މާލެ ކުޅިވަރު އެކުވެނީގެ ސިންތެޓިކް ޓްރެކް ހުޅުވުން

އެކުވެނި ޓްރެކުގައި ޒަމާނީ ފެންވަރަށް ސިންތެޓިކް އަޅައި ޓްރެކް ތައްޔާރުކުރުމުގެ މަސައްކަތް ފަށާފައިވަނީ މިދިޔަ އަހަރުގެ މެދު ތެރޭގައެވެ. މި ޓްރެކް ހެދުމަށްޓަކައި މާލީ ގޮތުން އެހީތެރިކަން ފޯރު ކޮށްދީފައި ވަނީ އިންޑިއާ ސަރުކާރުންނެވެ. އަދި ކުރިން ދިމާވާ ގިނަ މައްސަލަތަކަށް މިހާރުގެ ސިންތެޓިކް ޓްރެކުން ހައްލު ލިބިގެންދާނެ ކަމަށް ސަރުކާރުން ބުނެއެވެ.

މި ޓްރެކް ހުޅުވުމަށް މިއަދު ބޭއްވި ރަސްމިއްޔާތުގެ ބައެއްގެ ގޮތުގައި ހާއްސަ އެހީއަށް ބޭނުންވާ ކުދިންގެ 100 މީޓަރު ދުވުމާއި ޕެރާ-އެތްލީޓުންގެ 100 މީޓަރު ދުވުމެއް ވަނީ ކުރިއަށް ގެންގޮސްފައެވެ. މި ރަސްމިއްޔާތުގެ ބައެއްގެ ގޮތުން ކުރިއަށް ގެންދިޔަ ސީނިއާ އެތްލެޓިކްސް ޓީމް، ޖޫނިއާ އެތްލެޓިކްސް ޓީމް އަދި ވެޓަރަންސް ޓީމު ދުވުމުގެ ހަރަކާތުގެ ތެރެއިން ވެޓަރެންސް ޓީމުގައި ހަރަކާތުގައި ރައީސް ސޯލިހް ވަނީ ބައިވެރިވެ ވަޑައިގެންފައެވެ. ހަމައެއާއެކު، އެމަނިކުފާނު ވަނީ 3 އޯވަރުގެ ކްރިކެޓް މެޗުގައި ވެސް ބައިވެރިވެ ވަޑައިގެންފައެވެ.