އދ. ގެ އިންސާނީ ހައްގުތަކާބެހޭ މަޖިލީހުގައި ރާއްޖެއިން 3 ގަރާރެއް ކޯ ސްޕޮންސާ ކޮށްފިއެވެ.
ރާއްޖެއިން ކޯސްޕޮންސާ ކުރި 3 ގަރާރަކީ މޫސުމަށް އަންނަ ބަދަލުތަކާ ގުޅިގެން ހާއްސައެހީ އަށް ބޭނުންވާ ފަރާތްތަކުގެ އިންސާނީ ހައްގުތައް ހޯދައިދިނުމަށް ހާއްސަ ސަމާލުކަމެއް ދިމަށް ހުށަހެޅި ގަރާރާއި، ޒުވާނުންގެ ހައްގުތައް ހޯދައިދިނުމަށް ހުށަހެޅުނު ގަރާރުގެ އިތުރުން، ސީރިއާގައި ދިރިއުޅެމުންދާ ރައްޔިތުންނަށް އިންސާނީ ހައްގުތައް ހޯދައިދިނުމަށް ފާސްކުރި ގަރާރެވެ.
ރާއްޖެއިން މި 3 ގަރާރު ކޯ ސްޕޮންސާ ކޮށްފައި ވަނީ އދ. ގެ އިންސާނީ ހައްގުތަކާ ބެހޭ މަޖްލީހުގައި މިދިޔަ މަހުގެ 41 ވަނަ ދުވަހުން ފެށިގެން މި އިއްޔެގެ ނިޔަލަށް ބޭއްވި 41 ވަނަ ސެޝަނުގައެެވެ. މި ސެޝަން ބާއްވައިފައި ވަނީ ސްވިޓްޒަލޭންޑުގެ ޖެނީވާގައި ހުންނަ އދ. ގެ މަރުކަޒުގައެވެ.
މި ސެޝަންގެ އެކިއެކި މަޝްވަރާތަކުގެ ތެރޭގައި ދިވެހިރާއްޖޭގެ ފަރާތުން ބައިވެރިވި ވަފުދުގެ ފަރާތުން 7 ސްޓޭޓްމަންޓްއެއް ވަނީ ދީފައެވެ. އޭގެތެރޭގައި ސީރިއާ، މިޔަންމާ އަދި ފަލަސްތީންގައި ހިނގަނމުންދާ އިންސާނީ ޙައްޤުތަކާއި ޚިލާފް ޢަމަލުތައް ކުށްވެރިކޮށް ވާހަކަ ދެކެވުނެވެ.މީގެ އިތުރުން، އަންހެނުންގެ ޙައްޤުތަކާއި، މޫސުމަށް އަންނަބަދަލުތަކުގެ އިތުރުން ޖަޖުންނާއި ލޯޔަރުންގެ މިނިވަންކަން ދެމެހެއްޓުމާއި، އަދި ހިޔާލުފާޅުކުރުމުގެ މިނިވަންކަމާ، ސުލްހަވެރި ކަމާއެކު އެއްވެ އުޅުމުގެ މިނިވަންކަމާއި މަދަނީ ޖަމިއްޔާ، ޖަމާޢަތްތައް އުފައްދާ އެކަންކަމުގައި ހަރަކާތްތެރިވުމުގެ މިނިވަންކަމަށް ރާއްޖޭގެ ފަރާތުން ތާއީދުކޮށް ވާހަކަދެކެވުނެވެ. ދިވެހިރާއްޖޭގެ ވަފުދުގެ ފަރާތުން މިސެޝަންގައި ފާސްކުރެވުނު 25 ޤަރާރުގެ މަޝްވަރާ ބައްދަލުވުންތަކުގައި ބައިވެރިވެ ވަނީ ހިޔާލު ހުށަހަޅާފައެވެ.
ހިއުމަން ރައިޓްސް ކައުންސިލްގެ 41 ވަނަ ސެޝަންގައި ދިވެހިރާއްޖޭގެ ފަރާތުން ބައިވެރިވި ވަފުދުގައި ހިމެނެނީ، ދިވެހިރާއްޖޭއިން ޖެނީވާގައި ހުންނަ އދ.ގެ އޮފީހަށް ކަނޑައަޅާފައި ހުންނަ ދާއިމީ މަންދޫބު، ޑރ. ހާލާ ޙަމީދާއި، އެ އޮފީހުގެ ޑެޕިއުޓީ ޕާރމަނަންޓް ރެޕްރެސެންޓޭޓިވް، ޙަވްލާ އަޙްމަދު ދީދީއެވެ.
