އަޅާނުލައި އޮތުމަށް ފަހު 7 އަހަރު ފަހުން މަގުމަތީގެ ނިޝާންތަކުގައި ކުލަ ލާން ފަށައިފިއެވެ. މިކަން ފާހަގަ ކުރައްވައި މާލެ ސިޓީ ކައުންސިލުގެ މޭޔަރު ޝިފާ މުހައްމަދު ވިދާޅުވީ ލަހުން ފެށުނަސް އުފާކުރައްވާ ކަމަށެވެ.
ޝިފާ މިފަދައިން ވިދާޅުވީ، ވޭތުވެދިޔަ 11 މަސް ތެރޭގައި އޭނާ މޭޔަރު ކަމުގައި އިންނަވައިގެން، ޒިބްރާ ކްރޮސްތަކުގައި ރީނދޫ ކުލަ ލުން ނޫން ކަމެއް ނުވާ ކަމަށާއި، އޭނާ ފެއިލް ވެއްޖެ ކަމަށް ބުނެ، އާންމު މީހަކު ކުރި ޓްވީޓަކަށް ރައްދު ދެއްވަމުންނެވެ. އެގޮތުން، ޝިފާ ވަނީ މަގުމަތީގައި ހުރި ނިޝާންތަކަށް ވޭތުވެދިޔަ ހަތް އަހަރު ދުވަހު އިހުމާލުވެފައިވާ ކަމަށާއި، އެ ނިޝާންތަކުގައި ކުލަ ލުމަކީ ވެސް ލިބުނު ކުރިއެރުމެއް ކަމަށް ސިފަ ކުރައްވާ، އެކަމަށް އުފާ ކުރައްވާ ކަން ހާމަ ކުރައްވާފައެވެ.
ޝިފާ މިހެން ވިދާޅުވެފައި ވާއިރު، މާލޭގެ މަގުތަކުގައި ހުންނަ ނިޝާންތައް ވަނީ ކުލަ ނުލައި ގިނަ ދުވަސް ވުމުގެ ސަބަބުން ވަރަށް ބޮޑަށް ފަނޑުވެފައެވެ. އެގޮތުން، ޒިބްރާ ކްރޮސްތައް ވެސް ފާހަގަ ނުކުރެވޭ ވަރަށް ފަނޑުވުމާއި، އެއްކޮޅަށް ދުއްވާ ބައެއް މަގުތަކުގައި ފާހަގަ ކުރެވޭނެހެން ނިޝާން ނެތުމުގެ ސަބަބުން އެކްސިޑެންޓްތައް ގިނަވެގެންދެއެވެ.
މޭޔާ ޝިފާއަށް ކަމެއް ނުވާ ކަމަށް ބުނެ އާންމުންގެ ފާޑުކިއުން އޭނާއަށް އަމާޒުވެފައިވަނީ، ކުރިޔަށް އޮތް ދުވަސްތަކުގައި މާލޭގެ މަގުތަކަށް ބޮޑެތި ބަދަލުތަކެއް ގެންނާނެކަމަށާއި، މާލެ ހިތްފަސޭހަ ތަނަކަށް ހެދުމަށް ރައްޔިތުންގެ ހިޔާލާއި ޝަކުވާތަކަށް ބަލައި މާލޭގެ އިންޓީރިއާ ބަދަލުކުރުމުގެ މަސައްކަތް ކުރައްވަމުން ދާ ކަމަށް ވިދާޅުވެ އޭނާ މީޑިއާއަކަށް ދެއްވި އިންޓަވިއުއަކާއި ގުޅިގެންނެވެ.
އެގޮތުން ޝިފާ ވިދާޅުވީ، އެކި ފަރާތްތަކުގެ ލަފަޔާއި މަޝްވަރާގެ މައްޗަށް ހާއްސަ ޕްރޮޖެކްޓެއް އެކުލަވާލައި އެންމެ ފަހުން ބޭއްވުނު ވަޒީރުންގެ މަޖިލީހަށް ހުށަހަޅާފައިވާ ކަމަށެވެ. އަދި އެ ޕްރޮޖެކްޓް ނިމޭ އިރު، މަގުމަތީގެ ފެންބޮޑުވުން ފަދަ އާންމު މައްސަލަތަކަށް ހައްލު ލިބި، ނޭބާހުޑް ގޯޅިތަކާއި ބޮޑެތި މަގުތަކަށް ވެސް ވަރަށް ބޮޑެތި ބަދަލުތަކެއް ގެންނަވާނެ ކަމަށް ޝިފާ ވިދާޅުވިއެވެ.
