އޮސްޓްރޭލިއާގެ އެންމެ ހަލަބޮލި ސިޓީތަކުގެ ތެރޭގައި ހިމެނޭ ސިޑްނީގެ ވައިގެ ނުސާފުކަން މިހާރު ހުރީ އިންޑޮނޭޝިއާގެ ވެރިރަށް ޖަކާޓާ ފަދަ ސިޓީތަކަށްވުރެވެސް ބޮޑަށް ތަޣައްޔަރުވެފައި ކަމުގެ އިންޒާރު، އޮސްޓްރޭލިއާގެ ކަމާބެހޭ ފަރާތްތަކުން ދީފިއެވެ.
ސިޑްނީގައި ވިހަ ދުން ބޯވެފައިވަނީ ކައިރި ރަށްފުށު ހިސާބުތަކުގެ އަވަށްގަނޑުތަކުގައި ހެދިފައިވާ ގަސްތަކުގައި ރޯވެފައިވާތީ ކަމަށް މައުލޫމާތު ލިބެއެވެ. އަލިފާންގަނޑު ކޮންޓްރޯލް ނުކުރެވި، ވިހަ ދުން ފެތުރެމުންދިއުމާއެކު، ކަމާ ބެހޭ ފަރާތްތަކުންވަނީ ނޭވާލާ ނިޒާމުގެ ބަލިތައް ހުންނަ މީހުން ބޭރު ތެރެއަށް ނިކުމެ ނުއުޅުމަށް އިލްތިމާސްކޮށްފައެވެ.
ރަށްފުށު ހިސާބުގައި ރޯވެފައިވާ އަލިފާންގަނޑުތަކުގެ ތެރޭގައި ހޮނު އެޅުމުގެ ސަބަބުން ރޯވި އަލިފާންގަނޑެއްވެސް ހިމެނޭ ކަމަށް ޚަބަރު ލިބެއެވެ.
ދުންބޯވެފައިވަނިކޮށް ގަދަޔަށް ވައި ޖެހުމުގެ ސަބަބުން އޮޕޭރާ ހައުސްއާއި ހާބާ ބްރިޖު ފަދަ ފަތުރުވެރިންގެ މެދުގައި މަގުބޫލު ބިނާތައް ހުންނަ ހިސާބުތަކުގެ ވައިގައިވެސް "ރަހަ" ލާކަމަށް މައުލޫމާތު ލިބެއެވެ.
ލަފާކުރެވޭ ގޮތުގައި ކުރިއަށް އޮތް ދުވަސްތަކުގައި ސިޑްނީއަށް ދުމުގެ އަސަރު ކުރާނެއެވެ.
