ކުޑަ ކުއްޖަކާ ނުވަ މީހުންނާއެކު ހަނިމާދޫއަށް ދަތުރުކުރި ލޯންޗެއް ގެއްލިގެން ހޯދަން ފަށައިފިއެވެ.
ހަނިމާދޫއަށް ދަތުރުކުރި ލޯންޗު ބަންޑުން ޖަހާލި އިރު އޭގައި ދަތުރުކުރި މީހުންގެ ތެރެއިން އަންހެނަކު އަދި ނުފެންނަކަމަށް އެމްއެންޑީއެފުން ބުނެއެވެ.
އެމްއެންޑީއެފް ކޯސްޓް ގާޑުން ބުނީ، ހދ ނޮޅިވަރަމްފަރުން މި ލޯންޗް ފުރިފަހުން ހަބަރެއް ނުވެގެން އެމްއެންޑީއެފް ނޮދާން އޭރިއާ އިން ހަރަކާތްތެރިވާން ފަށާފައިވާ ކަމަށެވެ. ޖުމްލަ 10 މީހުންނާއެކު ހަނިމާދޫއަށް ދަތުރުކުރި ލޯންޗެއް ގެއްލިގެން އެމްއެންޑީއެފްގެ ނޮދާން އޭރިއާ އަށް ރިޕޯޓް ކޮށްފައި ވަނީ މިއަދު މެންދުރު 12:25 ހާއިރު ކަމަށް އެމްއެންޑީއެފުން ބުނެއެވެ.
މި ލޯންޗް ބަންޑުން ޖަހާލާފައި ވަނީ ހަނިމާދޫ ކަން މައްޗަށް ކަމަށް އެމްއެންޑީއެފުން މައުލޫމާތު ދެއެވެ. ލޯންޗުގައި ތިބި މީހުންގެ ތެރޭގައި ކުޑަކުއްޖަކު ހިމެނޭ ކަމަށާއި އޭގެ ތެރެއިން ފެނިފައިވަނީ ކުޑަ ކުއްޖާއާ އެކު 8 މީހުން ކަމަށް އެމްއެންޑީއެފުން ބުނެއެވެ. މި މީހުންގެ ތެރއިން ފުރަތަމަ ފެނުނީ 7 މީހުންނެވެ. އެ 7 މީހުން އެމްއެންޑިއެފް ނޮދާންއޭރިއާގެ ޑިންގީއެއްގައި ހަނިމާދޫއަށް ގެންގޮސްފައިވާ ކަމަށްވެސް އެފަރާތުން ބުނެއެވެ. އޭރު ނުފެނި 2 އަންހެނަކާއި ކުޑަކުއްޖެއް ވީ ނަމަވެސް މިހާރު ކުޑަކުއްޖާއާއި އެއް އަންހެނަކު ފެނިފައިވާ ކަމަށް ކޯސްޓް ގާޑުން މައުލޫމާތު ދެއެވެ.
އެމްއެންޑީއެފް ކޯސްޓްގާޑްގެ ޑިންގީއެއްގެ އިތުރުން ސީ އެމްބިއުލަންސްވެސް މީހުން ހޯދުމުގައި ހަރަކާތްތެރިވަމުން ދާކަމަށް ކޯސްތް ގާޑުން މައުލޫމާތު ދެއެވެ.
