ޑައިބީޓީޒް ނުވަތަ ހަކުރު ބައްޔަކީ ލޭގައި ގްލޫކޯޒް ނުވަތަ ހަކުރު އެކުލެވޭ މިންވަރު އިތުރުކުރާ ދާއިމީ ބައްޔެކެވެ. ޖިސްމާނީ ހެލިފެލިވުމުގެ އިތުރުން ހަކުރު ބަލީގެ ސަބަބުން ހާއްސަ ޑަޔަޓަކަށްވެސް ދާންޖެހެއެވެ. މިދެންނެވީ ބޭސްފަރުވާގެ އިތުރުން ކުރަންހެޖެހޭ ކަންކަމުގެ ވާހަކައެވެ. މީގެތެރެއިންވެސް ހަކުރު ބަލީގެ މީހުން ކައިބޮއިއުޅޭ އެއްޗިއްސާއި މެދު ވަރަށް ބޮޑަށް ސަމާލުވާންޖެހެއެވެ. ބައްޔަކީ ހަކުރު ބަލި ކަމަށްބުނެ، ހަމައެކަނި ހަކުރު ބައްޔާއި ދުރުވެވޭކަށް ނެތެވެ. ހަކުރު ބަލި ހުންނަ މީހުން ސަމަލުވާންވީ ބައެއް އެހެން އެއްޗިހިވެސް އެބަހުއްޓެވެ.
ޑްރައި ފްރުޓްސް
ހަށިގަނޑަށް ބޭނުންވާ މުހިންމު ވިޓަމިންސްއާއި މިނަރަލްސްގެ އިތުރުން މޭވާއަކީ އޭގައި ގުދުރަތީ ހަކުރު އެކުލެވޭ ބާވަތެކެވެ. ނަމަވެސް މޭވާ ހިއްކުމުން، އޭގައި އެކުލެވޭ ފެނުގެ ބައި މުޅިން އުވި، ހަކުރުގެ މިންވަރު މާ ބޮޑަށް ކޮންސަންޓްރޭޓްވެއެވެ. މިހެން ދިމާވަނީ މޭވާގައި އެކުލެވޭ ކާބޯހައިޑްރޭޓްސް މާއްދަގެ ސަބަބުންނެވެ. އެހެންކަމުން، ހަކުރުބަލީގެ މީހުން ޑްރައި ފްރުޓްސް މާ ގިނައިން ބޭނުން ކުރުން ބުއްދިވެރިއެއް ނޫނެވެ. އެންމެ ރަނގަޅީ ތާޒާ މޭވާ އިހުތިޔާރު ކުރުމެވެ.
ފްލޭވާޑް ޔޯގަޓް
މިހާރަކަށް އައިސް އެންމެ ބޮޑު އޮޅުމެއް އަރާފައި އޮންނަ އެކައްޗަކީ ފްލޭވަޑް ޔޯގަޓާއި ކްރީމް ޑެޒާޓް ޕުޑިންގް ވަކިކުރަން ނޭނގުމެވެ. ކުދި ޕްލާސްޓިކު ކޮންޓޭނަރުތަކުގައި ވިއްކާ މިޒާތުގެ ކޮންމެ އެއްޗަކީ ޔޯގަޓްކަމުގައި އަދުގެ މުޖުތަމައަށް އޮންނަނީ ހީކުރެވިފައެވެ. ނަމަވެސް މިއީ ފަރުވާކުޑަކޮށްލެވެން އޮތް ކަމެއް ނޫނެވެ. މިއާ ހިލާފަށް ތާޒާ ޔޯގަޓަކީ ހަކުރު ބަލީގެ މީހުންގެ ހަށިގަނޑަށް އެހީތެރިކަން ފޯރުކޮށްދޭ ޕްރޯބަޔޮޓިކްސްއިން މުއްސަނދިވެފައިވާ އެއްޗެކެވެ. ޓައިޕް ޓޫ ޑައިބީޓީޒް ހުންނަ މީހުންނަށް ޝުގާ-ފްރީ ގްރީކް ޔޯގަޓްއަކީ ފައިދާހުރި ޔޯގަޓެކެވެ.
