މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ އެކްސަސައިޒް ރަންނަމާރި ހަންޓް 2019 - 2 ލ. އަތޮޅުގައި ކުރިއަށް ގެންދިއުމަށް ހަމަޖެހިފައިވާ ކަމަށް އެމްއެންޑީއެފުން ބުނެފިއެވެ.
އެންއެންޑީއެފުން ބުނީ، އެކްސަސައިޒް ރަންނަމާރި ހަންޓް 2019 ސިލްސިލާގެ ދެވަނަ ތަމްރީނު ކުރިއަށް ގެންދިއުމަށް ހަމަޖެހިފައިވަނީ މިއަދުން ފެށިގެން އަންނަ ބުރާސްފަތި ދުވަހުގެ ނިޔަލަށް ކަމަށެވެ. މި ތަމްރީނުގައި ހަރަކާތްތެރި ވާއިރު، ސިމިއުލޭޝަންގެ ގޮތުގައި ސިފައިން ބޭނުންކުރާ ހަތިޔާރާއި ގޮވާތަކެތި އެއްގަމާއި ކަނޑުގައި ބޭނުން ކުރުމަށް ހަމަޖެހިފައިވާ ކަމަށް ވެސް އެމްއެންޑީއެފުން ބުނެއެވެ.
މި ހަފްތާގައި ލ އަތޮޅުގައި މި ތަމްރީނު ބޭއްވުމަށް ހަމަޖެހިފައި ވާއިރު، މި ހަރަކާތް ކުރިއަށް ގެންދާނީ އެ އަތޮޅުގެ ހަތަރު ރަށެއްގައި ކަމަށް އެމްއެންޑީއެފުން ބުނެއެވެ. އެ ރަށްތަކުގެ ތެރޭގައި، ލ. ގަން، ލ. ފޮނަދޫ އަދި ލ. ކައްދޫގެ އިތުރުން ލ. ކަޅައިދޫ ހިމެނެއެވެ.
އެގޮތުން އެމްއެންޑީއެފުން ވަނީ މިދިޔަ ޖޫން މަހު 23 ވަނަ ދުވަހުން ފެށިގެން 28 ވަނަ ދުވަހުގެ ނިޔަލަށް ރަންނަމާރި ހަންޓް 2019 ބާއްވާފައެވެ. ޖޫން މަހު ބޭއްވި މި ތަމްރީނު ކުރިއަށް ގެންދިޔައީ މާލެ އޭރިއާގެ މާލެ، ހުޅުމާލެ، ވިލިމާލެ، ހުޅުލެ އަދި ތިލަފުށީގައެވެ. އަދި މާލެ އޭރިއާގެ އިތުރުން ނޮދަން އޭރިިއާގެ ރ އަތޮޅާއި ޅ އަތޮޅުގައި ވެސް މި ހަރަކާތް ވަނީ ކުރިއަށް ގެންގޮސްފައެވެ.
މީގެ އިތުރުން، އެމްއެންޑީއެފުން ވަނީ މޯލްޑިވްސް ޕޮލިސް ސާވިސް ގުޅިގެން މިދިޔަ މޭ މަހު ވެސް ތިން ދުވަހުގެ ތަމްރީނުތަކެއް ކުރިއަށް ގެންގޮސްފައެވެ. އެމްއެންޑީއެފުން މި ތަމްރީނުތަކުގެ ފަރިތަކުރުންތައް ކުރިއަށް ގެންގޮސްފައި ވަނީ މާލެ ސިޓީގެ އިތުރުން ރާއްޖޭގެ އަތޮޅުތަކުގެ އެއްގަމާއި ކަނޑުގެ ސަރަހައްދުގައެވެ. މި ތަމްރީނު ތަކުގައި އެމްއެންޑީއެފާއި ފުލުހުން ގުޅިގެން ވަނީ އެއްގަމާއި ކަނޑުގެ އުޅަނދުތައް ޗެކްކޮށް، ހަތިޔާރާއި އެކު އާންމުންގެ ތެރޭގައި ހަރަކާތްތެރި ވެފައެވެ.
އެމްއެންޑީއެފުން މިދިޔަ މަހު ގެންދިޔަ ތަމްރީނުތަކުގައި ހަތިޔާރާ އެކު އާންމުންގެ ތެރޭގައި ހަރަކާތްތެރި ވުމާ ގުޅިގެން، ރާއްޖެއަށް ޓެރަރިޒަމްގެ ހަމަލާއެއް އަތުވެދާނެ ކަމަށް ބުނެ ބައެއް މީހުން ވަނީ ވާހަކަ ދައްކާފައެވެ.
