އެއް ފަހަރުވެސް ސިޒޭރިއަން ހަދާފައި ހުރި ނަމަ، އޭގެ ފަހުން ބަލިވެ އިންނަ ކޮންމެ ފަހަރަކު އެންމެ ރައްކާތެރި ގޮތުގައި ދަރިފުޅު ދުނިޔެއަށް އުފަން ކުރެވޭނެ ގޮތަކީ ދުރާލާ ރާވައިގެން ސިޒޭރިއަންއަކަށް ދިއުން ކަމަށް ދިރާސާއަކުން ދައްކައިފިއެވެ.
މާޒީގައި ސިޒޭރިއަން ހަދާފައިވާ މީހަކު އާންމު އުސޫލުން ދަރިފުޅު އުފަންކުރަން އުޅުމުގެ ތެރޭގައި، ކުޑަ ތަންކޮޅެއް ނަމަވެސް ދަރިފުޅާ މައިމީހާއަށް އެކަމުން އޮންނަ ނުރައްކާ ބޮޑު ކަމަށް ދިރާސާއިން ދައްކައެވެ.
ޕަބްލިކް ލައިބްރަރީ އޮފް ސައިންސް (ޕްލޯސް) މެޑިސިން ޖާނަލްގައި އަންގާރަ ދުވަހު އާންމުކުރި ދިރާސާއަކީ ސްކޮޓްލަންޑްއިން މާބަނޑު 74043 މީހަކު ބައިވެރިކޮށްގެން ކުރިއަށް ގެންދިޔަ ދިރާސާއެކެވެ. މި ދިރާސާގެ ބައިވެރިންނަކީ މީގެ ކުރިން 1 ފަހަރު ނުވަތަ އެއަށްވުރެ ގިނަ ފަހަރު ސިޒޭރަން ހަދާފައިވާ މީހުންނެވެ.
ދިރާސާގެ ހޯދުން
މި ދިރާސާގެ ބައެއް ހޯދުންތަކަށް ބަލާއިރު މީގެ ކުރިން ސިޒޭރިއަން ހަދާފައިވާ މީހުން އަލުން ބަލިވެ އިނދެ، ސިޒޭރިއަންއަކަށް ދިއުމުގެ ބަދަލުގައި ވިހަން އުޅުމުގެ ތެރޭގައި ސިއްހީ މައްސަލަތަކަކާ ކުރިމަތިވުމުގެ ނުރައްކާ އިތުރުވެއެވެ. އެގޮތުން ޔޫޓްރެސް އިރައިގެން ދިއުމާ، ބްލަޑް ޓްރާންސްފިއުޝަން ހަދަންޖެހުން ފަދަ ތަކުލީފުތަކާ ކުރިމަތިވުމުގެ ނުރައްކާ އިތުރުވެއެވެ.
ކަންމިހެން އޮތް ނަމަވެސް، ކުރިން ސިޒޭރިއަން ހެދުމަށްފަހު އާންމު އުސޫލުން ވިހަން އުޅުމުގެ ތެރޭގައި ނުރައްކާ ކުރިމަތިވަނީ ވަރަށް ކުޑަ މިންވަރަކަށް ކަމަށްވެސް މި ދިރާސާގައި ވަނީ ފާހަގަކޮށްފައެވެ.
ދިރާސާގެ މުސައްނިފުން ބުނާ ގޮތުގައި މި ދިރާސާއަކީ މީގެ ކުރިން ސިޒޭރިއަން ހަދާފައިވާ މައިން އަލުން ބަލިވެ އިނދެ ވިހަންވީ އުސޫލެއް ހިޔާރު ކުރުމުގައި އިރުޝާދު ދިނުމަށް ބޭނުންކުރެވިދާނެ ދިރާސާއެކެވެ.
