މާލޭގައި މީހުން ދިރިއުޅޭ އިމާރާތްތަކުގައި ޖުމްލަ 82 ކެމިކަލް ގުދަން އެބަހުރި ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
ރައީސް އޮފީހުގައި މިހާރު ކުރިއަށް ގެންދާ ޖޮއިންޓް ޕްރެސް ކޮންފެރެންސްގައި ވާހަކަ ދައްކަވަމުން މާރިޔާ ވިދާޅުވީ، މާލޭގައި ޖުމްލަ 126 ކެމިކަލް ގުދަން އެބަހުރި ކަމަށެވެ. އޭގެތެރެއިން 98 ގުދަންނަކީ މީހުން ދިރިއުޅޭ ސަރަހައްދުގައި ހުރި ގުދަންތައް ކަމަށް މާރިޔާ ވިދާޅުވިއެވެ. މި 98 ގުދަނުގެ ތެރެއިން 82 ގުދަން ހުރީ މީހުން ދިރިއުޅޭ އިމާރާތްތަކުގައި ކަމަށްވެސް މާރިޔާ ވިދާޅުވިއެވެ.
މީގެ އިތުރުން މާރިޔާ ވިދާޅުވީ މިފަދަ ގުދަންތައް މީހުން ނޫޅޭ ސަރަހައްދުތަކަށް ބަދަލު ކުރުމުގެ މަސައްކަތް ކުރުމަށް ނިންމާފައިވާ ކަމަށެވެ. އެގޮތުން ބޮޑެތި ކެމިކަލް ގުދަންތައް ކ. ތިލަފުށި ނުވަތަ ގުޅީފަޅަށް ބަދަލުކުރަން ނިންމާފައިވާ ކަމަށްވެސް މާރިޔާ ވިދާޅުވިއެވެ.
މި ޕްރެސް ކޮންފަރެންސްގައި ޑިޒާސްޓާ މެނޭޖްމަންޓްގެ ޗީފް އެގްޒެކެޓިވް ހިސާން ހަސަން ވިދާޅުވީ، ގުދަންތައް ބަދަލުކުރުމަށް 200 އެއްހާ ޖާގަ ތިލަފުށީގައި އެބަހުރި ކަމަށެވެ. މިހާރުން މިހާރަށްވެސް ބަދަލުކުރަންޖެހޭ ގުދަންތައް ބަދަލުކުރުމުގެ މަސައްކަތް ކުރަމުންދާކަމަށް ހިސާން ވިދާޅުވިއެވެ.
ރޭ މާލޭގެ އަބަދަށްފެހި މަގުގައި ހިނގި އަލިފާނުގެ ހާދިސާގައި އަލިފާން ރޯވެފައިވަނީ ކެމިކަލް ގުދަނެއްގައި އަލިފާން ރޯވެގެންނެވެ. މި ހާދިސާގައި އެ ސަރަހައްދުގައި ހުރި 4 ގުދަނެއްގައި އަލިފާން ރޯވެފައިވާ އިރު 6 ގެއެއްގައިވެސް ވަނީ އަލިފާން ރޯވެ ފޫނުބެދޭ ވަރުގެ ހގެއްލުންތައް އެތައް އާއިލާއަކަށް ލިބިފައެވެ. އެ ސަރަހައްދުގައި ދިރިއުޅޭ 400 އަށް ވުރެ ގިނަ މީހުން ވަނީ ކަލާފާނު ސްކޫލުގައި އަލިފާނުގަެ ހާދިސާއިން ގެއްލުން ވީ މީހުންނަށް ހަމަޖެއްސި ވަގުތީ ހިޔާގައި ރަޖިސްޓާކޮށްފައެވެ. މި ހާދިސާގައި 46 އަހަރުގެ އައިޝަތު ޝައުނާ ވަނީ ނިޔާވެފައެވެ. މިހާދިސާގައި އަލިފާން ނިއްވުމަށް އެމްއެންޑީއެފާއެކު ޑިޒާސްޓާ މެނޭޖްމަންޓާއި، އޭޑިކޭ ހޮސްޕިޓަލުގެ މުވައްޒަފުންނާއި ރެޑް ކްރެސެންޓްގެ އިތުރުން ސިޓީ ކައުންސިލުންނާއި އާންމު ރައްޔިތުންވަނީ އެހީތެރިކަން ފޯރުކޮށްދީފައެވެ.
