ރާވައިގެން ޖިނާއީ ބޮޑެތި ކުށްތައް ހިންގާ ކަމުގެ ކުށް ސާބިތުވެފައިވާ ނުވަތަ އެ ފަދަ ޖަރީމާތައް ހިންގާކަމަށް ތުހުމަތު ކުރެވޭ މީހުންގެ ތެރެއިން ފިލައިގެން އުޅޭ، "އެންމެ ހޯދަން ބޭނުންވެފައިވާ" އަންހެން ކުށްވެރިން ހޯދުމަށް ވިލާތުގެ އިއްތިހާދުގެ ޖިނާއީ ކުށްތަކާ ބެހޭ އޭޖެންސީ ޔޫރޯޕޮލްއިން އާދަޔާ ހިލާފު ކެމްޕޭނެއް ފަށައިފިއެވެ.
މިކަމަށް ހާއްސަކޮށްގެން ޔުރޯޕޮލްއިން ތައްޔާރުކޮށްފައިވާ ވެބްސައިޓްއިން ފެނިގެންދަނީ މޫނު ނިވާކޮށްގެން ތިބޭ އަންހެނުންތަކެކެވެ. އަދި އެ މާސްކުތަކުގެ ފަހަތުގައި ތިބެނީ ކޮންބައެއްކަން ހާމަކޮށްދިނުމަށް އެ މާސްކުތައް ވެއްޓޭ މަންޒަރުވެސް ފެނިގެންދެއެވެ. މާސްކު ވެއްޓުމާއެކު، ފިލައިގެން އުޅޭ ޖިނާއީ ކުށްވެރިންގެ އައިޑެންޓިތީ ހާމަވެގެންދެއެވެ.
ޔުރޯޕޮލްއިން ބުނީ މިފަދަ ކެމްޕޭނެއް ހިންގުމުގެ މައިގަނޑު މަގުސަދަކީ، ފިރިހެނުންނެކޭ އެއްފަދައިން ސީރިއަސް ޖިނާއީ ކުށްތަކަށް އަރައިގަތުގެ "ކުޅަދާނަކަން" އަންހެނުންނަށްވެސް ލިބިފައިވާކަން އަންގައިދިނުން ކަމަށެވެ.
ދުނިޔޭގެ ނިސްބަތުން ބަލާއިރު ޖިނާއީ ބޮޑެތި ޖަރީމާތައް ހިންގުމުގެ ފަހަތުގައި ގިނަ އަދަދެއްގެ އަންހެނުން ތިބިކަމުގައި ވީ ނަމަވެސް، އެ ޖަރީމާ ހިންގުމުގައި އަމަލީ ގޮތުން ގިނަ ފަހަރަށް ހަރަކާތްތެރިވެފައިވަނީ ފިރިހެނުންނެވެ.
"ޖިނާއީ ކުށަށް ޖިންސެއް ނުވޭ" މި ޝިއާރުގެ ދަށުން ޔޫރޯޕޮލްއިން ފަށާފައިވާ ކެމްޕޭންގައި 18 އަންހެނަކު ހޯދުމަށް ވަނީ އިއުލާންކޮށްފައެވެ. މި ލިސްޓުގައި 3 ފިރިހަނަކުވެސް ހިމަނާފައެވެ. އެމީހުން ހިންގާފައިވާ ޖަރީމާތަކުގެ ވާހަކަ މާސްކުގެ ނިވަލުގައި ތިބޭ ވަގުތު ތަފްސީލުކޮށްދެމުންދާއިރު، އެއީ ކޮން ޖިންސެއްގެ މީހެއްކަން އެނގެނީ އެންމެ ފަހު ވަގުތުއެވެ.
ޔޫރޯޕޮލްގެ ކެމްޕޭންގައި ހިމަނާފައިވާ ބައެއް ކުށްވެރިން ހިންގާފައިވާ ޖަރީމާތަކުގެ ތެރޭގައި ކުޑަކުދިންގެ ވަގުފާރީގެ އަމަލުތަކާ، ގަސްތުގައި މީހުން މެރުން ފަދަ ބޮޑެތި ކުށްތަކެއް ހިމެނެއެވެ.