ސީޒޭރިއަންއާއި ވިހެއުން
ސިޒޭރިއަންއަކީ ދުނިޔޭގެ ހުރިހާ ހިސާބެއްގައިވެސް މިހާރު ތަރައްގީއާއެކު ފުޅާވަމުން އަންނަ ދަރިމައިވުމާ ދަރިއަކު އުފަންވުމާ ގުޅިފައިވާ އޮޕަރޭޝަނެކެވެ. ސިޒޭރިއަންއަކީ މައިމީހާ ނުވަތަ ބަނޑުގައިވާ ދަރިފުޅުގެ ފުރާނައަށް ނުރައްކާވެއްޖެ ހިނދެއްގައި ނުވަތަ އެފަދަ ނުރައްކަލެއް އޮވެދާނެ ކަމަށް ސިއްހީ ފަރުވާ ތަޖުރިބާކާރަށް ލަފާކުރެވިއްޖެ ހިނދެއްގައި ދުރާލާ ރާވައިގެން ނުވަތަ އިމާޖެންސީގައި ކުރާ އޮޕަރޭޝަނެކެވެ. މިއިން އެއްވެސް ކަމަކާ ނުލާވެސް ސިޒޭރިއަން ހިޔާރު ކުރުމުގެ ފުރުސަތު ދުނިޔޭގެ ބައެއް ގައުމުތަކުގައި ދެމުންއާދެއެވެ.
ހޭނައްތައިގެންނާ އައްސި ކޮށްގެންވެސް ސިޒޭރިއަން ހަދާއިރު، މިކަމުގެ ތަކުލީފުތައް އުފުލަންޖެހެނީ ވިހާތާ ދުވަސްކޮޅެއް ފަހުންނެވެ. ކަންމިހެން އޮތްއިރު، ސިޒޭރިއަން ހަދައިގެން ދަރިފުޅު އުފަންކުރާ މައިންނަކީ މައި ކުލުނު ނެތް ބައެއްކަމަށް ބައެއް މުޖުތަމައުތަކުން ސިފަކުރަމުންދާ ދިއުމުގެ ސަބަބުން ފުރާނައަށް ނުރައްކާވެގެންދާ ދަނޑިވަޅުތަކުގައި ސިޒޭރިއަން ހެދުމަށް ބައެއް އަންހެނުން ފަސްޖެހޭ ފަހަރު އާދެއެވެ. އާންމު އުސޫލުން ދަރިއަކު އުފަންކުރުމާ ސިޒޭރިއަން ހަދައިގެން ދަރިއަކު އުފަންކުރުމުގައި ފަރަގެއް ހުރި ކަމުގައި ވީ ނަމަވެސް، މައިވަންތަ ކުލުނުގައި ވަކި ތަފާތެއް ނޯންނަކަމަށް، މި ދެކަންތައް ތަޖުރިބާކޮށްފައިވާ މައިން އިއްތިފާގުވެއެވެ.
ތިދެކަން ވެސް އަޅުގަނޑައް ތަޖުރިބާ ކުރެވުނު. މައިވަންތަ ކުލުނު ތަފާތެއް ނޫން.
ވިހެޔަސް ސިޒޭރިޔަން ހެދިޔަސް މައިމީހާ ވާނީ ހަމަ މައިމީހާއަށް، ކުލުނު ޖެހެނީ ވަކިވިހައިގެން ސިޒޭރިއަން ހަދައިގެނެއް ނޫން.. ނުވަމަހާ ނުވަދުވަސް ވަންދެން ބަނޑުގަ އޮންނަނީ އެހެން މީހެއްގެ ބަނޑަކު ނޫން އޮންނަނީ ކުލުނު ނުޖެހޭކަށް. މި ދިވެހިންގެ ތެރޭގަ ވަރަށް ބޮޑަށް އޮންނަ ކަމެއް އެއީ، ވިހާ މީހެއްގެ ވޭނެއް އިހުސާސެއް ނުކުރެވޭނޭ ސިޒޭރިއަން ހަދާމީހަކަށް.