ޖައްމުއާއި ކަޝްމީރުގެ މައްސަލައާ ގުޅިގެން ދުނިޔޭގެ ކަޅި، އިންޑިއާގެ ސިޔާސީ މަސްރަހަށް ހުއްޓިފައި ވަނިކޮށް މުޅި ދުނިޔެ ސިއްސުވާލީ އިންޑިއާގެ ތާރީހު ދުށް އެންމެ މަގުބޫލު ހާރިޖީ ވަޒީރު ސުޝްމާ ސްވަރާޖު ކުށްލި ގޮތަކަށް އަވާހަރަވީ ޚަބަރާ އެކުގައެވެ.
ސުޝްމާ އަވަހާރަ ވެއްޖެކަން އިންޑިއާއިން ކަށަވަރު ކޮށްދިނުމާ އެކު ދުނިޔޭގެ އެކި ކަންކޮޅުތަކުން ބައިނަލްއަގުވާމީ ލީޑަރުން ހިތާމަ ފާޅުކުރައްވައި، އިންޑިއާއަށް ތައުޒިޔާގެ މެސެޖުތައް ފޮނުވަން ފެށްޓެވިއެވެ. ދުނިޔޭގެ ލީޑަރުން ސިފަކުރައްވާ ގޮތުގައި ސުޝްމާއަކީ ގައުމަށްޓަކައި ހަރުދަނާ މަސައްކަތްތަކެއް ކުރެއްވި ކުޅަދާނަ ލީޑަރެކެވެ.
އިންޑިއާއާއި އެންމެ ގާތުން ބަންގްލަދޭޝްގެ ބޮޑުވަޒީރު ޝައިހު ހަސީނާ ވިދާޅުވީ ސުޝްމާއަކީ ބަންގްލަދޭޝްގެ ގާތް ރަހުމަތްތެރިއެއް ކަމަށެވެ. ސުޝްމާ އަވަހާރަވުމަކީ ބަންގްލަދޭޝްއަށް ގެއްލިގެންދިޔަ ގާތް ރަހުމަތްތެރިއެއް ކަމަށް ހަސީނާ ވަނީ ސިފަކުރައްވާފައެވެ. ބަންގްލަދޭޝްއާއި އިންޑިއާގެ ގުޅުން އާ ހަރުފަތަކަށް ގެންދެވުމަށް ސުޝްމާ ކުރެއްވި މަސައްކަތްޕުޅަކީ ބަންގްލަދޭޝްއިން އަބަދުވެސް އެކަމެއްގެ ހަނދާން އާ ކުރާނެ މަސައްކަތްޕުޅު ތަކެއް ކަމަށްވެސް ހަސީނާ ވަނީ ވިދާޅުވެފައެވެ.
ނޭޕާލްގެ ބޮޑުވަޒީރު ކޭޕީ ޝަރުމާ އޯލީ ވިދާޅުވީ ސުޝްމާ އަވަހާރަވީ އަޑު އެއްސެވީ ކުށްލި ސިހުމާ ފުން ހިތާމައާ އެކުގައި ކަމަށެވެ.
އިނގިރޭސިވިލާތުގެ ސެކްރެޓަރީ އޮފް ސްޓޭޓް ފޮ ދަ ހޯމް ޑިޕާޓްމަންޓް ޕްރިޓީ ޕަޓޭލް ވިދާޅުވީ، ސުޝްމާއަކީ އިންޑިއާގެ "އަޔަން ލޭޑީ" ކަމަށެވެ. އިންޑިއާގެ ރައްޔިތުންނަށްޓަކައި ސުޝްމާ ކުރެއްވި ޚިދުމަތްތަކުގެ ހަނދާން އަބަދުވެސް އާވަމުންދާނެ ކަމަށާ، ސުޝްމާއަކީ އެތައް ގޮތަކުން ހިތްވަރު އާކޮށްދެއްވި ލީޑަރެއް ކަމަށެވެ.
އަފްޣާނިސްތާނުގެ ކުރީގެ ރައީސް ހާމިދު ކަރުޒާއީ ވިދާޅުވީ ސުޝްމާއަކީ ކުޅަދާނަ ވާހަކަ ދެއްކުންތެރިއެއްގެ އިތުރުން ރައްޔިތުންގެ ބޭފުޅެއް ކަމަށެވެ. އަދި ސުޝްމާ އިންޑިއާ ތަމްސީލު ކޮށްދެއްވީ، އަބުރުވެރިކަމާ އިހުތިރާމާ އެކުގައި ކަމަށްވެސް ކަރުޒާއީގެ ތައުޒިޔާގެ މެސެޖުގައި ވަނީ ފާހަގަ ކުރައްވާފައެވެ.
މީގެ އިތުރުންވެސް އިސްރާއީލާ އޮސްޓްރޭލިއާ، ފިޖީ އަދި ކެނެޑާގެ މިހާރުގެ ސަރުކާރުގެ ލީޑަރުންނާ ހާރިޖީ ވަޒީރުންގެ އިތުރުން ކުރީގެ ސަރުކާރުތަކުގެ އިސްވެރިންނާ ހާރިޖީ ވަޒީރުންވެސް ގެންދަވަނީ ސުޝްމާ އަވަހާރަވުމުގެ ހިތާމާގައި ބައިވެރިވެ ތައުޒިޔާގެ މެސެޖުތައް ފޮނުއްވަމުންނެވެ.
ދައުލަތުގެ އެންމެ މަތީ އިއްޒަތުގައި ސުޝްމާގެ ޖަނާޒާގެ ކަންކަން މިއަދު ކުރިއަށް ގެންދިއުމަށް ހަމަޖެހިފައި ވާކަމަށް ޚަބަރު ލިބެއެވެ.
