ސިޔާސީގޮތުން ހިޔާލު ތަފާތުވިޔަސް ހަމަހަމަކަމާ އެކީ ހުރިހާ ރަށަކަށް ވެސް ތަރައްގީ ލިބޭނެ ކަމަށާއި، ތަރައްގީއަކީ ސިޔާސީ ކަމެއް ނޫން ކަމަށް، ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެންމެ އުތުރުގައި އޮންނަ ހއ. އަތޮޅަށް ކުރައްވާ ދަތުރުފުޅުގެ ތެރެއިން ދިއްދޫގެ ރައްޔިތުންނާ ބައްދަލުކުރައްވައި ރައީސް ރޭ ވަނީ، އެ ރަށުގައި އެއާޕޯޓެއް ގާއިމްކުރައްވާނެ ކަމަށް އެމަނިކުފާނު ވެވަޑައިގެންނެވި ވައުދު ތަކުރާރުކުރައްވައިފައެވެ. ރައީސް ވިދާޅުވީ ދިއްދޫގައި ގާއިމްކުރެވޭ އެއާޕޯޓަކީ އުތުރުގެ ސަރަހައްދުގެ ތަރައްގީއަށް މުހިންމު މަޝްރޫއެއް ކަމަށެވެ.
ރައީސް ވިދާޅުވީ، އެއާޕޯޓުގެ މަޝްރޫއު ނިމުމުން އެމަނިކުފާނު އެ ރަށަށް ދެން ވަޑައިގަންނަވާނީ އެއާޕޯޓު ހުޅުވުމަށް ކަމަށެވެ.
ގައުމަށް ގެންނަ ތަރައްގީ އާ ގުޅޭގޮތުން ރައީސް ވިދާޅުވީ، ސިޔާސީގޮތުން ހިޔާލު ތަފާތުވިޔަސް ހަމަހަމަކަމާ އެކީ ހުރިހާ ސަރަހައްދަކަށް ވެސް ތަރައްގީ ގެނެސްދެއްވާނެ ކަމަށާއި، އެއީ ގައުމުގެ މުސްތަގްބަލަށްޓަކައި ކުރައްވާ ކަމެއް ކަމަށެވެ. އެކަން ސިޔާސީ ކަމެއްގެ ގޮތުގައި ދެކުމަކީ ރަނގަޅު ކަމެއް ނޫން ކަމުގައި އެމަނިިކުފާނު ވިދާޅުވިއެވެ.
"ތަރައްގީ ގެންނަނީ އެންމެންނަށް ހަމަހަމަކޮށް، އަޅުގަނޑު ކުރިމަތީގަ ސިޔާސީ ފިކުރު މުހިންމެއްނޫން، ހުރިހާ ރައްޔިތުން ހަމަހަމަ،" ރައީސް ވިދާޅުވިއެވެ.
ދިއްދޫގައި އެއާޕޯޓު ގާއިމްކުރުމުގެ މަޝްރޫއާ ގުޅިގެން އެ ރަށުގައި ފަތާ ޓްރެކެއް ހަދައި، އޮޑިދޯނި ފަހަރުގެ މަސައްކަތަށް ބޭނުންވާ ސަރަހައްދަކާއި މޫދަށް އެރޭ ސަރަހައްދެއް ގާއިމްކޮށް ވަށާޖެހޭ ހައްލެއް ގެނެސްދެއްވާނެ ކަމާއި، ބަނދަރުގެ މަސައްކަތް ނިމޭއިރު ނެރުގެ މަސައްކަތް ފުރިހަމަވާނެ ކަމުގެ ޔަގީންކަން އެމަނިކުފާނު ދެއްވިއެވެ. މީގެ އިތުރުން އެ ރަށުގައި މި އަހަރު ފަށްޓަވާނެ ކަމަށް ރައީސް ވިދާޅުވި ބައެއް މަޝްރޫއުތަކަކީ:
- ބައިނަލްއަގުވާމީ ފެންވަރުގެ ފުޓްބޯޅަ ދަނޑެއް އެޅުން
- ހޮސްޕިޓަލްގެ އާ އިމާރާތް އެޅުމުގެ މަސައްކަތް ފެށުން
- ރަމަޟާން މަސް ފެށުމުގެ ކުރިން ވެމްކޯގެ ހިދުމަތް ފެށުން
