ނިމިދިޔަ ރިޔާސީ އިންތިހާބަށް ފަހު، ވީނުވީއެއް ނޭނގި އޭނާ ގެއްލުވާލަން މަސައްކަތް ކުރި ކަމަށް އިލެކްޝަންސް ކޮމިޝަންގެ ރައީސް އަހްމަދު ޝަރީފު ވިދާޅުވެއްޖެއެވެ.
މިއަދު ރައްޔިތުންގެ މަޖިލީހުގެ މިނިވަން މުއަސަސާތަކާ ބެހޭ ކޮމިޓީގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން ޝަރީފު ވިދާޅުވީ، އޭނާ މަގުމަތިން ދާއިރު ކާރު މަޑު ކުރުވާފައި ވީނުވީއެއް ނޭނގި ގެއްލުވާލަން މަސައްކަތް ކުރި ކަމުގެ ރިޕޯޓު ފުލުހުން އޭނާއަށް ދީފައިވާ ކަމަށެވެ.
ނިމިދިޔަ ރިޔާސީ އިންތިހާބު ދުވަސްވަރު، މެންބަރުންނަށާއި މުވައްޒިފުން މަސައްކަތް ކުރަން ޖެހުނީ ބިރުވެރިކަމެއްގެ ތެރޭގައި ކަމަށް އެ ކޮމިޝަނުން މީގެ ކުރިން ވަނީ ހާމަކޮށްފައެވެ. އެގޮތުން، މެންބަރުންނާއި މުވައްޒިފުން އެކި ގޮތްތުން ބިރު ދައްކައި އިންޒާރު ދީފައިވަނީ ރިޔާސީ އިންތިހާބުގެ ނަތީއްޖާ އޮޅުވާލި ކަމަށް ބުނެ ކަމަށް އީސީން ބުނެއެވެ.
ޝަރީފް މި މޭރުމުން ވާހަކަދައްކަވާފައިވާއިރު، މެންބަރުންނާއި، މުވައްޒިފުންނަށް ބިރުދައްކާ އިންޒާރު ދިނީ ކޮން ބައެއް ކަމެއް އަދި އެކަމާ ގުޅޭ މާބޮޑު ތަފްސީލެއް އޭނާ ހާމައެއް ނުކުރައްވައެވެ.
ނިމިދޔަ ރިޔާސީ އިންތިހާބުގައި އިލެކްޝަންސް ކޮމިޝަންގެ މުވައްޒިފަކު ރަހީނު ކުރި ކަމަށް ދެކެވުނު ވާހަކަތަކާ ގުޅިގެން މެންބަރަކު ކުރެއްވި ސުވާލަކަށް ޖަވާބު ދެއްވަމުން ޝަރީފު ވިދާޅުވީ އެއީ ތެދު ވާހަކައެއް ކަމަށާއި، އެ މުވައްޒިފުގެ އާއިލާގެ ފަރާތުން، އޭނާ ދަންވަރު ގަޑީގައި އިލެކްޝަންސް ކޮމިޝަންގެ މަސައްކަތަކަށް ގޮއްސަވީ ކަމަށް ބުނެ ގުޅި ކަމަށެވެ. އަދި އެ ގަޑީގައި އިލެކްޝަންސް ކޮމިޝަންގެ މަސައްކަތެއް ނޯންނާނެ ކަމަށް ބުނެ އެ މައްސަލަ ވަގުތުން ފުލުހުންނަށް ވެސް ހުށަހެޅި ކަމަށް ޝަރީފު ވިދާޅުވިއެވެ.
ރަހީނު ކުރަން މަސައްކަތް ކޮށްފައިވަނީ، އިލެކްޝަންސް ކޮމިޝަންގެ ރެޖިސްޓްރޭޝަންގައި މަސައްކަތް ކުރާ ވަގުތީ ސްޓާފެއް ކަމަށް ޝަރީފް ވިދާޅުވެފައިވާއިރު، އެ މުވައްޒިފު ރަހީނު ކުރީ އީސީ އިން އިންތިހާބުގެ ނަތީޖާ އަށް ނުފޫޒު ފޯރުވި ކަމަށް ބުނެ ބަޔާން ހޯދުމަށް ކަމަށް އެނގިފައިވާ ކަމަށް ވެސް އޭނާ ވިދާޅުވިއެވެ.
ރިޔާސީ އިންތިހާބުގެ ނަތީޖާ އޮޅުވާލުމަށް އިލެކްޝަންސް ކޮމިޝަނުން މަސައްކަތް ކުރި ކަމުގެ ތުހުމަތު އިދިކޮޅު ޕީޕީއެމުން ވަނީ ކޮށްފައެވެ. އަދި ދާދި ފަހުން ކުރީގެ ރައީސް އަބްދުﷲ ޔާމީން "ދަޕްރެސް" އަށް ދެއްވި އިންޓަވިއުއެއްގައި ރިޔާސީ ކެމްޕެއިންގެ ދަތުރުތަކުން ބޮޑު ތަރުހީބެއް ލިބުނު ކަމަށާއި އެހެން ކަމުން ރިޔާސީ އިންތިހާބުގެ ނަތީޖާ ގަބޫލުފުޅު ކުރައްވަން އަދިވެސް ދަތި ކަމަށް ވަނީ ވިދާޅުވެފައެވެ. ރައީސް ޔާމީން މި މޭރުމުން ވާހަކަ ދެއްކެވުމާ ގުޅިގެން އީސީ ޝަރީފް ވަނީ އެ މަނިކުފާނަށް ހޫނު ބަހުގެ ހަމަލާތައް ފޮނުއްވާފައެވެ.
