ޓެރަރިސްޓް ޖަމާއަތެއް ކަމުގައި ކަނޑައާޅާފައިވާ ޖާއިޝީ މުޙައްމަދު (ޖެމް) ޖަމާއަތުން، ކަނޑުގެ އަޑިން އިންޑިއާއާއަށް ހަމަލާދިނުމަށް ބަޔަކު ތަމްރީނު ކުރަމުން އަންނަ ކަމުގެ ޖާސޫސީ މައުލޫމާތު ލިބިފައިވާކަމަށް އިންޑިއާ ކަނޑުގެ އަސްކަރިއްޔާގެ ޗީފް އެޑްމިރަލް ކަރަމްބީރު ސިންހް ވިދާޅުވެއްޖެއެވެ.
ސިންހް ވިދާޅުވީ، 2008ވަނަ އަހަރުގެ ނޮވެމްބަރު މަހުގެ 26 ވަނަ ދުވަހުގެ ހަމަލާއަށްފަހު އިންޑިއާގެ އައްސޭރި ފަށާ ކަނޑުގެ ސަރަހައްދުގެ ސަލާމަތްތެރިކަން އިންތިހާއަށް ވަރުގަދަކޮށްފައިވާނެ ކަމަށާ، ކަނޑުގެ ސަރަހައްދުންވެސް އިންޑިއާއާއި ނުތޮޅެވޭނެކަން ކަށަވަރުކުރަމުންދާކަމަށެވެ.
ކަނޑުއަޑިން އިންޑިއާއަށް ހަމަލާދިނުމަށް ޖެމްގެ ގޮތްޕެއް ތަމްރީނުކުރަމުންދާ ކަމުގެ ޖާސޫސީ މައުލޫމާތު ލިބިފައިވާކަމަށާ، މިފަދަ ކޮންމެ ރޭވުމާ ނާކާމިޔާބު ކޮށްލުމަށް އިންޑިއާ އޮތީ ތައްޔާރަށް ކަމުގެ ފުރިހަމަ ޔަގީންކަން އަރުވާކަމަށްވެސް ސިންހް ވަނީ ވިދާޅުވެފައެވެ.
ނަމަވެސް މި ދަނޑިވަޅަކީ އިންޑިއާ ކަނޑުގެ އަސްކަރިއްޔާއަށް ބަޖެޓްގެ މައްސަލަތަކެއް ކުރިމަތިވެފައިވާ ދަނޑިވަޅެއްކަމަށް ސިންހް ވަނީ އިއުތިރާފުވެވަޑައިގެންފައެވެ. އެހެންކަމުން ބައެއް ޕްލޭންތަކަށް ހައްދެއް ކަނޑައެޅިފައިވާކަމަށްވެސް ސިންހްވަނީ އެއްބަސްވެވަޑައިގެންފައެވެ.
ސިންހް އިތުރަށް ވިދާޅުވީ، އިންޑިއާ ކަނޑުގެ ސަރަހައްދުގައި ޗައިނާއިން ހިންގަމުންދާ ހަރަކާތްތަށްވެސް އިންޑިއާގެ ކަނޑުގެ އަސްކަރިއްޔާއިން ވަރަށް ގާތުން ބަލަމުން ދާ ކަމަށެވެ. ޗައިނާއަކީ ދުނިޔޭގެ އެންމެ ބާރުގަދަ ގައުމަށް ވުމަށް ފައި ވިއްދައިގެން އޮތް ގައުމެއް ކަމަށާ، ނަމަވެސް އިންޑިއާއަށް މުހިންމުވަނީ އިންޑިއާގެ ގައުމީ މަސްލަހަތު ކަމަށާ، ގައުމީ މަސްލަހަތަށް އުނިކަން ލިބޭ ކޮންމެ ދަނޑިވަޅެއްގައި އެކަމާ ދެކޮޅަށް އިންޑިއާއިން ތެދުވާނެ ކަމުގެ އިންޒާރުވެސް އިންޑިއާ ކަނޑުގެ އަސްކަރިއްޔާގެ ޗީފް އެޑްމިރަލް ވަނީ ދެއްވާފައެވެ.
