އެމްޕްލޯއިމަންޓް އެޕްރޫވަލް އާ ކުރުމާއި، އާ އެމްޕްލޯއިމަންޓް އެޕްރޫވަލް ދިނުމާއި ކެންސަލޭޝަން ތިން ދުވަސްތެރޭގައި ނިންމޭނެ އިންތިޒާމް ހަމަޖައްސާނެ ކަމަށް މިނިސްޓާ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއިލް ވިދާޅުވެއްޖެއެވެ.
މިނިސްޓަރު ފައްޔާޒް ވިދާޅުވީ، އެކަން ކުރުމަށް އިތުރު މުވައްޒަފުން ހޯއްދަވައިގެން، ޓްރެއިން ކުރައްވައިގެން، އެކަން ކުރެއްވުމުގެ ވިސްނުމެއް ގެންގުޅުއްވާ ކަމަށާއި، އަދި އެ ހިސާބަށް ނުދެވުނަސް އެ އިންތިޒާމް ހަމަޖެއްސުމަކީ އަމާޒު ކަމަށް މިނިސްޓަރު ވިދާޅުވިއެވެ.
މިނިސްޓަރު ފައްޔާޒު ވިދާޅުވީ، ބިދޭސީންގެ ކަންތައް އޮތީ ވަރަށް ދަތި، އުނދަގޫ ކޮށް ކަމަށާއި، އިކޮނޮމިކް މިނިސްޓްރީއާ ހަވާލުވީވެސް ވަރަށް ބޮޑަށް މަސްހުނިވެ، ވަރަށް ބޮޑެތި ކޮރަޕްޝަން ތަކެއް އެކުލެވިފައި ވަނިކޮށް ކަމަށެވެ. އެގޮތުން، މިހާރު އަނދާޒާކޮށް ބުނާއިރު ޖުމްލަ 250،000 ވުރެ ގިނަ ބިދޭސީން ރާއްޖޭގައި އުޅޭ ކަމަށާއި، އޭގެ ތެރޭގައި ގަވާއިދަށް އުޅޭ ބިދޭސީންނާއި ނުގަވާއިދަށް އުޅޭ ބިދޭސީން ހިމެނޭ ކަމަށް މިނިސްޓަރު ވިދާޅުވިއެވެ.
ނޫސްވެރިންނަށް މައުލޫމާތު ދެއްވަމުން މިނިސްޓަރު ފައްޔާޒު ވިދާޅުވީ، ރާއްޖޭގެ އިގްތިސޯދު މިހާރު މި ހިންގާ ދުވެލީގައި ހިންގާ ނަމަ، އިތުރު މީހުން ބޭނުންވާ ކަމަށާއި، ރާއްޖޭގައި ވަޒީފާ އަދާކުރެވޭ ވަރުގެ ހުރިހާ ރައްޔިތުން ވަޒީފާއަށް ނިކުތް ކަމުގައި ވިޔަސް އިގްތިސޯދީ ދުވެލި މިގޮތުގައި ކުރިއަށް ގެންދިއުމަށްޓަކައި އެއަށްވުރެ މާގިނަ މީހުން ބޭނުންވާ ކަމަށެވެ. އަދި ބިދޭސީން ކުރިއަށް އޮތްތަނުގައި ވެސް ރާއްޖޭގައި މަސައްކަތް ކުރާނެ ކަމަށާ، ނުގަވައިދުން އުޅޭ ކަންތައްތައް ހުއްޓުވުމަށްޓަކައި އިކޮނޮމިކް މިނިސްޓްރީން ޕްރޮގްރާމްތަކެއް ފަށާފައިވާނެ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ، މި ހަތް މަސްދުވަސް ސަރުކާރުން މަސައްކަތް ކުރަމުން ދިޔައީ ވަރަށް ބޮޑަށް އޮޅުން އަރާފައި ހުރި، އުނދަގޫ ކަމެއްގައި ސިޔާސަތުތަކެއް ބަދަލުކުރުމަށްޓަކައި ކަމަށެވެ. އެގޮތުން، ކުރީންސުރެ ހުރި ބައިވަރު އުނދަގޫތަކެއް ރަނގަޅު ކުރުމަށް ބޭނުންވާ ރިސޯސްތައް ފުރިހަމައަށް ނެތް ކަމަށާއި، ބޭނުންވާ މޭން ޕަވާއެއްވެސް ނެތް ކަމަށް މިނިސްޓަރު ވިދާޅުވިއެވެ.
