ލަސް ވޭގަސްއޭ ބުނުމުން އިތުރު ތައާރަފަކަށް ބޭނުމެއް ނުވާނެއެވެ. އެއީ ގިނަ ބަޔަކު ސިފަކުރާ ގޮތުގައި އެމެރިކާގެ ކީއްކުރަންހެއްޔެވެ، މުޅި ދުނިޔޭގެވެސް "ސިންސިޓީ"އެވެ. ފާހިޝްވެގެން ވިއްޔާ ހިތަށް ގެންނަންވެސް ދަތި ހަޑިމުޑުދާރު ކިތަންމެ އަމަލާ، 'ކާފަރު ކަމެއް' ހިންގަމުންދާ މަރުކަޒަކީ އެއީއެވެ.
"ސިން ސިޓީ"އަކީ "ސިޓީ އޮފް ލައިޓް"އަށް ހެދުމުގެ އަޒުމުގައި ހުރި މީހަކީ އިމާމު ފަތީން ސައިފުﷲއެވެ. ލަސް ވޭގަސް ސަރަހައްދުގައި ހުރި އެންމެ ބޮޑު މިސްކިތް ކަމަށްވާ މަސްޖިއްދު-ސޮބްރްގެ އިމާމު ސައިފުﷲ މި ބުނާ "ލައިޓް"އަކީ ފަހަރެއްގައިވެސް ލަސް ވޭގަސްގެ ކެސިނޯތަކާ ނާސިގެތަކުން ދިއްލާ ދިއްލުމުގެ ވާހަކައެއް ނޫނެވެ. އޭނާ ބުނާ ގޮތުގައި، ލަސް ވޭގަސްއަށް އޭނާ ގެނެސްދޭން ބޭނުންވަނީ އިސްލާމީ ހިދާޔަތުގެ "ނޫރު"ގެ އަލިކަމެވެ.
"މުސްލިމު ވިލެޖް"ގެ ނަމުގައި އިސްލާމީ ސިޓީއެއް ތަރައްގީ ކުރުމުގެ މަސައްކަތް އިމާމް ސައިފުﷲ ފެށީ 2010 ވަނަ އަހަރުގެ ތެރޭގައެވެ. އެއީ ލަސް ވޭގަސް ސްޓްރިޕްގެ އުތުރުން އޮންނަ ސަރަހައްދެއްގައެވެ. ވެސްޓް ލަސް ވޭގަސްގެ ގޮތުގައި އޮންނަ މި ސަރަހައްދުގައި ކުރިން ހިންގަމުންދިޔަ ޑްރަގް ހަބްތަކާ ގޭންގުތައްވެސް މަޑުމަޑުން އެ ސަރަހައްދުން ބޭރުކުރީ އިމާމް ސައިފުﷲއާއި އޭނާއާއިއެކުގައި އުޅޭ މީހުންނެވެ. މަސްޖިއްދު-ސޮބްރްގެ މިހާރުގެ އަމާޒަކީ ވަށައިގެން އޮތްހާ ބިމާ އިމާރާތްތައް ގަތުމެވެ. އަދި އެ ބިމުގައި، އަތް ފޯރާ ފަށުގައި ބޯހިޔާވަހިކަން ފޯރުކޮށްދިނުމުގެ ބިނާތަކެއް ކުރުމެވެ.
މިސްކިތުގެ ފާރުގައި ކުރަހާފައިވާ ބޮޑު އަތުކުރެހުމަކަށް އިޝާރާތް ކުރަމުން އިމާމް ސައިފުﷲ ވަނީ، "މުސްލިމު ވިލްޖެ"ގެ ތަސައްވުރެ ހިއްސާކޮށްފައެވެ. އިމާމް ސައިފުﷲ ބުނާ ގޮތުގައި މި މަސައްކަތް ފެށިގެން އައީ މުސްލިމުންނާ ޣައިރު މުސްލިމުންނަށްވެސް އަމާން ވެއްޓެއް ގާއިމުކޮށްދިނުމުގެ މަގުސަދުގައެވެ. މަގުސަދަކީ މުސްލިމުންގެ ފިޔަވަޅު ތިލައަކީ އަނެއް ބަޔަކު ގަބޫލުކުރަނިވި ނިޝާނަކަށް ހަދާ، މުސްލިމުން ކޮށްދީފައިވާ މަސައްކަތްތައް ފެންނަން އޮންނާނެ ގޮތެއް ހެދުން ކަމަށްވެސް އިމާމު ސައިފުﷲ ބުންޏެވެ.
