ދައުލަތުގެ ބެލުމުގެ ދަށުގައި ހުއްޓާ ގެއްލިގެން ހޯދާ ޝައިމް އަބްދުﷲގެ މައްސަލަ 2009 ވަނަ އަހަރުން ފެށިގެން މިނިސްޓްރީ އޮފް ޖެންޑާ، ފެމިލީ އެންޑް ސޯޝަލް ސާވިސަސް އަށް ހުށަހެޅެމުން ދާ ކަމަށް މިނިސްޓަރު ޝިދާތާ ޝަރީފް ވިދާޅުވެއްޖެއެވެ.
މިނިސްޓަރު ވިދާޅުވީ، އެންމެ ފުރަތަމަ އާއިލާގެ ތެރެއިން އިހުމާލުވުމުގެ ސަބަބުން ޝައިމްގެ މައްސަލައެއް 2009 ވަނަ އަހަރު އެ މިނިސްޓްރީ އަށް ހުށަހަޅާފައިވާ ކަމަށެވެ. އަދި އޭގެ ފަހުން އެކި ދުވަސް މަތިން އެ މައްސަލާގައި އެކި ފިޔަވަޅުތައް ޖެންޑާ މިނިސްޓްރީ އިން އަޅާފައިވާނެ ކަމަށް މިނިސްޓަރު ވިދާޅުވިއެވެ.
ޝައިމް އުޅޭ މާހައުލަކީ އެންމެ އެކަށީގެންވާ ރައްކާތެރިކަން ލިބޭ މާހައުލަކަށް ނުވާތީ އެ މާހައުލުން ދުރުކުރުމަށް 2015 ވަނަ އަހަރު އޭނާ ކުޑަކުދިންގެ ހިޔާ އަށް ބަދަލު ކުރި ކަމަށާ ނަމަވެސް އޭނާއާ ހަވާލުވާނެ މީހަކު ލިބުމުން 2016 ވަނަ އަހަރު އޭނާ އެފަރާތާ ހަވާލު ކޮށްފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، ޝައިމް އާއި ގުޅުން ހުރި އިތުރު މައްސަލަތަކެއް 2017 ވަނަ އަހަރު އެ މިނިސްޓްރީ އަށް ހުށަހެޅުނު ކަމަށާ، އޭގެ ތެރޭގައި ގަވާއިދުން ސްކޫލަށް ހާޒިރު ނުވުމާއި ގިނަ ވަގުތު ބޭރުގައި އުޅޭ މައްސަލަ އަދި ބަހަލައްޓާ ފަރާތަށް ބަހަލައްޓަން އުނދަގޫ ވާ މައްސަލަ ވެސް ހިމެނޭ ކަމަށެވެ.
ޝައިމް ބަލަހައްޓާ ފަރާތުން މިދިޔަ އޭޕްރީލް 24 ވަނަ ދުވަހު ޖެންޑާ މިނިސްޓްރީ އަށް ހާޒިރުވެ، ޝައިމް ދިރިއުޅެނީ ކުށުގެ ވެށީގައި ކަމަށާއި ކުއްޖާ އިތުރަށް ނުބެލޭނެ ކަމަށް ބުނެފައި ވެއެވެ. އެގޮތުން، އޭރު ޝައިމް ގެއަށް ނުދާތާ އެއް މަސް ވެފައިވާކަމަށް ބެލެނިވެރިޔާގެ ފަރާތުން މައުލޫމާތު ލިބިފައިވާ ކަމަށް މިނިސްޓަރު ވިދާޅުވިއެވެ.
ޖެންޑާ މިނިސްޓްރީން ބުނީ ޝައިމް ފިލައިގެން އުޅެނިކޮށް ކަމާބެހޭ ފަރާތްތަކުން ކުރި މަސައްކަތުން މިމަހު ތިން ވަނަ ދުވަހު އޭނާ ފެނިފައި ވާކަމަށާ އަަދި އޭނާ ކުޑަކުދިންގެ ހިޔާއަށް ގެންގޮސް ބެހެއްޓީ ވަކިން ކަމަށެވެ.
ޝައިމް ހިޔާގައި އުޅުނު އިރު ވެސް ބިހޭވިއަރަލް މައްސަލަތައް ފެންމަތިވެ، ތަކެއްޗަށް ގެއްލުން ދިނުމާއި މާރާމާރީ ވަނީ ހިންގާފައެވެ.
މިނިސްޓްރީން ބުނީ ޝައިމް އެތާ ހުއްޓާ ފިލީ މިމަހު 18 ވަނަ ދުވަހު ކަމަށާ އޭނާ ފިލި ރޭ ތިން ފަހަރެއްގެ މަތިން ޑިއުޓީގައި ހުރި މުވައްޒަފު ވަނީ ޝައިމް އޮތްތޯ އޭނާގެ ކޮޓަރި ބަލާފައި ކަމަށެވެ. އެގޮތުން، 23:40، 2:30 އަދި 4:00 ގައި އޭނާ އޮތްތޯ ކޮޓަރި ބެލި ނަމަވެސް، އެނދުގައި ބެޑްޝީޓު އަޅައިގެން އޮތީ ސީދާ ޝައިމްތޯ ނުބަލާ ކަމަށެވެ. އެނގިފައިވާ ގޮތުގައި ޝައިމް އާންމުކޮށް ނިދަނީ މޫނުމަތީގައި ބެޑްޝީޓް އަޅައިގެންނެވެ.
ޝައިމް ގެއްލިގެން އުޅޭކަމުގެ ހަބަރުތައް ސޯޝަލް މީޑިއާގައި އާންމުވުމުން، ޝައިމް އަކީ ދައުލަތުގެ ބެލުމުގެ ދަށުގައި ހުރި ކުއްޖެއް ކަން ޖެންޑާ މިިނިސްޓްރީން ވަނީ ދޮގުކޮށްފައެވެ. ނަމަވެސް ފަހުން، ޝައިމް ގެއްލުނީ އެ މިނިސްޓްރީގެ ބެލުމުގެ ދަށުގައި ހުއްޓާ ކަމަށާއި، އެ މިނިސްޓްރީގެ އިހުމާލުން ކަމަށް މިނިސްޓްރީން އެއްބަސްވިއެވެ. މިކަމާ ގުޅިގެން ގިނަ ބައެއްގެ ފާޑު ކިއުން ދަނީ ޝިދާތާއަށް އަމާޒު ވަމުންނެވެ.
