އިންޑިއާގެ ބާޒާރުގައި ފިޔާގެ ސްޓޮކް ދަށަށް ދިއުމުގެ ސަބަބުން އެގައުމުން ފިޔާ އެކްސްޕޯޓް ކުރުން ވަގުތީ ގޮތުން މެދުކަނޑާލުމަށް އާދީއްތަ ދުވަހު ނިންމި ނިންމުމާއެކު އިންޑިއާގެ ބާޒާރުގައި ފިޔާގެ އަގު ދަށަށް ގޮސް، ދަނޑުވެރިން ހިތްހަމަނުޖެހިއްޖެއެވެ.
އިންޑިއާގެ ބާޒާރުން ފިޔާ އެކްސްޕޯޓްކުރުން ވަގުތީ ގޮތުން މަނާކޮށްފައި ވާއިރު، މިކަމުގެ ސަބަބުން ބާޒާރުގައި ފިޔާގެ އަގުތައް ވެއްޓިގެން ހިތްހަމަނުޖެހުނު ބައެއް ދަނޑުވެރިން ވަނީ މުޒާހަރާވެސް ކޮށްފައެވެ.
އިންޑިއާގެ ބާޒާރުގައި ފިޔާގެ އަގުތަކަށް އައިސްފައިވާ ބަދަލަށް ބަލާއިރު ކޮންމެ 100 ކިލޯ އަކުން 600 ރުޕީޒް ދަށަށް ގޮސްފައި ވާކަމަށް މީޑިއާ ރިޕޯޓްތައް ބުނެއެވެ.
އިންޑިއާއިން ފިޔާ ބޭރުކުރުން ހުއްޓާލުމުގެ ވަގުތީ އަމުރެއް، އެގައުމުގެ ވިޔަފާރިއާ ބެހޭ ވުޒާރާއިން ނެރުނީ މޫސުމީ ގަދަ ވިއްސާރައިގެ ސަބަބުން ފިޔާ ދަނޑުތަކަށް ބޮޑެތި ގެއްލުންތަކެއް ލިބި، ފިޔާގެ ރިޒާވް އިންތިހާއަށް ދަށަށް ދިއުމުގެ ސަބަބުންނެވެ.
