ދިވެހިރާއްޖޭގެ ވަކީލުންގެ ކަންކަން ބަލަހައްޓާ ބެލެނިވެރިފަރާތް ބާ ކައުންސިލްގެ އެގްޒެކްޓިވް ކޮމިޓީއަށް މެންބަރުން އިންތިހާބު ކުރުމަށް ކުޑަތަން ވެފައި ވަނިކޮށް ކައުންސިލަށް ވާދަކުރައްވާ ވަކީލެއްގެ ކެންޑިޑަސީ އިލެކްޝަންސް ކޮމިޝަން (އީސީ) އިން ބާތިލް ކޮށްފިއެވެ.
އީސީން ބުނީ މާދަމާ ބޭއްވުމަށް ހަމަޖެހިފައިވާ ދިވެހިރާއްޖޭގެ ބާ ކައުންސިލުގެ އެގްޒެކެޓިވް ކޮމިޓީގެ އިންތިހާބުގައި، އެކޮމިޓީގެ މެންބަރެއްގެ ގޮތުގައި ކުރިމަތިލުމަށް، މިދިޔަ ބުރާސްފަތި ދުވަހު ފޯމް ހުށަހެޅުއްވި ދަފްތަރު ނަންބަރު 535، އަލީ ނަސީރު ގާސިމް އެކޮމިޝަނަށް ހުށަހެޅި ހުށަހެޅުން ކޮމިޝަނުން ގަބޫލުކޮށްފައި ވީނަމަވެސް، ހުށަހެޅި ލިޔުންތައް އިތުރަށް ބެލި ބެލުމުން އަލީ ނަސީރު ގާސިމަކީ ބާ ކައުންސިލުގެ އެގްޒެކެޓިވް ކޮމިޓީގެ އިންތިޚާބުގައި މެންބަރު ކަމަށް ކުރިމަތިލުމަށް ޝަރުތު ހަމަވާ މީހެއް ނޫންކަމަށެވެ.
އީސީން ބުނީ މިކަމާ ގުޅިގެން، ބާ ކައުންސިލް އިންތިހާބުގައި ވާދަ ކުރާ އެހެން ކެންޑިޑޭޓުންގެ ކެންޑިޑޭޓް ނަންބަރުތަކަށް ބަދަލު ނާންނާނެކަމަށެވެ.
އީސީއިން މީގެ ކުރިން އިއުލާންކުރި ގޮތުގައި 23 ފަރާތަކުން ބާ ކައުންސިލްގެ އިންތިހާބުގައި ވާދަކުރެއެވެ. އެހެން ނަމަވެސް އެއް ބޭފުޅެއްގެ ކެންޑިޑެންސީ މިހާރު ބާތިލްކޮށްފައި ވުމުން ދެން އެ އިންތިހާބުގައި ވާދަކުރައްވާނީ 22 ބޭފުޅުނެވެ.
ބާ ކައުންސިލަށް ވަކީލުން ކުރިމަތިލެއްވި ގޮތަށް ބަލާއިރު، ރައީސް ކަމަށް ދެ ބޭފުޅަކު ވާދަކުރައްވާ އިރު، ނައިބު ރައީސް ކަމަށް ދެ ބޭފުޅަކު ވާދަކުރައްވައެވެ. އަދި މެންބަރު ކަމަށް ވާދަކުރައްވަނީ 18 ބޭފުޅެކެވެ.
ރައީސް ކަމަށް ވާދަކުރައްވަނީ ކުރީގެ ބަންޑާރަ ނައިބު ހުސްނުއްސުއޫދާއި ގާނޫނީ ވަކީލް މައުމޫން ހަމީދެވެ. ނައިބު ރައީސް ކަމަށް ވާދަކުރައްވަނީ ކުރީގެ އޭޖީ އަބްދުﷲ މުއިއްޒު އަދި ސިވިލް ކޯޓުގެ ކުރީގެ ގާޒީ މުހައްމަދު ހަލީމެވެ.
މި އިންތިހާބު މާލެ އާއި އައްޑޫގައި ވޯޓްފޮށި ބަހައްޓައިގެން ކުރިއަށް ގެންދަން ނިންމާފައިވާ އިރު، 1،600 ގާނޫނީ ވަކީލުން މި އިންތިހާބުގައި ވޯޓުލާނެއެވެ.
