މަހަށް ގޮސް އުޅެނިކޮށް، މަސްވެރިއެއްގެ ލޮލަށް ބުޅިއެއް ހެރިގެން މާލެ ގެންނައުމުގެ މަސައްކަތް ކުރަމުންދާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
އެމްއެންޑީއެފުން ބުނީ، އދ. މަންދޫގެ ހުޅަނގުން 111 ނޯޓިކަލް މޭލު ބޭރުގައި މަސްވެރިކަން ކުރަން އުޅުނު ދޯންޏެއްގައި ހުރި މަސްވެރިއެއްގެ ލޮލަށް ބުޅިއެއް ހެރިގެން އޭނާއަށް ފަރުވާ ދިނުމަށް މާލެ ގެނައުމުގެ މަސައްކަތް ކުރަމުންދާ ކަމަށެވެ. އަދި އެ ހާދިސާގެ ރިޕޯޓު އެމްއެންޑީއެފަށް ލިބިފައި ވަނީ މިއަދު ހެނދުނު 09:47 ހާއިރު ކަމަށް ވެސް އެމްއެންޑީއެފުން ބުނެއެވެ.
އެމްއެންޑީއެފްނު ބުނީ ބުޅި ހެރިފައި ވަނީ 'ދިރާސާ' ނަމަކަށް ކިޔާ ދޯންޏެއްގައި ހުރި 57 އަހަރުގެ ދިވެއްސެއްގެ ލޮލަށް ކަމަށެވެ. އަދި އޭނާ މާލެ ގެނައުމުގެ މަސައްކަތް ކުރަމުން ދާއިރު، އޭނާ މާލެ ގެނެވޭނީ ކިހާއިރަކު ކަމެއް އަދި އެނާގެ ހާލު ސީރިއަސް ކަމެއް އަދި ނޫން ކަމެއް ވެސް ސާފެއް ނުވެއެވެ.
ރާއްޖޭގައި ހިނގާ މިފަދަ ހާދިސާތަކުގައި އެމްއެންޑީއެފްގެ އެހީތެރިކަން ރައްޔިތުންނަށް ލިބެއެވެ. އެގޮތުން، މިމަހު ތިން ވަނަ ދުވަހު، މާލެ އިން ފުރައިގެން އައްޑޫ ސިޓީ އަށް ދަތުރު ކުރި 33 ފޫޓުގެ 'އުފުރިޔާ' ދޯނި ގެއްލުނު ދޯނި އެމްއެންޑީއެފުން ވަނީ ހޯދާފައެވެ.
