އަދިވެސް އޭނާ ހުރީ ސްރީލަންކާގެ ރިޔާސީ ރޭހުގައި ވާދަކުރުމުގެ އަޒުމުގައި ކަމަށާ އެކަމަށް ބަދަލު ނާންނަކަމަށް ސްރީލަންކާގެ ކުރީގެ ރައީސް މަހިންދާ ރާޖަޕަކްސަގެ ކޮއްކޯފުޅު ގޮތަބާޔާ ރާޖަޕަކްސަ ވިދާޅުވެއްޖެއެވެ.
އޭޕްރިލް 21 ވަނަ ދުވަހު ސްރީލަންކާ ރޮއްވާލި ޓެރަރިސްޓް ހަމަލާތަކުގެ ކުޑަ ދުވަސްކޮޅެއް ކުރިން، އެމެރިކާ ދޫކުރައްވާ އެނބުރި ސްރީލަންކާއަށް ވަޑައިގެންނެވި ގޮތަބާޔާ ރާޖަޕަކްސައަކީ ސްރީލަންކާގެ ދާހިލީ ހަނގުރާމައިގެ ދުވަސްވަރު ހިންގާފައިވާ ލާއިންސާނީ ޖަރީމާތަކެއްގެ މައްސަލާގައިވެސް ބޮޑެތި ތުހުމަތުތަކެއް އަމާޒުވެފައިވާ ފަރާތެކެވެ.
މިއަހަރުގެ ފަހުކޮޅު ސްރީލަންކާގައި ކުރިއަށް ގެންދަންޖެހޭ ރިޔާސީ ރޭހުގައި ވާދަކުރައްވާނެކަން ތަކުރާރުކޮށް ހާމަކުރައްވަމުން، ސްރީލަންކާގެ ދިފާއީ އިސް މަގާމުތަކެއްވެސް ފުރުއްވާފައިވާ ގޮތަބާޔާ ވިދާޅުވީ، ރިޔާސީ އިންތިހާބުގައި ވާދަ ނުކުރައްވާނަމަ އެމެރިކާގެ ރަށްވެހިކަން ދޫކޮށްލެއްވުމުގެ ބޭނުމެއްވެސް ނެތްކަމަށެވެ.
މައުލޫމާތު ލިބޭ ގޮތުގައި ގޮތަބާޔާ ސްރީލަންކާއަށް މިފަހަރު ވަޑައިގެންނެވީ އެމެރިކާގައި އޮތް ރަށްވެހިކަން ދޫކޮށްލެއްވުމަށްފަހުގައެވެ.
އޭޕްރިލް 21 ވަނަ ދުވަހުގެ ހަމަލާތަކާ ގުޅިގެން ހިތާމަކުރައްވާކަން ހާމަކުރައްވާ ވާހަކަފުޅު ދައްކަވަމުން ގޮތަބާޔާ ވިދާޅުވީ، މިއީ އެއްވެސް ހާލެއްގައި އެފަދަ ހިތާމަވެރިކަމެއްގެ ނާޖާއިޒު ފައިދާ ނަންގަވަން ދައްކަވާ ވާހަކަފުޅުތަކެއް ނުންކަމަށާ، ގައުމު އެފަދަ ހާލެއްގައި އޮތުމުން ހަމަ ހަގީގަތުގައިވެސް ހިތްޕުޅަށް ދަތިވާކަމަށެވެ.
ލާއިންސާނީ ބޮޑެތި ތުހުމަތުތަކެއް އަމާޒުވެފައިވާ ގޮތަބާޔާ ގެންދަވަނީ އެ ތުހުމަތުތަކަށް އިންކާރު ކުރައްވަމުންނެވެ.
