ބިދޭސީން ރާއްޖެ ގެނައުމަށް ކުންފުނިތަކުން ޑިޕޮސިޓްގެ ގޮތުގައި ބަހައްޓާފައިވާ ފައިސާ ދޫކުރަން ފަށާނެކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން ބުނެފިއެވެ.
އިކޮނޮމިކް މިނިސްޓްރީގެ ލޭބާ ޑިޕާޓްމަންޓްގެ އެސިސްޓަންޓް ޑިރެކްޓާ މުހައްމަދު ފަޔާޒް އާދަމް "ދަ ޕްރެސް" އަށް މައުލޫމާތު ދެއްވަމުން ވިދާޅުވީ، ބިދޭސީންގެ ޑިޕޮސިޓް ފައިސާ އަލުން ދޫކުރަން ފަށާއިރު މިހާތަނަށް ފައިސާ ހޯދަން ލާފައިވާ 15،000 ފޯމް ކެންސަލް ވާނެ ކަމަށެވެ. މި ފައިސާ އަލުން ދޫކުރަނީ އިކޮނޮމިކް މިނިސްޓްރީގެ ލޭބަ ޑިޕާޓްމަންޓުގެ އެކްސްޕެޓް އޮންލައިން ސިސްޓަމް މެދުވެރިކޮށް ހުށަހެޅުމުންނެވެ.
ބިދޭސީން ގެންނަން ބަހައްޓާ ޑިޕޮސިޓް ފައިސާ ދޫކުރުން މެދުކަނޑާލާފައި ވަނީ މިދިޔަ މާޗް މަހު 24 ވަނަ ދުވަހު، އިމިގްރޭޝަންގެ ބައެއް ހިދުމަތްތައް އިކޮނޮމިކް މިނިސްޓްރީގެ ދަށަށް ބަދަލު ކުރުމުންނެވެ. މި ފައިސާ ދޫކުރަނީ ބިދޭސީ މީހާ ރާއްޖޭން ފުރުމުން ނޫނީ ވަޒީފާ ދިން ފަރާތް ބަދަލުވެ އެޕްލޮއިމަންޓް އެޕްރޫވަލް ކެންސަލް ކުރުމުންނެވެ.
ފަޔާޒު ވިދާޅުވީ، މިނިސްޓްރީގެ ލޭބަ ޑިޕާޓްމަންޓުގެ އެކްސްޕެޓް އޮންލައިން ސިސްޓަމްގެ ސަބަބުން ހިދުމަތް ހޯދާ ފަރާތްތަކަށް ފަސޭހަވެ ހިދުމަތް ދޭން ނަގާ ވަގުތުވެސް އަވަސް ވެގެންދާނެ ކަމަށެވެ. ފަޔާޒު ވިދާޅުވީ، ކުރިން އޮންނަ ގޮތުން ފޯމްތައް ހިފައިގެން ކައުންޓަރަށް ގޮސް ވަކިން ފޯމު ލާން ޖެހޭ ކަމަށާއި، ފޯމާއި އެކު ހުށަހަންޖެހޭ ޑޮކިއުމެންޓްތައް ވެސް އެހާ ގިނަ ކަމަށެވެ. ނަމަވެސް މިހާރު ހުށަހަޅަން ޖެހޭނީ ހަމައެކަނި އެމްޕްލޯޔާގެ ބޭންކް ވެރިފިކޭޝަން، އަދި ކުންފުންޏެއް ނަމަ ކުންފުނީގެ ޗެކުގެ ސްކޭން ކޮޕީއަކާއި، ބޭންކް ސްޓޭޓްމަންޓު ނޫނީ ބޭންކުން ދޭ ލިއުމެއް ކަމަށް ފަޔާޒް ވިދާޅުވިއެވެ. މީގެ އިތުރުން، މި ސިސްޓަމްގެ ސަބަބުން ކަސްޓަމަރަށް ފައިސާ ޖަމާވިކަން ނޭނގިގެން ދިމާވާ ދަތިތަކަށް ވެސް ހައްލު ލިބިގެންދާނެ ކަމަށް ވެސް އޭނާ ވިދާޅުވިއެވެ.
އިކޮނޮމިކް މިނިސްޓްރީން މީގެ ކުރިން ހާމަކޮށްފައިވާ ގޮތުގައި، ޖުމްލަ 250،000 ވުރެ ގިނަ ބިދޭސީން ރާއްޖޭގައި އުޅެއެވެ. އަދި އޭގެ ތެރޭގައި ގަވާއިދަށް އުޅޭ ބިދޭސީންނާއި ގަވާއިދާ ހިލާފަށް އުޅޭ ބިދޭސީން ހިމެނޭ ކަމަށްވެސް އެ މިނިސްޓްރީން ވަނީ ބުނެފައެވެ.
