ޖުޑިޝަލް ސާވިސް ކޮމިޝަން (ޖޭއެސްސީ) އިން އޭނާގެ މައްސަލައެއް ބަލަމުންދާ ކަން އަންގާފައި ނުވާ ކަމަށް ކްރިމިނަލް ކޯޓުގެ އިސް ގާޒީ އަހްމަދު ހައިލަމް ވިދާޅުވެއްޖެއެވެ.
ގާޒީ ހައިލަމް މިފަދައިން ވިދާޅުވީ، މިހާރު ކުރިއަށްދާ ކުރީގެ ރައީސް އަބްދުﷲ ޔާމީންގެ މައްޗަށް ކުރެވޭ މަނީ ލޯންޑަރިންގެ ދައުވާގެ ޝަރީއަތުގައި ރައީސް ޔާމީންގެ ވަކީލުންގެ ޓީމްގެ ފަރާތުން ގާޒީ ހައިލަމްގެ މައްސަލައެއް ޖޭއެސްސީން ބަލަމުންދާތީ މި ޝަރީއަތް ކުރިއަށް ގެންދާ ގާޒީ ބަދަލު ކުރުމަށް ބޭނުންވާ ކަމަށް ވަކީލަކު ވިދާޅުވުމާއި ގުޅިގެންނެވެ.
ގާޒީ ހައިލަމް މިފަދައިން ވިދާޅުވެފައި ވާއިރު، ޖޭއެސްސީން މިދިޔަ ބުދަ ދުވަހު ނެރުނު ނޫސް ބަޔާނުގައި، ގާޒީ ހައިލަމާ ބެހޭގޮތުން ހުށަހެޅިފައިވާ ޝަކުވާއެއް ބެލުމަށް ނިންމާ، އެ ޝަކުވާ ބެލުމަށްޓަކައި ތައުދީބީ ކޮމިޓީއަށް ފޮނުވުމަށް އެ ކޮމިޝަނުން ނިންމާފައިވާ ކަމަށް ބުނެފައިވެއެވެ.
ޖޭއެސްސީން ގާޒީ ހައިލަމްގެ ޝަކުވާއެއް ހުށަހެޅި، އެ ޝަކުވާ ބެލުމަށް ކޮމިޓީއަށް ފޮނުވާފައިވާ ކަމަށް ބުނެފައިވާއިރު، އެ ކޮމިޝަނުން ދަނީ ގިނަ ފަނޑިޔާރުންނާއި ގާޒީން އަދި މެޖިސްޓްރޭޓުންގެ ތަފާތު އެކި މައްސަލަތައް ބަލަމުންނެވެ.
