ލ. އަތޮޅު ގެއެއްގައި ހުރި މަސް ފެންގަނޑަކަށް ވެއްޓުނު ކުއްޖާ އޮތީ އަދިވެސް ވެންޓިލޭޓަރުގައި ކަމަށާއި މި މައްސަލައިގެ ތަހުގީގު އަދިވެސް ދަނީ ކުރިއަށް ކަމަށް ފުލުހުން ބުނެފިއެވެ.
މިދިޔަ މަހުގެ 14 ވަނަ ދުވަހު ލ. ގަމު ގެއެއްގެ ތެރޭގައި އޮތް މަސް ފެންގަނޑަކަށް 2 އަހަރުގެ ތުއްތު ފިރިހެން ކުއްޖަކު ވެއްޓި ސީރިއަސް ހާލަތަށް ގޮސް އެ ކުއްޖާ ވެންޓިލޭޓަރުގައި އޮންނަތާ 3 ހަފްތާ ވީއެވެ.
އައިޖީއެމްއެޗްގެ މީޑިއާ އޮފިޝަލް ވިދާޅުވީ، މި ހާދިސާގައި އެ ހޮސްޕިޓަލަށް ގެނައި ތުއްތު ކުއްޖާ އަދިވެސް އޮތީ އައިސީޔޫގައި ވެންޓިލޭޓަރުގައި ކަމަށާއި ނަމަވެސް މަޑުމަޑުން ކޮންމެވެސް ވަރަަކަށް ހަރަކާތް ކުރާ ކަމަށެވެ. ކުއްޖާގެ ހާލަތާ މެދު އިތުރު އެއްޗެއް އަދި ޑޮކްޓަރުން ވިދާޅުނުވާކަމަށް ވެސް އޭނާ ވިދާޅުވިއެވެ.
ގަމު ފުލުސް އޮފީހުގައި މަސައްކަތް ކުރާ ފުލުހެއް އެ ކުއްޖާ ފެންގަނޑަށް ވެއްޓުމުން ވަނީ އެ ކުއްޖާ ގަމު ހޮސްޕިޓަލަށް އެ ދުވަހު ގެންގޮސްފައެވެ. ހޮސްޕިޓަލަށް ގެންދިޔަ އިރުވެސް އެ ކުއްޖާގެ ހާލު ސީރިއަސް ކަމަށް އެ ހޮސްޕިޓަލުން ބުނެފައި ވެއެވެ. ދެން އެކުއްޖާ ވަނީ މާލެ އެރޭ 11:00 އިރު އިތުރު ފަރުވާ ދިނުމަށް މާލެއަށް ގެނެސްފައެވެ. މާލެއަށް ގެނެސް އެ ކުއްޖާއަށް ދަނީ އައިޖީއެމްއެޗް ހޮސްޕިޓަލުން ފަރުވާ ދެމުންނެވެ.
ފުލުހުން އަދިވެސް ދަނީ މި މައްސަލަ އިތުރަށް ބަލާ ތަހުގީގު ކުރަމުންނެވެ.
