'ހިޔާ' މަޝްރޫއާއި، 'ގެދޮރުވެރިކުރުވުން' މަޝްރޫއާއި، 'ގުޅީފަޅު ހައުސިން ޕްރޮޖެކްޓް' ކުރިއަށް ގެންގޮސްފައިވާ ގޮތާ، އެ މަޝްރޫތަކުގެ ދަށުން ފްލެޓްތައް ދޫކޮށްފައިވާ ގޮތާމެދު ޝަކުވާ ހުށައަޅަން ބޭނުންވާ ފަރާތްތަކަށް އެފުރުސަތު ރައީސް އޮފީހުން މިއަދު ހުޅުވާލައިފިއެވެ.
މިފުރުސަތު މިއަދުން ފެށިގެން މި މަހުގެ 25 ވަނަ ދުވަހުގެ 14.00 ގެ ނިޔަލަށް ހުޅުވާލައްވައިފައިވާ ކަމަށް ރައީސް އޮފީހުން މައުލޫމާތު ދެއެވެ.
އެއޮފީހުން ބުނީ، ސިޓީ، އީމެއިލް ނުވަތަ އެސް.އެމް.އެސް މެދުވެރިކޮށްވެސް ޝަކުވާ ހުށައެޅުމުގެ ފުރުސަތު ހުޅުވާލަފައިވާކަމަށެވެ. އަދި ހުށައަޅާ ޝަކުވާގައި، ފުރިހަމަ ނަމާއި، ދާއިމީ އެޑްރެހާއި، ދިވެހި ރައްޔިތެއްކަން އަންގައިދޭ ކާޑު ނަންބަރާއި، މަޝްރޫގެ ނަމާއި، ފުލެޓަށް އެދިފައިވާ ފޯމު ނަންބަރު ހިމަނަން ޖެހޭކަމަށްވެސް އެ އޮފީހުން މައުލޫމާތު ދެއެވެ.
ރައީސް އޮފީހުން މިއަދު ކޮށްފައިވާ އިއުލާނުގައި ވާގޮތުން، ޝަކުވާ ހުށަހަޅަނީ ސިޓީއަކުންނަމަ، "ފްލެޓްތަކުގެ މައްސަލަބަލާ ކޮމިޓީ" އަށް އެޑްރެސްކޮށް، ސިޓީ ފޮނުވާނީ ރައިސުލްޖުމްހޫރިއްޔާގެ އޮފީހަށެވެ. އީ-މެއިލް މެދިވެރިކޮށްނަމަ، އީ-މެއިލް ފޮނުވާނީ [email protected] އަށެވެ. އަދި އެސް.އެމް.އެސް އިން ނަމަ ހުށަހަޅާ ޝަކުވާ ހުށަހަޅުއްވާނީ 7761108 މި ނަންބަރަށެވެ.
މިމަޝްރޫ ތަކުގެ ދަށުން ފްލެޓް ލިބިފައިވާ ފަރާތްތައް އެނގޭނެ ލިސްޓެއް ރައީސް އޮފީހުގެ ވެބްސައިޓްގައި ޝާއިރު ކޮށްފައި ވާނެކަމަށް އެއޮފީހުން މައުލޫމާތު ދެއެވެ.
ހިޔާ މަޝްރޫއަކީ ކުރީގެ ސަރުކާރުން 80000 މީހުންނަށް ބޯހިޔާވަހިކަން ފޯރުކޮށްދިނުމަށް އަމާޒުކޮށް، ހުޅުމާލޭ ދެވަނަފިޔަވަހީގައި ފުލެޓު އެޅުމަށް ފަށާފައިވާ މަޝްރޫއެކެވެ. އަދި ގުޅީފަޅު ޕުރޮޖެކްޓަކީ ރައީސް މުހައްމަދު ނަޝީދުގެ ސަރުކާރުން ފައްޓަފައިވާ ޕުރޮޖެކްޓެކެވެ.
މި މަޝްރޫތަކުގެ ކަންކަން ކުރިއަށް ގެންގޮސްފައިވާ ގޮތް ރިވިއުކޮށް، ފްލެޓް ހައްގުވާ ފަރާތްތަކަށް އެންމެ އިންސާފުވެރިކޮށް ފްލެޓް ކަށަވަރުކޮށްދިނުމަށް ރައީސް އިބްރާހިމް މުހައްމަދު ސޯލިހު ކޮމެޓީއެއް ވެސް އުފައްދަވާފައި ވެއެވެ.
