ފުރިހަމަ މުސާރަ ހިނގާ ގޮތަށް ހަފުތާ ބަންދަށް އިތުރު 1 ދުވަސް ދީގެން މަސައްކަތު 4 ދުވަހު އޮފީހަށް ނެރުމުން، މުވައްޒަފުންގެ މަސައްކަތްތެރިކަން އިތުރުވެ ވިޔަފާރި ރަނގަޅުވެފައިވާކަމަށް މައިކްރޮސޮފްޓް ޖަޕާނުން ބުނެފިއެވެ.
ތަޖުރިބާ މަރުހަލާއެއްގެ ގޮތުގައި މައިކްރޮސޮފްޓްގެ ޖަޕާނު ޔުނިޓުން ކުރިއަށް ގެންދިޔަ މި ދިރާސާގެ ނަތީޖާ ދައްކާ ގޮތުން، ހަފުތާއަކު އެންމެ ގިނަ ވެގެން 4 ދުވަހު މަސައްކަތް ކުރުވުމުން މުވައްޒަފުގެ މަސައްކަތްތެރިކަން އިތުރުވެ، ވިޔަފާރިއަށް 40 ޕަސެންޓް ކުރިއެރުމެއް ވަނީ ލިބިފައެވެ.
މި ދިރާސާ ކުރިއަށް ގެންގޮސްފައި ވަނީ މިއަހަރުގެ އޯގަސްޓް މަހުގެ ތެރޭގައެވެ. އެގޮތުން އޯގަސްޓް މަހުގެ ހުރިހާ ހުކުރު ދުވަހަކީ އެ ކުންފުނީގެ ފުލްޓައިމް މުވައްޒަފުންނަށް އޯފް ދުވަހެއް ކަމުގައި ހަމަޖެއްސިއެވެ. އަދި މަސައްކަތު ނުކުންނަ ދުވަހެކޭ އެއްވަރަށް މުސާރަވެސް ދިނެވެ.
ހަފުތާ ބަންދަށް އިތުރު އެއް ދުވަސް ދިނުމުގެ އިތުރުންވެސް އެހެން ބަދަލުތަކެއް މައިކްރޮސޮފްޓް ޖަޕާނުން ތަންފީޒު ކުރިއެވެ. އެގޮތުން އެއްވެސް ބައްދަލުވުމެއް 30 މިނެޓަށްވުރެ އިތުރަށް ނުގެންދެވޭ ގޮތަށް ހަމަޖެއްސުމާ، އެއް މާހައުލެއްގެ ތެރެއިން ބައްދަލުވެގެން މަޝްވަރާތައް ކުރުމުގެ ބަދަލުގައި އޮންލައިން ޕްލެޓްފޯމުތަކުގައި ބައްދަލުވުންތައް ބޭއްވުން ފަދަ ބަދަލުތައް ވަނީ ތަންފީޒުކޮށްފައެވެ.
އާންމު އުސޫލުން ބަލާއިރު ޖަޕާނަކީ މަސައްކަތުގައި ހޭދަ ކުރާ ވަގުތު އެންމެ ދިގު އެއް ގައުމެވެ.
