އެންޓިކޮރަޕްޝަން ކޮމިޝަނަށް ބޭނުންވާ ހުރިހާ ލިޔެކިޔުމެއް ފޯރުކޮށް ދީފައިވާ އިރު، ބައެއް ލިޔެކިޔުން ނުލިބޭކަމަށް އެ ކޮމިޝަނުން ބުނަމުން ދަނީ، ކުންފުނީގައި ހުރި މައްސަލަތައް ނުބަލައި ފައިލް ކުރުމަށް ކަަމަށް ޕަބްލިކް ސާވިސް މީޑިއާ (ޕީއެސްއެމް) އިން ބުނެފިއެވެ.
ޕީއެސްއެމުން މިހެން ބުނެފައިވަނީ އޭސީސީގެ މެންބަރުން މަޖިލީހުގެ ކޮމިޓީގައި އެ ކުންފުނިން ހުށަހަޅާފައިވާ މައްސަލަތަކާ ގުޅުންހުރި ބައެއް ލިޔެކިޔުންތައް ފެންނަން ނެތް ކަމަށާއި، އަދި ލިބިފައި ނެތްކަމަށް ބުނެ، އެ ކަމުގެ ސަބަބުން ތަހުގީގަށް ހުރަސް އެޅެމުން ދާކަމަށް ބުނުމާއި ގުޅިގެންނެވެ.
ޕީއެސްއެމުން ބުނެފައިވަނީ އޭސީސީން މަޖިލީހުގެ ކޮމިޓީގައި އެގޮތަށް ބުނުމަކީ ކުންފުނިން ހުށަހެޅި މައްސަލަތައް ނުބަލައި ފައިލްކުރުމުގެ ނިޔަތުގައި އެކޮމިޝަނުން ކުރި ކަމެއް ކަމަށް ގަބޫލުކުރުމުގެ ފުރުސަތު އެބައޮތް ކަމަށެވެ.
ޕީއެސްއެމުން ބުނީ މައްސަލަތައް ހިނގާފައިވާ ގޮތް ބެލުމުގައި ގިނަ މަޝްރޫއުތައް ގާނޫނާއި ގަވާއިދާ ހިލާފަށް ވަކި ބަޔަކަށް ނާޖާއިޒު ފާއިދާ ލިބޭގޮތަށް އަދި ކޮރަޕްޝަނަށް މަގުފަހިވާ ގޮތަށް ކުރިއަށް ގެންދިއުމަށް ކުންފުނީގެ ކުރީގެ ބޯޑާއި މެނޭޖްމަންޓުން ނިންމާފައިވާ ނިންމުން އެންމެ ރަނގަޅު ކަމަށް އޭސީސީން ލަފާދީފައިވާ ކަމަށެވެ.
އަދި މިހާރު އޭސީސީ ހިންގުމާ ހަވާލުވެތިބި ވެރިންގެ މަސްލަހަތު ފުށޫ ނާރާނެ ގޮތަކަށް އިންސާފުގެ މަގުން އެއްކިބާ ނުވެ ކުންފުނިން ހުށަހަޅާފައިވާ މައްސަލަތައް ބެލިދާނެކަމަށް ގަބޫލު ނުކުރާކަމަށް ޕީއެސްއެމުން ބުނެފައިވެއެވެ.
ޕީއެސްއެމްގެ ބަޔާނުގައި ބުނީ، ކުންފުނީގެ ހިންގުން އާ މެނޭޖްމަންޓުން ހަވާލުވި އިރު، ކުރީގެ ސަރުކާރުގައި އޮތް މެނޭޖްމަންޓުން ކޮރަޕްޝަނަށް މަގުފަހިވާ ގޮތަށް ހިނގާފައިވާ 20 އަށް ވުރެ ގިނަ މައްސަލަ ތަހުގީގު ކުރުމަށް އޭސީސީއަށް ޕީއެސްއެމްގެ ފަރާތުން އިސްވެ ހުށަހެޅި ކަމަށެވެ. އެ މައްސަލަތައް ހުށަހެޅީ ޕީއެސްއެމްގެ ބޯޑުން ފާސްކޮށް މީގެ ފަސް މަސް ކުރިން ކަމަށް ޕީއެސްއެމްގެ ބަޔާނުގައި ބުނެފައިވެއެވެ.
ޕީއެސްއެމުން ބުނީ ތަހުގީގު ތަކުގައި ޕީއެސްއެމްއަށް ދެވެން އޮތް ހުރިހާ އެއްބާރުލުމެއް އޭސީސީއަށް ދީފައިވާނެ ކަމަށެވެ.
ވަރަށް ދެރަ ތިތާނގެ ލީގަލް ހެޑް މާކެޓިންގ ސްޓާފަކަށް ޖިންސީގޯނާ ކުރިކަންތަކަށް އަޅާނުލައްވާތީވެ