އިސްތިހާރު ވެލަން ބަހައްޓަން ކެމްޕޭން ޕޯސްޓަރުތައް ކަމުނުދާ ކަމަށް އިލެކްޝަންސް ކޮމިޝަންގެ މެންބަރު އިސްމާއިލް ހަބީބް ވިދާޅުވެއްޖެއެވެ.
ފާއިތުވެ ދިޔަ 19 ވަނަ ރައްޔިތުންގެ މަޖިލީހުގެ ކެމްޕޭނުގައި ކެންޑިޑޭޓުން ބޭނުން ކުރި ބައެއް ޕޯސްޓަރުތައް އަދިވެސް ނުނަގާ ހުރުމާ ގުޅިގެން، ހަބީބު މިއަދު ކުރެއްވި ޓްވީޓެއްގައި ވިދާޅުވީ "މިކުޅެނީ ފިލްމެއް ނޫން. އަދި ސިޔާސީ ޕާޓީތަކުގެ ޒިންމާދާރު މަގާމުތަކުގައި ތިއްބަވާ ބޭފުޅުންގެ ކެމްޕޭން ޕޯސްޓަރުތައް އަދިވެސް ނުނެގި ހުރުމަކީ ބަލައިގަނެވޭނޭ ކަމެއްނޫން" ކަމަށް ހަބީބު ވިދާޅުވިއެވެ.
ހަބީބު ފާހަގަ ކުރެއްވި ގޮތުގައި 2014 ވަނަ އަހަރު ބޭއްވި އިންތިހާބު ތަކުގައި ބައެއް ކެންޑިޑޭޓުން ބޭނުން ކުރި ބައެއް ޕޯސްޓަރުތައް ވެސް މިއަދާ ޖެހެންދެންވެސް ނުނަގާ އެބަހުއްޓެވެ.
މިފަހަރުގެ އިންތިހާބު ނިމި ނަތީޖާ އައުމާއެކު ބައެއް ކެންޑިޑޭޓުންވަނީ އަވަސް މުއްދަތެއްގެ ތެރޭގައި ކެމްޕޭން ޕޯސްޓަރުތަކާއި ބެނާތައް ނަގާފައެވެ. އެގޮތުން އެންމެ ފުރަތަމަ ބެނާތަކާއި ޕޯސްޓަރުތައް ނަގާފައިވަނީ އެމްއާރްއެމްގެ ފަރާތުން ގަލޮޅު ދެކުނު ދާއިރާއަށް ވާދަކުރެއްވި އައިމިނަތު ނާދިރާއެވެ.
އެކަމަކު މިހާތަނަށް އައިރުވެސް ބައެއް ކެންޑިޑޭޓުން އިންތިހާބުގައި ކެމްޕޭނު ކުރުމަށް ބޭނުންކުރި ބެނާ ތަކާއި ޕޯސްޓަރުތައް މަގުމަތީ ފެންނަން އެބަހުއްޓެވެ.
އާންމު އިޖްތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނުގެ 10 ވަނަ މާއްދާގެ (ހ) ގައި ވާ ގޮތުން ތަނެއް ނުވަތަ އެއްޗެއްގައި ޕޯސްޓަރެއް ނުވަތަ ބެނާއެއް ހިއްޕުމަށްފަހު އެކަށީގެންވާ މުއްދަތެއްގެ ތެރޭގައި ނުނަގައިފިނަމަ އެ ޕޯސްޓަރެއް ނުވަތަ އެ ބެނާއެއް ނިސްބަތްވާ ފަރާތަކާ މެދު ފިޔަވަޅު އެޅޭނެއެވެ.
