އައްޑޫގައި ތަރައްގީ ކޮށްފައިވާ ފުލުހުންގެ ނޭޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމެންޓުގެ މަރާމާތުގެ މަސައްކަތަށް އިންޑިއާ ސަރުކާރުން 130.9 މިލިޔަން ރުފިޔާ ނުވަތަ 8.5 މިލިޔަން ޑޮލަރުގެ އެހީއެއް ދިނުމަށް ނިންމަވާފައިވާކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
އައްޑޫސިޓީގައި ހުންނަ ނޭޝަނަލް ކޮލެޖް އޮފް ޕޮލިސިން އެން ލޯ އެންފޯސްމަންޓުގައި ރޭ ބޭއްވި ފުލުހުންގެ 37 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތުގައި ވާހަކަދައްކަމުން އިހްސާން ވަނީ އިންޑިއާއިން ދިން ހިލޭ އެހީއަށް ޝުކުރު ދަންނަވާފައެވެ. އަދި މި ހިލޭ އެހީން ދައްކުވައިދެނީ އިންޑިއާ ސަރުކާރާއި ރައްޔިތުންނާ ދެމެދު އޮތް ހާއްސަ ގުޅުން ކަމަށް އިހްސާން ވިދާޅުވިއެވެ.
މީގެ އިތުރުން މި ރަސްމިއްޔާތުގައި ބައިވެރިވުމަށް އިންޑިއާގެ ނޭޝަނަލް ޕޮލިސް އެކަޑަމީގެ ޑިރެކްޓާ އަމިތް ގާގް ބައިވެރިވެވަޑައިގަތުމުން، މިނިސްޓަރު ވަނީ ހާއްސަ ޝުކުރެއްވެސް އަދާކުރައްވާފައެވެ.
މީގެ އިތުރުން ހޯމް މިނިސްޓްރީގެ މަސައްކަތްތައް ހިނގަމުންދަނީ ނަތީޖާ ނެރެވޭ އަދި ރައްޔިތުންގެ ރައްކާތެރިކަން ކަށަވަރުކުރެވޭނެ ގޮތަށްކަމަށް މިނިސްޓަރު ވިދާޅުވިއެވެ. އަދި ފުލުހުންގެ އަސާސީ ތަމްރީނު ފުރިހަމަ ކުރި އޮފިސަރުން ހަވާލުވަނީ ބޮޑު ޒިންމާއެއްކަން ފާހަގަކުރައްވަމުން އިހްސާން ވަނީ އެ ޒިންމާ އަދާކުރުމުގައި، ނަޒާހަތްތެރިކަމާއެކު މަސައްކަތް ކުރުމަށް ގޮވާލާފައެވެ.
ފުލުހުންގެ 37ވަނަ އަސާސީ ތަމްރީނު ކޯހުން ޖުމްލަ 171 އޮފިސަރުން ވަނީ މިރޭ ދަސްވެނިވެފައެވެ.
