އިންޑިއާ ރަށްވެހިންގެ ރަސްމީ ދަފުތަރު (އެން.އަރް.ސީ) އާންމުކޮށްފިއެވެ.
އައްސާމް ސްޓޭޓްގެ ރަށްވެހިކަމާ މެދު ގޮތެއް ނިންމިގެން ދިޔަ މި ލިސްޓަށް ގިނަ ބަޔަކު އިންތިޒާރު ކުރަމުންދިޔައިރު، މިއަދު އާންމު ކުރި މި ލިސްޓުގައި އެ ސްޓޭޓްގެ 2 މިލިއަނެއްހާ މީހުން ހިމަނާފައި ނުވާކަމަށް ޚަބަރު ލިބެއެވެ.
ލިސްޓުގައި ނަން ނުހިމެނި، އަމިއްލަ ވަޒަނެއް ނެތް ބަޔަކަށް އެމީހުން ވެދާނެ ކަމުގެ ބިރުވެރިކަމުގެ ތެރޭގައި އައްސާމް ސްޓޭޓްގެ ގިނަ ބަޔަކު ތިބޭތާ އެތައް ދުވަހެއް ފަހުން މިއަދު އާންމު ކުރި ލިސްޓުގައި ހިމެނެނީ 31.1 މިލިއަން މީހުންގެ ނަމެވެ.
އައްސާމްގެ ސަރުކާރުން އާންމުކުރި ބަޔާނެއްގައި ބުނެފައިވަނީ ދަފުތަރު އެކުލަވާފައި ވަނީ މީހާއަށް ބެލުމެއް ނެތި، ދެފުށް ފެންނަ ގޮތެއްގައި ފުޅާ ދާއިރާއެއްގައި ކުރިއަށް ގެންދެވުނު ބުރަ މަސައްކަތްތަކަކުން ކަމަށެވެ. ދަފުތަރު އެކުލަވާލުމުގެ ހުރިހާ މަރުހަލާއެއްގައި ވެސް ޖަވާބުދާރީ ވުމަށް އެކަށީގެންވާ ފުރުސަތު، ކޮންމެ މީހަކަށް ވެސް ދީފައިވާނެ ކަމަށް އައްސާމް ސަރުކާރުން އާންމު ކުރި ބަޔާނުގައި ވަނީ ފާހަގަކޮށްފައެވެ.
އެން.އާރް.ސީއަކީ އައްސާމްއަށް ހާއްސަ ދަފުތަރެކެވެ. މި ލިސްޓު އެންމެ ފުރަތަމަ އެކުލަވާލީ 1951 ވަނަ އަހަރުއެވެ. މިހާރުގެ ލިސްޓުގައި ހިމެނެނީ އެ ފަހަރުގެ ލިސްޓުގައި ހިމެނުނު މީހުންނާ އެމީހުންގެ ދަރިފަސްކޮޅުން އައި މީހުންނެވެ. އަދި 1971 ވަނަ އަހަރާ ހަމައަށް އިންޑިއާގެ އިންތިހާބުތަކުގައި ބޭނުންކުރި ދަފުތަރުގައި ތިބި މީހުންނަށްވެސް މިފަހަރުގެ ދަފުތަރު ލިސްޓުން ވަނީ ފުރުސަތު ދީފައެވެ.
ފައިނަލް ލިސްޓުގައި ނަން ނެތް މީހުންނަށް، އެމީހުންގެ ރަށްވެހިކަން ސާބިތުކޮށްދިނުމުގެ ފުރުސަތު ކޯޓު މަރުހަލާގައި ހަމަޖެހިފައިވާކަމަށް އިންޑިއާގެ ކަމާ ބެހޭ ފަރާތްތަކުން ބުނެއެވެ.
