ލާމަރުކަޒީ ގާނޫނުގެ 116 މާއްދާއާ ހިލާފަށް މާލެ ސިޓީ ކައުންސިލުން ޖަލްސާއެއް ބޭއްވި މައްސަލައެއް މަޖިލީހަށް ހުށަހަޅައިފިއެވެ.
މާލެ ސިޓީ ކައުންސިލްގެ މެންބަރު މުހައްމަދު ފަޒީން "ދަ ޕްރެސް" އަށް މައުލޫމާތު ދެއްވަމުން ވިދާޅުވީ މިމަހުގެ 24 ވަނަ ދުވަހުގެ މާލެ ސިޓީން ކުއްލި ޖަލްސާއެއް ބާއްވާފައި ވަނީ ލާމަރުކަޒީ ގާނޫނާ ހިލާފަށް ކަމަށާއި އެ މައްސަލަ ބައްލަވައިދެއްވުމަށް ރައީސް ނަޝީދަށް ހުށަހަޅުއްވާފައި ވާ ކަމަށެވެ.
ފަޒީން ފޮނުއްވި ސިޓީގައި ވަނީ މިމަހުގެ 23 ވަނަ ދުވަހު ތާވަލް ކޮށް 24 ވަނަ ދުވަހުގެ މެންދުރު 1:00 ގައި ބޭއްވުމަށް ހަމަޖެއްސި މާލޭ ސިޓީ ކައުންސިލްގެ 21 ވަނަ ކުއްލި ޖަލްސާ 1:15 ވީ އިރުވެސް ކޯރަމް ހަމަ ނުވުމުގެ ސަބަބުން ކެންސަލް ކޮށްފައި ވާކަމަށެވެ. އެ ޖަލްސާއަށް ވަޑައިގަތީ މޭޔަރު ޝިފާ މުހައްމަދާއި، ޑެޕިޔުޓީ މޭޔަރު ޝަމާހު ޝަރީފާއި، ކައުންސިލަރު ޝާހީން މަހުމޫދުގެ އިތުރުން ކައުންސިލަރު ހަމްނާ ވަހީދެވެ.
އެ ޖަލްސާ ކެންސަލް ވުމުން 22 ވަނަ ޖަލްސާ ބޭއްވޭނީ ކައުންސިލް މެންބަރުންނަށް އެންގުމަށް ފަހު ކަގައި ވިޔަސް ފަސް މެންބަރުންނަށް އެންގުމަކާއިނުލާ ވަކިން ތިން މެންބަރުންނަށް ގުޅައިގެން 21 ވަނަ ކުއްލި ޖަލްސާގެ ނަމުގައި ޖަލްސާއެއް ބާއްވާފައި ވާކަމަށް ފަޒީންގެ ސިޓީގައި ވެއެވެ. އެ ޖަލްސާ ބާއްވާފައި ވަނީ ހަމަ އެދުވަހުގެ 2:00 ގައެވެ.
ދެވެނަ ޖަލްސާއެއް ބާއްވާކަން އަންގާފައި ނުވާ ކައުންސިލަރުންގެ ތެރޭގައި ފަޒީންގެ އިތުރުން ހަތަރު ކައުންސިލަރުން ފަޒީން ލިސްޓު ކުރައްވާފައިވެއެވެ. އެއީ އަހުމަދު ޖަލީރާއި، އަހުމަދު ނިޔާޒާއި، ހުސައިން ޝަރީފާއި އަޒްރާ މޫސާއެވެ.
ފަޒީން ވިދާޅުވީީ މިއީ ލާމަރުކަޒީ ގާނޫނުގެ 116 ވަނަ މާއްދާ އާއި ހިލާފަށް ބާއްވާފައިވާ ބައްދަލުވުމެއް ކަމަށް ވާތީ އެ ޖަލްސާގައި ނިންމި ނިންމުން ތަކުގެ ސައްހަ ކަމާއިމެދު ސުވާލު އުފެދޭ ކަމަށެވެ.
ލާމަރުކަޒީ ގާނޫނުގެ 116 ވަނަ މާއްދާގައި ވަނީ އަންނަނިވި ގޮތަށެވެ.
116 ވަނަ މާއްދާ - ކައުންސިލްގެ ކުއްލި ބައްދަލުވުންކައުންސިލްގެ ކުއްލި ޖަލްސާއެއް ބޭއްވޭނީ ޖަލްސާ ބާއްވަން ބޭނުންވާ ސަބަބާއި ތާރީހު ލިޔުމުން ހުށަހެޅުމަށްފަހު ތިރީގައިވާ ގޮތުގެމަތިންނެވެ.
(ހ) ކައުންސިލްގެ ކުއްލި ޖަލްސާއެއް ބާއްވަން ކައުންސިލްގެ މެންބަރުންގެ ތެރެއިން މަދުވެގެން ތިންބައިކުޅަ އެއްބައި މެންބަރުން އެދިއްޖެ ހިނދެއްގައި؛ ނުވަތަ
(ށ) ކައުންސިލްގެ ކުއްލި ޖަލްސާއެއް ބާއްވަން ލޯކަލް ގަވަރމަންޓް އޮތޯރިޓީން އެދިއްޖެ ހިނދެއްގައި؛ ނުވަތަ
(ނ) އެކަށީގެންވާ ސަބަބަކާހުރެ ކައުންސިލްގެ ރައީސަށް މިފަދަ ޖަލްސާއެއް ބާއްވަން ފެނިއްޖެ ހިނދެއްގައި.