ސަރުބީ ގިނަ މަސް
ގެރިމަހާއި ސެމަން ފަދަ ސަރުބީ ގިނަ މަހަކީ ހަކުރު ބަލީގެ މީހުންނަށް ހިތުބަލީގެ ނުރައްކާ ބޮޑުކޮށްދޭ ބާވަތްތަކެކެވެ. މި ޒާތުގެ މާހަކީ ހަށިގަނޑުގައި ކޮލަސްޓްރޯލް އެކުލެވޭ މިންވަރު އިތުރުވެސް ކުރާ ބާވަތެކެވެ. ހަކުރު ބަލީގެ މީހުން ބޭނުން ކުރަންއެކަށީގެންވާ މަހުގެ ތެރޭގައި ހަން ނޮޅުމަށްފަހު ތައްޔާރުކުރާ ކުކުޅު މަހާއި ކަނޑުމަސް ހިމެނެއެވެ.
ވައިޓް ޕާސްތާ
ކިތަންމެ މީރު ނަމަވެސް ވައިޓް ޕާސްތާއަކީ ހަކުރުބަލީގެ މީހުން ބޭނުން ކުރަން ރަނގަޅު އެއްޗެއް ނޫނެވެ. ވައިޓް ޕާސްތާއަކީ އޭގާއި ގިނަ އަދަދަކަށް ކާބޯހައިޑްރޭޓްސް އެކުލެވޭ ބާވަތެކެވެ. ހުދު ހަނޑުލުބަތާއި ހުދު ޕާންވެސް މި ލިސްޓުގައި ހިމަނަންޖެހެއެވެ.
ތައްޔާރީ ކާނާ
ޕެކެޓް ޕެކެޓުގައި ބަންދުކޮށްފައި ހުންނަ ތައްޔާރީ ކާނާއަކީ އޭގައި ގިނަ އަދަދަކަށް ޓްރާންސްފެޓް ހުންނަ ބާވަތްތަކެކެވެ. މީގެ ތެރޭގައި ޗިޕްސްއާއި، ކުކީޒް އަދި ޕީނަޓް ބަޓަރުވެސް ހިމެނެއެވެ. އާންމުކޮށް ޖިމްއަށް ދާ މީހުންނަކީ ވަރަށް ގިނައިން ޕީނަޓް ބަޓަރު ބޭނުން ކުރާ މީހުންނެވެ. ނަމަވެސް އެއީ ހަކުރު ބަލި ހުންނަ މީހެއް ނަމަ، މިކަމުގައި ނުރައްކާތަކެއް ހުރިކަން ހަނދާން ކުރަންޖެހެއެވެ.
މާމުޔާއި ނެޗުރަލް ޝުގާޒް
ހަކުރު ބަލި ހުންނަ މީހުންނަކީ ހަކުރު ދެކެ ބިރު ގަންނަ ބަޔަކަށް އޮންނަނީ ވެފައެވެ. ހަކުރު އަޅާފައި ހުންނަ އެއްޗެއްކާން ޖެހިލުންވެއެވެ. އެކަމަކު މާމުޔާއި އަގާވް ނެކްޓާ ފަދަ ނެޗުރަލް ޝުގާޒް ބޭނުން ކުރަން ފަސްޖެހެނީ ހިތްވަރުގަދަ، މަދު ބައެކެވެ. މިހާރު ބާޒާރުން ލިބެން ހުންނަ ގިނަ މާމުޔަކީވެސް ތައްޔާރީ މާމުތަށް އޮންނަނީ ވެފައެވެ. އޭގައި ހިސާބަކަށް ހަކުރުވެސް އެކުލެވެއެވެ. އެކަމަކު އެއީ މާމުޔަށްވާތީ އެކަމަށް ސަމާލުކަން އޮންނަނީ ނުދެވިފައެވެ.
އިސްވެ ދެންނެވުނު ބާވަތްތަކުގެ އިތުރުން ތެލުލި އެއްޗިއްސާއި، އާދަޔާ ހިލާފު ގިނައިން ކިރު އަޅައިގެން ތައްޔާރުކޮށްފައި ހުންނަ ކާނާގެ ބާވަތްތަކުގެ އިތުރުން ބްރެކްފަސްޓް ސީރިއަލްގެ ގޮތުގައި އާންމުކޮށް ބޭނުންކުރާ ސިރިއަލް ތަކަކީވެސް ހަކުރު ބައްޔަށް ފަރުވާ މީހުން ބޭނުންކުރަން އެކަށީގެންވާ ބާވަތްތަކެއް ނޫނެވެ.
