މިދިޔަ މަހުގެ 25 ވަނަ ދުވަހު މާލޭގެ މަގުމަތިން އެއްވެސް މީހަކަށް ޖިންސީ ފުރައްސާކޮށްފައިވާނަމަ އެކަން ހިއްސާކޮށްދިނުމަށް ފުލުހުން އެދެފިއެވެ.
ފުލުހުން އަންނަނީ ޖޫން 25 ގައި މާލޭ މަގުމަތިން ހިނގާފައި ދިޔަ އަންހެނަކަށް ޖިންސީ ފުރައްސާރަކުރި މައްސަލައެއް ބަލަމުންނެވެ.
މި މައްސަލައާ ގުޅޭގޮތުން ފުލުހުން ބުނީ މިދިޔަ މަހުގެ 25 ވަނަ ދުވަހުގެ ހެނދުނުގެ ވަގުތެއްގައި މާލޭ މަގުމަތިން ހިނގާފައި ދިޔަ އަންހެނެއްގެ ގަޔަށް، ސައިކަލެއްގައި އައި ބަޔަކު އަތްލައި ޖިންސީ ފުރައްސާރަ ކޮށްފައިވާކަމަށް ބުނެ ހުށަހެޅުނު މައްސަލައަކާ ގުޅިގެން، ފުލުހުން ބެލިބެލުމުން ހަމަ އެދުވަހު މާލޭގެ އިތުރު ދެ ސަރަހައްދަކުން ހިނގާފައި ދިޔަ ދެ އަންހެނަކަށް ޖިންސީ ފުރައްސާރަ ކޮށްފައިވާކަން ފާހަގަކުރެވިފައިވާ ކަމަށެވެ.
އަދި އެ ދުވަހު މާލޭގެ މަގުމަތިން އެއްވެސް މީހަކަށް ޖިންސީ ފުރައްސާރައެއް ކުރިމަތިވެފައިވާނަމަ، ފުލުހުންގެ ޖެނެރަލް އިންވެސްޓިގޭޝަން ޑިޕާޓްމަންޓްގެ ނަންބަރަށް ގުޅާ އެކަމުގެ މައުލޫމާތު ހިއްސާ ކުރުމަށް ފުލުހުން ވަނީ އެދިފައެވެ.
ފަހަކަށް އައިސް މާލޭ މަގުމަތީގައި އަންހެނުންނަށް ޖިންސީ ފުރައްސާރަ ކުރުމާއި، ބަދުއަހުލާގީ އަމަލު ހިންގުމަށް ދައުވަތުދީ ފުރައްސާރަ ކުރާކަމުގެ ޝަކުވާތައް އަންނަނީ އިތުރުވަމުންނެވެ. ދާދި ފަހުން ފުލުހުން ވަނީ މާލޭގެ މަގުމަތިން އަންހެނަކަށް ފުރައްސާރަކުރި މެދު އުމުރުގެ މީހެއް ވެސް ހައްޔަރުކޮށްފައެވެ.