ރާއްޖޭގައި ނުގަވައިދުން ބިދޭސީން އުޅޭ މައްސަލައަކީ ގާތްގަނޑަކަށް 20-25 އަހަރުވީ މައްސަލައެއް ކަމަށާއި މި މައްސަލަ އޮތީ ވާރުތަ ވެފައި ކަމަށް މިނިސްޓަރު ވިދާޅުވިއެވެ. އަދި މި މައްސަލަ ހައްލު ކުރުމަށާއި، ރައްޔިތުންނަށް މިކަމާއި ހެދި ހުރި ކަންބޮޑުވުންތަކަށް ހައްލެއް ގެންނަވާނެ ކަމަށް ވެސް މިނިސްޓަރު ފައްޔާޒް ވިދާޅުވިއެވެ. އެގޮތުން، އެކަން ކުރުމަށް އަންނަ ޖުލައި މަސް ތެރޭގައި ރެގިއުލަރައިޒޭޝަން ޕްރޮގްރާމެއް ފަށްޓަވާނެ ކަމަށާއި، މި ޕްރޮގްރާމް ފަށާއިރު ގަވާއިދު ކުރެވެން ހުރި ނުގަވައިދުން އުޅޭ ބިދޭސީން ގަވާއިދު ކުރުމާއި ފޮނުވާލަން ހުރި މީހުން ފޮނުވާލުމުގެ މަސައްކަތް ކުރައްވާނެ ކަމަށް އޭނާ ވިދާޅުވިއެވެ.
މީގެ އިތުރުން، ދައުލަތުގެ ރިސޯސަސް ހުރި ގޮތުން މީހުން ހައްޔަރު ކޮށްގެން ގެންގުޅެވޭނެ ފެސިލިޓީސްއެއް ނެތް ކަމަށާއި، އެކަމަށް ހައްލު ގެނައުމަށް 1000 މީހުންގެ ޑިޓެންޝަން ސެންޓަރެއް ގުޅީފަޅުގައި ގާއިމް ކުރުމަށް ޖުލައި މަސްތެރޭ ޓެންޑާ ކުރައްވާނެ ކަމަށް މިނިސްޓަރު ފައްޔާޒު ވިދާޅުވިއެވެ. އަދި ބިދޭސީން ގަވާއިދު ކުރުމުގައި ކުރިން ނަގާ 6500 ރުފިޔާގެ ފީ ނުނަގާ ގޮތަށް ނިންމަވާފައިވާ ކަމަށާއި، އެއީ އެ ފައިސާ ހޯދުމަށްވުރެ ބޮޑަށް ފައިދާ ހޯދުމަށް ކަމަށް މިނިސްޓަރު ވިދާޅުވިއެވެ. އަދި އެއްގައުމެއްގެ މާގިނަ ބިދޭސީން ރާއްޖޭގައި އުޅޭތީ ދިވެހިންގެ އޮތް ކަންބޮޑުވުމަށް ހައްލު ގެނައުމަށް ކޮންމެ ގައުމަކަށް ކޯޓާ ލިމިޓެއް ހަމަޖައްސައި، އެގައުމަކުން ވަކި ވަރަކަށް މީހުން ރާއްޖޭގައި އުޅުމުގެ ހުއްދަ ދިނުމަށް ވެސް ނިންމަވާފައިވާ ކަމަށް މިނިސްޓަރު ވިދާޅުވިއެވެ.
