އަވަށްޓެރި އިންޑިއާގެ ފުލުހުންގެ ތެރޭގައި މުސްލިމުންނާ މެދު ނޭދެވޭ ފިކުރެއް ގެންގުޅެމުން އަންނަކަން ސާވޭއަކުން ސާބިތުވެއްޖެއެވެ.
އިންޑިއާގެ 21 ސްޓޭޓަކުން ފުލުހުން ބައިވެރިކޮށްގެން ކުރިއަށް ގެންދިޔަ ދިރާސާ ސާވޭއިން ދައްކާ ގޮތުގައި "މުސްލިމުންނަކީ ގުދުރަތީ ގޮތުންވެސް ޖިނާއީ ކުށް ކުރުމުގެ ޒާތު" ހުންނަ ބައެއް ކަމަށް ފުލުހުންގެ ދެބައިކުޅަ އެއްބައި މީހުން ގަބޫލުކުރެއެވެ.
ކަންމިހެން އޮތްއިރު، ގެރި ކަތިލައިގެން މީހުންނަށް ހަމަލާ ދެމުންދާ ދިއުމަކީ ބަލައިގަނެވޭނެ ކަމެއް ކަމަށް، ސާވޭގައި ބައިވެރިވި 12000 ފުލުހުންގެ ތެރެއިން ކޮންމެ 3 މީހަކުން 1 ވަނީ ބުނެފައެވެ.
އިންޑިއާގެ ފުލުހުންނާ ގުޅޭ ގޮތުން މިފަދަ ރިޕޯޓެއް އާންމުކޮށްފައިވާ މި ދަނޑިވަޅަކީ، އިންޑިއާގެ ބޮޑުވަޒީރު ކަމާ ނަރޭންދްރާ މޯދީ 2014 ވަނަ އަހަރު ހަވާލުވެވަޑައިގެންނެވި ފަހުން އެ ގައުމުގައި މުސްލިމުންނާ ދެކޮޅަށް ވަރުގަދަ ހަރަކާތްތަކެއް ފެށިފައިވާކަމުގެ ކަންބޮޑުވުން އދއިން ފާޅުކޮށްފައިވާ ދަނޑިވަޅެއްގައެވެ.
ވަކިން ހާއްސަކޮށް ގެރި ކަތިލުމާ ގެރި މަސް ކާ މީހުންނާ ދެކޮޅަށް ހިންދޫންގެ ޖަމާއަތްތަކުން ދެމުންދާ ލާއިންސާނީ އަނިޔާތަކުގައި ގިނަ ބައެއްގެ ފުރާނަ ގެއްލިފައިވާއިރު، އެމީހުންނަށް ހައްގު އަދަބު ދިނުމަށް މޯދީގެ ސަރުކާރުން އެކަށީގެންވާ ގޮތެއްގައި މަސައްކަތް ނުކުރާ ކަމުގެ ފާޑުކިއުންތައްވެސް އިންޑިއާގެ ސަރުކާރަށް ދަނީ އަމާޒުވަމުންނެވެ.
އަހަރު ދުވަހަށް ދެމިގެންދިޔަ ދިރާސާ ސާވޭ ކުރުމުގައި އިސްކޮށް ހަރަކާތްތެރިވި މަންޖޭޝް ރަނާ ބުނީ، ދިރާސާގެ ނަތީޖާގައި ހައިރާން ކުރުވަނިވި ކަންތައްތަކެއް އެބަހުރި ކަމަށެވެ. އަދި މިއީ ފުލުހުންގެ އިދާރާގެ ފިކުރަށް ނުވެ ހިނގައިދާނެ ކަމަށާ، މިއީ ވަކިވަކި ފަރުދުންގެ ހައިސިއްޔަތުން އައި ފިކުރުތަކެއް ކަމަށް ވެދާނެ ކަމަށްވެސް އެނާ ވަނީ ބުނެފައެވެ.
މިއީ އިންޑިއާގެ ފުލުހުން ޝާމިލުވާ ގޮތަށް މިފަދަ މޭރުމަކުން އެގައުމުގައި ކުރިއަށް ގެންދިޔަ ފުރަތަމަ ސާވޭއެވެ.
