްޖޭގެ ސުޕްރީމް ކޯޓުގެ ވިޔަސް އަދި އެހެން ކޯޓެއްގައި ވިޔަސް ގަޟާއީ އެއްވެސް ނިންމުމެއް އެއްވެސް ސިފައެއްގައި އެއްވެސް ގޮތަކަށް އެއްވެސް މިންވަރަކަށް މުރާޖައާކޮށް ނުވަތަ ބަލައި އެ ނިންމުގެ ދުސްތޫރިއްޔަތު ނުވަތަ ޝަރްއިއްޔަތު ނުވަތަ ސައްހަކަން ނުވަތަ މެރިޓް ވަޒަން ކޮށް އެ ނިންމުން ނިންމި ފަނޑިޔާރުންނާ މެދު އެއްވެސް ކަހަލަ ފިޔަވަޅެއް އެޅުމުގެ އެއްވެސް ބާރެއް ލިބިފައެއް ނުވާ ކަމަށް އެ ބަޔާނުގައި ބުނެއެވެ.
އެ ބަޔާނުގައި ވިދާޅުވީ، ޖޭއެސްސީން ސުޕްރީމް ކޯޓުގެ ނިންމުންތަކަށް ޗެލެންޖުކޮށް، އެއިން ނިންމުމެއްގެ ސައްހަކަން ނުވަތަ ދޫސްތޫރިއްޔަތު ނުވަތަ ޝަރްއިއްޔަތު ކަނޑައަޅަން މަސައްކަތް ކުރުމަކީ ގާނޫނުއަސާސީގެ ސިޔާދަތަށާއި އަމުރަށް ބޯލެނބުމަށް ދައުލަތުގެ އެންމެހާ ފަރާތްތަކަށް ލާޒިމުކޮށްފައިވާ ބާރު ކަނޑުވާލުން ކަމަށެވެ. މީގެ އިތުރުން ސުޕްރީމް ކޯޓުގެ އަމުރުތަކަށް ގޮންޖަހައި، އެ އަމުރުތަކާ ހިލާފަށް އަމަލު ކުރަމުން ގެންދިއުމަކީ، އެކަމުގައި ބައިވެރިވާ ކޮމިޝަންގެ މެންބަރުން އެ ކޮމިޝަންގެ ދުސްތޫރީ އަދި ގާނޫނީ ވާޖިބުތަކަށް ހިޔާނާތްތެރިވެ، ގާނޫނު އަސާސީގެ ބާރު ކަނޑުވާލައި، ޖޭއެސްސީގެ ގާނޫނުގެ ދަށުން ކޮށްގެން ތިބި ހުވައާ ހިލާފުވުން ކަމަށް ވެސް އުއްތަމަ ފަނޑިޔާރު ވިދާޅުވިއެވެ.
