މިނިސްޓްރީ އޮފް ޔޫތު އެންޑް ސްޕޯޓްސްގެ ބެލުމުގެ ދަށުގައިވާ ބައެއް ފުޓްސަލް ދަނޑުތަކުން، އަމިއްލަ ފަރާތްތަކުން ނާޖާއިޒު ގޮތުގައި މަންފާ ހޯދާފައި ވާކަމަށް އެމިނިސްޓްރީގެ 2017ވަނަ އަހަރުގެ މާލީ އޮޑިޓް ރިޕޯޓުން ދައްކައިފިއެވެ.

އޮޑިޓާ ޖެނެރަލްގެ އޮފީހުން މިދިޔަ ފެބްރުއަރީ މަހު އާންމުކޮށްފައިވާ އޮޑިޓް ރިޕޯޓުގައި ވާގޮތުން، މާލެ ސަރަހައްދުގައި ގާއިމުކޮށްފައިވާ ފުޓްސަލް ދަނޑުތައް އެއްވެސް އުސޫލެއްނެތި، ވަކި ބަޔަކަށް މަންފާ ލިބޭނެހެން ބޭނުން ކުރުމަށް ހުޅުވާލާފައި ވެއެވެ. އަދި އެދަނޑުތައް ތަރައްގީކޮށް، ދަނޑުތަކުގެ ކަރަންޓު ހަރަދަށް ޔޫތު މިނިސްޓްރީއިން ފައިސާ ދައްކަމުންދިޔަ ނަމަވެސް، ބައެއް އަމިއްލަ ފަރާތްތަކުން ވިޔަފާރި އުސޫލުން ދަނޑުތައް ކުއްޔަށް ދޫކުރަމުން ގޮސްފައި ވާކަމަށްވެސް ރިޕޯޓުގައި ވެއެވެ.

އެގޮތުން ހެންވޭރު ކާނިވާ ސަރަހައްދު (ބޮޑުތަކުރުފާނު މަގު)ގައި ޔޫތުމިނިސްޓްރީގެ ބެލުމުގެ ދަށުގައިވާ ބިމެއްގައި، އެމިނިސްޓްރީގެ ޕަބްލިކް ސެކްޓާ އިންވެސްޓްމެންޓް ޕްރޮގްރާމް(ޕީއެސްއައިޕީ) ބަޖެޓުން ޖުމްލަ 901،000 ހަރަދުކޮށްގެން، ހަދާފައިވާ ފުޓްސަލް ދަނޑުގެ، ކަންކަން ބަލަހައްޓަނީ އަމިއްލަ ފަރާތަކުން ކަމަށް ރިޕޯޓުގައި ބަޔާންކޮށްފައި ވެއެވެ. އަދި، އެދަނޑު އެއްވެސް ފަރާތަކަށް ރަސްމީކޮށް ހަވާލުކޮށްފައި ނުވާކަމަށާއި، ވިޔަފާރި އުސޫލުން އެކި ފަރާތްތަކަށް ދަނޑު ދޫކޮށްފައިވަނީ، އަމިއްލަ ފަރާތަކުން އެދަނޑާ ނުރަސްމީކޮށް ހަވާލުވެގެންކަމަށްވެސް ރިޕޯޓުގައިވެއެވެ. އޭގެ އިތުރުން އެ ދަނޑުގެ ކަރަންޓު ބިލުތަކަށް 2017ވަނަ އަހަރުން ފެށިގެން 2018ވަނަ އަހަރުގެ މެއި މަހުގެ ނިޔަލަށް ޖުމުލަ 146،153 ރުފިޔާ އަރާފައި ވާއިރު، އޭގެތެރެއިން 30،675 ރުފިޔާ 29އޮކްޓޯބަރު 2018ގެ ނިޔަލަށް ޔޫތު މިނިސްޓްރީގެ ބަޖެޓުން ދައްކާފައި ވާކަން، ރިޕޯޓުގައި ފާހަގަކޮށްފައި ވެއެވެ.

މީގެ އިތުރުން ޔޫތު މިނިސްޓްރީގެ ބަޖެޓުން 1،767،354 ރުފިޔާ ހަރަދުކޮށްގެން، މޯލްޑިވްސް ނޭޝަނަލް ޔުނިވާސިޓީގެ އޭރުގެ ފެކަލްޓީ އޮފް އިސްލާމިކް ސްޓަޑީޒްއާ އިންވެގެން، ތަރައްގީކޮށްފައިވާ ފުޓްސަލް ދަނޑު އެއްވެސް ފަރާތަކާ ރަސްމީކޮށް ހަވާލު ކޮށްފައި ނުވި ނަމަވެސް، ވަކި ފަރާތަކުން އެދަނޑާ ވެސް ހަވާލުވެ ވިޔަފާރި އުސޫލުން އެކި ފަރާތްތަކަށް ދޫކުރަމުން ގޮސްފައިވާކަން، އޮޑިޓް ރިޕޯޓުން އެނގެން އެބައޮތެވެ. އެ ދަނޑުގެ ކަރަންޓު ބިލަށް 2017ވަނަ އަހަރުގެ މާޗުމަހުން ފެށިގެން 2018ވަނަ އަހަރުގެ ސެޕްޓެމްބަރު މަހުގެ ނިޔަލަށް އަރާފައިއޮތް 21،689 ރުފިޔާގެ ތެރެއިން 15،093ރުފިޔާ މިނިސްޓްރީގެ ބަޖެޓުން، 29 އޮކްޓޯބަރ 2018ގައި ދައްކާފައިވާކަމަށް އޮޑިޓް ރިޕޯޓުގައި ބުނެފައިވެއެވެ.

އަދި އޮޑިޓް ރިޕޯޓުގައި، ދައުލަތުން ހަރަދުކޮށްގެން ތަރައްގީ ކޮށްފައިވާ ވަސީލަތްތަކާއި ތަންތަނަކީ، ވިޔަފާރި އުސޫލުން ބޭނުންކޮށްގެން، ވަކި ބަޔަކު އޭގެ މަންފާ ނާޖާއިޒު ގޮތުގައި ހޯދުމަށް މަގުފަހިވާގޮތަށް ދޫކޮށްލައިގެން ވާނެ ތަންތަން ނޫންކަން ފާހަގަކޮށް، އެފަދަ ތަންތަން ދައުލަތުގެ ކަމާބެހޭ އިދާރާތަކުގެ ބެލުމުގެ ދަށަށް ގެނެސް އާންމު އެންމެހާ ފާރާތްތަކަށް އެއްހަމައަކުން ބޭނުން ކުރެވޭނެ އިންތިޒާމު ހަމަޖެއްސުމަށް ލަފާދީފައި ވެއެވެ.

ސިޔާސީ