މިއަހަރުގެ ރައްޔިތުންގެ މަޖިލީހުގެ އިންތިހާބުގައި ވޯޓުލުމަށް ރީރަޖިސްޓްރީ ކުރުމަށް ހުޅުވާލި ވަގުތު މިރޭ ދިހައަކާ ހަމައަށް އިލެކްޝަންސް ކޮމިޝަން(އީސީ)އިން އިތުރުކޮށްފިއެވެ.
މިއަދުގެ ތިނެއް ޖެހުމާއި ހަމައަށް ކުރިން ހަމަވާގޮތަށް އޮތް، ރީރަޖިސްޓްރޭޝަންގެ ވަގުތު މިރޭ ދިހައެއް ޖެހުމާ ހަމައަށް އިތުރުކޮށްފައި ވަނީ، ގިނަބަޔަކު ރީރަޖިސްޓާ ކުރުމަށް، ކިއުގައި ޖެހިފައިވާތީ ކަަމަށް އިލެކްޝަންސް ކޮމިޝަންގެ ފަރާތުން މައުލޫމާތު ދެއެވެ. އީސީގެ މެންބަރު އަހުމަދު އަކްރަމް ވިދާޅުވީ، ވަގުތު އިތުރު ކޮށްދިނުމަށް މިހާރު ވެސް ގިނަ ފަރާތްތަކުން އެދެމުން ދާކަމަށެވެ.
މީގެ އިތުރުން އަކުރަމް ވިދާޅުވީ، ރީރަޖިސްޓްރީ ކުރުމަށް ކިއުގައި ގިނަަވަގުތު މަޑުކުރަން ޖެހެނީ، އެންމެ ފަހު ވަގުތާ ހަމައަށް އެކަން ލަސްކުރާތީ ކަމަށެވެ. މަޖިލިސް އިންތިހާބަށް ވޯޓުލުމަށް ރީރަޖިސްޓްރީ ކުރުން، އިއްޔެ ހަވީރު ހަތަރަކުން ރޭގަނޑު ދިހައެއް ޖެހުމާ ހަމައަށް ރަސްފަންނުގައި ވެސް އީސީއިން ކުރިއަށް ގެންގޮސްފައިއެވެ.
އެކަމަކު ރީރަޖިސްޓްރީ ކުރުމަށް މިހާތަނަށް ހުށައަޅާފައިވަނީ ޖުމްލަ 8500 ފޯމުކަމަށް އީސީއިން މައުލޫމާތު ދެއެވެ.
މިއަހަރުގެ ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ އަންނަ އޭޕްރީލް މަހުގެ ހަވަނަ ދުވަހުއެވެ. މިއަހަރުގެ އިންތިހާބުގައި ވޯޓުލުމުގެ ހައްގު 264589 ފަރާތަކަށް ލިބިފައި ވެއެވެ.
