އެކްސިޑެންޓްތައް މަދުކުރެވޭނީ އެންމެންގެ އެއްބާރުލުމާ އެކު ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ދަރިވަރުންނަށް އަމާޒުކޮށްގެން މިއަދު ފެށި "ރޯޑް ސޭފްޓީ ކެމްޕޭން" އިފްތިތާހް ކުރެއްވުމަށް ހިރިޔާ ސްކޫލްގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ، ތަފާސް ހިސާބުތަކުން ދައްކާ ގޮތުން ރާއްޖޭގައި ހިނގާ އެކްސިޑެންޓްތަކުގެ އަދަދު ކަންބޮޑުވާ މިންވަރަށް އިތުރުވެގެން ދިޔުމަކީ މުޅި މުޖުތަމައަށް ކުރިމަތިވެފައިވާ ބޮޑު ގޮންޖެހުމެއްކަމަށެވެ. އަދި މި ގޮންޖެހުންތަކުން އަރައިގަނެ ސަރުކާރުން ފަށާފައިވާ މި ޕްރޮގްރާމް ކާމިޔާބުކުރެވެން އޮތީ މަގުމަތީގެ ކަންކަމަށް ހާއްސަ ސަމާލުކަމެއް ދީ، އެންމެން އެއްބާރުލުންދީގެން ކަމުގައި އެމަނިކުފާނު ވިދާޅުވިއެވެ.
"ރޯޑް ސޭފްޓީ ކެމްޕޭން" އަކީ ރާއްޖޭގެ ސްކޫލްތަކުގެ ދަރިވަރުން މަގުމަތީގެ ސަލާމަތާއި ރައްކާތެރިކަމަށް ހޭލުންތެރިކުރުވައި މަގުމަތީގެ ގަވާއިދުތަކަށް އަހުވެރިކުރުވުމުގެ މަގުސަދުގައި މިނިސްޓްރީ އޮފް އެޑިއުކޭޝަންގެ ފަރާތުން ކުރިއަށްގެންދާ ޕްރޮގްރާމެކެވެ. މި ޕްރޮގްރާމް އިފްތިތާހުކޮށްދެއްވުމަށް ބޭއްވި ރަސްމިއްޔާތުގައި ނައިބު ރައީސް ވަނީ، ދަރިވަރުންނަށް ފިލާވަޅުތަކެއް ނަގައިދެވޭނީ ކްލާސްރޫމްގެ ތެރެއިން އެކަނި ނޫން ކަމަށާއި މިއަދު ހިނގަމުން މިދާ ހަރަކާތަކީ ވެސް ކްލާސްރޫމުން ބޭރުގައި ދަރިވަރުންނަށް ދަސްކޮށްދެވޭ ވަރަށް މުހިންމު ފިލާވަޅެއް ކަމުގައި ފާހަގަކުރައްވާފައެވެ.
މިމޭރުމުން ވާހަކަފުޅު ކުރިއަށް ގެންދަވަމުން ނައިބު ރައީސް ވަނީ ރަނގަޅު ޖީލެއް ބިނާކޮށް މުޖުތަމައު އަމާން ތަނަކަށް ހެދުމަށްޓަކައި ރާއްޖޭގެ ސްކޫލްތަކުގައި މަސައްކަތްކުރާ މުދައްރިސުން ކުރާ މަސައްކަތް ފާހަގަކުރައްވައި، ދަރިވަރުންނާއި ރައްޔިތުންގެ ނަމުގައި މުދައްރިސުންނަށް ޝުކުރު އަދާކުރައްވާފައެވެ. މީގެ އިތުރުން ނައިބު ރައީސް ވަނީ މަގުމަތީގައި ހިނގާބިނގާވެ އުޅުމާއި، މަގުމަތީގައި ދުއްވާއެއްޗެހި ދުއްވުމުގައި އެކަކު އަނެކަކަށް ހާއްސަ ސަމާލުކަމެއް ދިނުމަށް އިލްތިމާސް ކުރައްވާފައެވެ.
ނޭޝަނަލް ރޯޑް ސޭފްޓީ އެކްޝަން ޕްލޭނެއް އެކުލަވާލައި ސަރުކާރުން ކުރިއަށް ގެންދާ ރޯޑް ސޭފްޓީ ކެމްޕޭނަކީ މަގުމަތީގެ ސަލާމަތާއި ރައްކާތެރިކަން އިތުރުކުރުމަށްޓަކައި މަގުމަތީގެ ގަވާއިދުތަކަށް ރައްޔިތުން އަޙުލުވެރިކުރުވުމުގެ ގޮތުން ނޭޝަނަލް ރޯޑް ސޭފްޓީ އެކްޝަން ޕްލޭނާ އެއްގޮތަށް ހިންގާ ދިގުމުއްދަތުގެ ކެމްޕޭނެކެވެ.
