ސްރީލަންކާ ސަރުކާގެ އިސް މަގާމުތަކެއްގައި ތިއްބެވި މުސްލިމު މެމްބަރުންތަކެއް މިއަދު އިސްތިއުފާ ހުށަހަޅުއްވައިފިއެވެ.
މިހާތަނަށް 8 އޮފިޝަލަކު އިސްތިއުފާ ހުށަހަޅުއްވާފައިވާއިރު، ސަރުކާރުގެ އިސް މަގާމުތަކުން މި ބޭފުޅުން އިސްތިއުފާ ދެއްވަނީ އޭޕްރިލް 21 ވަނަ ދުވަހުގެ ބޮމުގެ ހަމަލާ ދިން ހައްދުފަހަނައަޅާފައިވާ ހަނގުރާމަވެރިންނާއި މުސްލިމު ވަޒީރަކާ ގުޅުން އޮންނަ ކަމަށް ބުނެ ފެންމަތިކުރި ތުހުމަތުތަކަކާ ގުޅިގެންނެވެ.
ސްރީލަންކާގެ ސިނާއަތްތަކާ ބެހޭ ވަޒީރާ ހައްދުފަހަނައަޅާފައިވާ ހަނގުރާމަވެރިންނާ ގުޅުން އޮންނަ ކަމަށް ބުނެ ފެންމަތިކޮށްފައިވާ ތުހުމަތުތަކާއިއެކު، ސްރީލަންކާގެ ވަޒީރުންގެ މަޖިލީހުގައި ހިމެނިވަޑައިގަންނަވާ މުސްލިމު ވަޒީރުންގެ އިތުރުން، ވަޒީރުންގެ ނައިބުގެ ފެންވަރުގައި ތިއްބެވި މުސްލިމު މެމްބަރުންނާ ސްޓޭޓް މިނިސްޓަރުންވެސް ގެންދަވަނީ އިސްތިއުފާ ދެއްވަމުންނެވެ.
ސަރުކާރުގެ އިސް މަގާމުތަކުން މިބޭފުޅުން އިސްތިއުފާ ދެއްވިނަމަވެސް، ގާނޫނު ހަދާ މަޖިލީހުގެ މެމްބަރުންގެ ގޮތުގައި އަދިވެސް ތިއްބަވާނެ ކަމަށާ، ނަމަވެސް މި ބޭފުޅުން ދެން ތިއްބަވާނީ "ބެކްބެންޗާސް"ގެ ގޮތުގައި ކަމަށް ސްރީލަންކާގެ މީޑިއާ ރިޕޯޓްތައް ބުނެއެވެ.
ސިނާއީ ވަޒީރު ރިޝާދު ބަދީއުއްދީންނާއިއެކު އިތުބާރު ނެތްކަމުގެ މައްސަލައެއް ފެންމަތިކޮށް، މަޖިލީހުގައި ވޯޓަށް އެހުމަށް މަސައްކަތް ކުރަމުން ދަނީ ސްރީލަންކާގެ ގާނޫނު ހަދާ މަޖިލީހުގައި ވޯޓަށް އެހުމަށް އިސްކޮށް މަސައްކަތް ކުރައްވަމުންދަނީ ސްރީލަންކާގެ ކުރީގެ ރައީސް މަހިންދަ ރާޖަޕަކްސައެވެ. ނަމަވެސް މިއަދު އިސްތިއުފާ ދެއްވި ވަޒީރުންގެ ތެރޭގައި ބަދީއުއްދީންވެސް ހިމެނިވަޑައިގަންނަވާއިރު، މަޖިލީހުގެ ތަޅުމުގައި މިމައްސަލަ އިތުރަށް ކުރިއަށް ގެންދެވޭނެ ފުރުސަތެއް ނެތެވެ.
މަގާމުން އިސްތިއުފާ ދެއްވި ވަޒީރުން ވިދާޅުވީ، މިއީ ނުފޫޒެއް ނެތި މިނިވަންކަމާއެކު ތަހުގީގު ހިންގުމަށް ފުރުސަތު ފަހިކޮށްދޭނެ ކަމެއް ކަމަށެވެ.
އިސްތިއުފާ ދެއްވި ވަޒީރުންގެ ތެރޭގައި ހިމެނިވަޑައިގަންނަވާ ރައޫފު ހަކީމު ވިދާޅުވީ، މުސްލިމު ވަޒީރުން ސަރުކާރު ދޫކޮށްލެއްވީ ނޫންކަމަށާ، އެ މެމްބަރުން އަދިވެސް ތިއްބެވީ ސަރުކާރުގެ ހިމާޔަތުގައި ކަމަށެވެ.
ސްރީލަންކާގެ ސަރުކާރުގެ އިސް މަގާމުތަކެއްގައި ތިއްބެވި މުސްލިމުން، މަގާމުން އިސްތިއުފާ ދެއްވަމުންދާ މި ދަނޑިވަޅަކީ ސްރީލަންކާގެ ސިޔާސީ މައިދާނުގައި އިސްކޮށް ހަރަކާތްތެރިވެވަޑައިގަންނަވާ މުސްލިމުންނާ ދެކޮޅަށް އެ ގައުމުގައި މެޖޯރިޓީ އޮންނަ ބުދިސްޓުންގެ ލީޑަރު ވަރުގަދަ ޕްރޮޕަގަންޑާއެއް ފަތުރަމުންދާ ދަނޑިވަޅެކެވެ.
