ކ. ދިއްފުށީ އާއިލާއެއްގެ ތެރޭގައި ހިނގި ހަމަނުޖެހުމެއްގައި ދަރިއަކަށް ވަޅިން ބިރުދެއްކި ބައްޕައަކު ހައްޔަރުކޮށްފިއެވެ.
ކ ދިއްފުށީގެ އާއިލާއެއްގެ ތެރޭގައި ހިނގި ހަމަނުޖެހުމެއްގައި ބައްޕައަކު ދަރިއަކަށް ވަޅިން ބިރުދައްކައި އަދި އާއިލާގެ މީހުންނަށް ހަމަލާ ދިނުމުގެ ތުހުމަތުގައި ރޭ 10:36 ހާއިރު މީހަކު ހައްޔަރު ކޮށްފައި ވާކަމަށް ފުލުހުން ވަނީ ބުނެފައެވެ. މި މައްސަލައާ ގުޅިގެން ހަމަލާދިން ކަމަށް ބުނެފައި ވީނަމަވެސް އެ އާއިލާގެ މީހުންނަށް ހަމަނުޖެހުމުގެ ތެރޭގައި ލިބުނު ގެއްލުމުގެ ނުވަތަ އަނިޔާއެއްގެ މައުލޫމާތެއް ފުލުހުން މިހާތަނަަށް ހާމަކޮށްފައެއް ނުވެއެވެ.
"ދަ ޕްރެސް" އަށް މައުލޫމާތު ދެމުން ޖެންޑާ މިނިސްޓްރީ ބުނީ ފުލުހުންނާ ގުޅިގެން އެ މައްސަލަ ބަލަމުން ދާކަމަށެވެ.
ސޯޝަލް މީޑިއާގައި ދަނީ ކުޑަ ކުއްޖަކަށް މީހަކު ވަޅިއެއް ހިފައިގެން ބިރުދައްކަމުންދާ މަންޒަރު ފެންނަ ފޮޓޯއެއް އާންމު ވަމުންނެވެ. އެހެން ނަމަވެސް ޖެންޑާ މިނިސްޓްރީ އިންވެސް އަދި ފުލުހުންވެސް މިކަމާ ގުޅޭ ތަފްސީލީ މައުލޫމާތު މިހާތަނަށް ހާމަކޮށްފައެއް ނުވެއެވެ. އަދި ކުޑަކުދިން ހިމެނޭ މައްސަލައެއް ކަމުން މި މައްސަލައިގައި އިތުރު ކޮމެންޓެއް އަދި ދެވެން ނެތްކަމަށް ޖެންޑާ މިނިސްރީން ބުނެއެވެ.
ފަހަކަށް އައިސް ކުޑަކުދިންނަށް އެކި ކަހަލަ އަނިޔާތައް ކުރުމުގެ މައްސަލަތައް ދަނީ އިތުރުވަމުންނެވެ. ކުޑަކުދިންނާއި ގުޅޭގޮތުން ޖެންޑާ މިނިސްޓްރީއަށް ހުށަހެޅިފައިވާ މައްސަލަތަކުގެ ތެރޭގައިވެސް އެކުދިންނަށް އެކިކަހަލަ އަނިޔާ ކޮށްގެން ހުށަހަޅައިފައި ވާ މައްސަލަތައް ގިނަ ކަމަށް ޖެންޑާ މިނިސްޓްރީ އިން ފާހަގަ ކުރެއެވެ.