އިމާމު ސައިފުﷲ އިސްވެ ހުރެ ތަރައްގީ ކުރަމުންދާ "މުސްލިމު ވިލެޖު"އިން ލިބެން ހުންނަ ބައެއް ހިދުމަތްތަކުގެ ތެރޭގައި ހިލޭ ސާބަހަށް ސިއްހީ ފަރުވާ ދޭ ކުލިނިކަކާ، ކާބޯތަކެތި ރައްކާކޮށްފައި ހުންނަ ޕޭންޓްރީއެއްގެ އިތުރުން، ކުތުބުހާނާއަކާ، އާންމުންގެ ބަގީޗާއެއްގެ އިތުރު ޒުވާނުންނަށް ހާއްސަކޮށްގެން ސްކޫލެއްގެ ހިދުމަތްތައް ފާހަގަކުރެވެއެވެ. މީގެ އިތުރުން، ލާއިންސާނީ އަނިޔާގެ ޝިކާރައަކަށްވެފައިވާ އަންހެނުންނަށް ބޭނުންވާ ދުވަހު ކެއުމާ، ވަގުތީ ބޯހިޔާވަހިކަމުގެ އެހީތެރިކަން މިސްކިތުން ފޯރުކޮށްދެމުންދެއެވެ. ހަމަ މިއާއެކު، އެކި ކަހަލަ މަސްތުގެ ވަބާގައި ޖެހިފައިވާ މީހުންނަށް ހާއްސަކޮށްގެން، އެ މަސްތުން ސަލާމަތްވާނެ ޕްރޮގްރާމެއްވެސް މިސްކިތުން ދަނީ ހިންގަމުންނެވެ.
ލަސް ވޭގަސްގެ "މުސްލިމު ވިލެޖް" އަކީ ހަމައެކަނި މުސްލިމުންނަށް ހާއްސަ ސަރަހައްދެއް ނޫނެވެ. އެ ސަރަހައްދުގައި މިހާރު ވަޒަންވެރިވެ، އެހީތެރިކަން ހޯދަމުންދާ އެކި އުމުރު ފުރާގެ މީހުންގެ ތެރޭގައިވެސް ގިނައީ ޣައިރު މުސްލިމުންނެވެ. އެހެނެއްކަމަކު އެ ސަރަހައްދުގައި ސުލްހައާއި އަމާންކަން އޮންނަކަން އިމާމު ސައިފުﷲ ފާހަގަކުރެއެވެ. ދީނީ ކޯޅުންތަކާ ހަނގުރާމަތަކެއް ނޯވެއެވެ.
އިމާމް ސައިފުﷲ ބުނާ ގޮތުގައި ލަސް ވޭގަސްގައި މުސްލިމުން އުޅެފާނެކަމަށް އެއްވެސް މީހަކު ގަބޫލެއް ނުކުރެއެވެ. ކަންމިހެން އޮތް ނަމަވެސް، އިމާމް ސައިފުﷲ އިސްވެ ހުރި މިސްކިތުގެ ޖަމާއަތުގައި 10000 އާއި 20000 ދެމެދު އަދަދަކަށް މީހުން ބައިވެރިވެއެވެ. އިމާމު ސައިފުﷲގެ އަމާޒަކީ، އުއްމީދު ގެއްލިފައިވާ މީހުންނަށް އެ އުއްމީދު އަލުން ހޯދާ ދިނުންކަމަށް އޭނާ ބުނެއެވެ.
