ހަނގުރާމަތަކުގައި ބޭނުންކުރުމަށް އާޓިފިޝަލް އިންޓެލިޖެންސް (އޭ.އައި)އިން ކޮންޓްރޯލް ކުރާ ރޮބޮޓް ތަރައްގީ ކުރުމާއި ދެކޮޅަށް ސައިންސްވެރިންގެ ގުރޫޕަކުން އަޑުއުފުލައިފިއެވެ.
ދި އެމެރިކަން އެސޯސިއޭޝަން ފޯ ދި އެޑްވާންސްމަންޓް އޮފް ސައިންސްގެ ބައްދަލުވުމެއްގައި ވާހަކަ ދެއްކި ސައިންސްވެރިން ބުނީ، މިފަދަ ހަތިޔާރަކީ ހީނުކުރާފަދަ ގޮތަކަށް ކަސިޔާރުވެގެން ހިނގައިދާނެ ހަތިޔާރުތަކެއް ކަމަށާއި އާޚިރު ނަތީޖާއަކަށް ވާނީ މައުސޫމު އިންސާނުންތަކެއް ފުރާނަ ގެއްލި ދިއުން ކަމަށެވެ.
އިންސާނެއްގެ އެއްވެސް ކޮންޓްރޯލެއް ނެތި އާޓިފިޝަލް އިންޓެލިޖެންސް ނުވަތަ މަސްނޫއީ ތޫނުފިލިކަން ލިބިގެންވާ ރޮބޮޓެއްގެ ކޮންޓްރޯލްގެ ދަށަށް ހަތިޔާރު ދޫކޮށްލުމަކީ، ބުއްދި ގަބޫލުކުރާ ހަމަތަކާއި އުސްލޫބާއިވެސް ފުށުއަރާ ކަމެއް ކަމަށް އެތިކްސްގެ ތަޖުރިބާކާރުން ބުނެއެވެ.
އާޓިފިޝަލް އިންޓެލިޖެންސްއިން ކޮންޓްރޯލް ކުރާ ހަނގުރާމަ މަތީ ހަތިޔާރު އުފައްދާ، ހަނގުރާމަތަކުގައި އެ ހަތިޔާރުތައް ބޭނުން ކުރުމާއި ގުޅިގެން އުފެދޭ އެންމެ ބޮޑު އެއް ކަންބޮޑުވުމަކީ، ހަމަލާއެއް ކަސިޔާރުވެ، މައުސޫމު މީހެއްގެ ފުރާނަ ގެއްލިދާހިނދު، ގާނުނީ އިމުގެ ތެރެއިން ސަރިޔަތުގައި ޒިންމާ އުފުއްލާނެ މީހަކު ހޯދުމުގެ ކަންބޮޑުވުމެވެ.
އިންސާނީ ހައްގުތަކަށް މަސައްކަތްކުރާ ބައިނަލްއަގުވާމީ ޖަމިއްޔާ ހިއުމަން ރައިޓްސް ވޮޗްވެސް ހިމެނޭ ގޮތަށް 89 އެން.ޖީ.އޯއަކުންވެސް ދަނީ މިފަދަ ހަތިޔާރުތަކާއި ދެކޮޅަށް އަޑުއުފުލާ، ވަރުގަދަ ކެމެޕޭނެއް ކުރަމުންނެވެ. މި އިއްތިހާދުން ދަނީ މިކަމަށް ބާރުދޭ ބައިނަލްއަގުވާމީ މުއާހަދާއެއް އެކުލަވާލުމަށްވެސް ގޮވާލަމުންނެވެ.
