ކުރު މުއްދަތެއްގެ ތެރޭގައި ސްޓްރެސް ވާންޖެހޭ (މިސާލަމަށް ވަޒީފާ ގެއްލުން، ކައިވެނި ރޫޅުން) ގިނަ ހާލަތްތަކަކާ ވިދިވިދިގެން ކުރިމަތިލާންޖެހުމުގެ ސަބަބުން ބައެއް މީހުންނަށް ކުރިމަތިލާންޖެހޭ އެއް ނުތަނަވަސްކަމަކީ އެޕިސޯޑިކް އެކިއުޓް ސްޓްރެސްއޭ ކިއާ ނުތަނަވަސްކަމެކެވެ.
މިފަދަ ސްޓްރެސްއަކީ، އެ ސްޓްރެސްއެއް ކުރިމަތިވި ކުރުވި ނުތަނަވަސްކަން ފިލުވާލުމަށް ގިނަ ދުވަސްތަކެއް ނުވަތަ ހަފުތާތަކެއްވެސް ނަގާފާނެ ސްޓްރެސްއެކެވެ. މިފަދަ ހާލެއްގައި ހުންނަ މީހަކީ މާޔޫސްކަމުގެ ބައެއް އަލާމާތްތައްވެސް ފެނުން އެކަށީގެންވާ މީހެކެވެ. މިސާލަމަށް ނިދަން އުނދަގޫވުން، ކަންކަމަށް ސަމާލުކަން ދޭން އުނދަގޫވުން، ވާހަކަދައްކާ އުޅެން އުނދަގޫވުން، ހަޖަމް ކުރަން އުނދަގޫވުން، ތަނެއްގައި ހުއްޓަސް ސިކުނޑި "އެހެންތަނެއްގައި" ހުރުން، އާދަޔާ ހިލާފަށް ވަރުބަލިވުން އަދި ކުދިކުދި ކަންކަމާ ފަސޭހައިން އުނދަގޫވުން ކަހަލަ އިހުސާސްތައް ކުރެވޭ މިންވަރު އިތުރުވެދާނެއެވެ.
މިއީ އަދި ޑިޕްރެޝަން ނުވަތަ މާޔޫސް ކަމުގެ ތެރޭގައި ހުރި މީހެކޭ ނުބެނެވޭނެއެވެ. ނަމަވެސް، މިއީ ދިގުލައިދާންވެއްޖެނަމަ އެމީހެއްގެ ސިއްހަތަށް ގެއްލުން ހުރި ކަމެކެވެ. އެހެންކަމުން މި އަލާމާތްތަކަށް ފާރަވެރިވެ، އެކަންކަން ކުރިމަތި ކުރުވި ސަބަބުތައް ހޯދާ، އެކަންކަން ހައްލުކުރަން ވީ އެންމެ އަވަހަކަށް މަސައްކަތް ފަށަންވާނެއެވެ. އަދި އެވަރުންވެސް ލުޔެއް ނުލިބޭނަމަ ނަފްސާނީ ބަލީގެ ފަރުވާދޭ ތެރަޕިސްޓުންނާ ކައުންސިލަރުންގެ އެހީ ހޯދިދާނެއެވެ. މީގެ ކުރިން ނަފްސާނީ ބައްޔަށް ބޭސްކޮށް ފަރުވާ ހޯދާފައި ހުރި މީހަކަށްވެސް މިހާލަތު ކުރިމަތިވެދާނެއެވެ. މިފަދަ ފަރާތްތަކުން ވީ އެންމެ އަވަހަކަށް ސައިކޭޓްރިސްޓެއްގެ އެހީ ހޯދައިގެން، ފަރުވާ މެދުކަނޑާނުލާ ކުރިއަށް ގެންދަންވާނެއެވެ.
