އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓް (އޭޕީއާރްއެފްއެޗްއީ) ގެ މެންބަރު ގައުމެއްގެ ގޮތުގައި ދިވެހިރާއްޖެއިން ބައިވެރިވުމަށް ވަޒީރުންގެ މަޖިލީހުން ނިންމަވައިފިއެވެ.
މިނިސްޓްރީ އޮފް ހެލްތުގެ ހުށައެޅުމަކާ ގުޅިގެން ޑިސެމްބަރު 1 ވަނަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގައި މިގޮތަށް ނިންމަވާއިރު އޭޕީއާރްއެފްއެޗްއީގެ މެންބަރަކަށް ވުމުން ދިވެހިރާއްޖެއަށް ކުރާނެ ފައިދާތަކުގެ މައްޗަށް ވަނީ އަލުއަޅުވާލާފައެވެ.
އޭޝިޔާ ޕެސިފިކް ރީޖަނަލް ފޯރަމްގައި މެންބަރު ގައުމުތަކާ ގުޅުން ބަދަހިވެ، ސިއްހަތާއި ތިމާވެއްޓާ ގުޅުންހުރި ސިޔާސަތުތަކާއި ގައުމީ ޕްލޭންތައް އެކުލަވާލުމާއި ތަންފީޒުކުރުމަށް ސަރަޙައްދީ އެއްބާރުލުން ލިބިގެން ދާނެއެވެ. އަދި ދިވެހިރާއްޖޭގެ ތިމާވެއްޓާއި ސިއްހަތަށް ކުރާ ނޭދެވޭ އަސަރުތައް ކުޑަކުރުމަށް ވަކާލާތު ކުރުމާއި، ސަރަހައްދީގޮތުން އެކުގައި މަސައްކަތް ކުރުމުގެ ފުރުސަތު ލިބިގެން ދާނެއެވެ.
މީގެ އިތުރުން، ސިއްހީ އަދި ތިމާވެށީގެ ދާއިރާއިން ހިދުމަތްދިނުމުގައި ޑިޖިޓަލް ހެލްތު ބޭނުންކުރުމުގެ ލުއިފަސޭހަކަން ލިބި ފަންނީ އެހީތެރިކަން ހޯދުމަށް މަގުފަހިވެގެންދާނެއެވެ. ފޯރަމްގެ ނޮލެޖު ނެޓްވާކްގެ ޒަރިއްޔާއިން ދިރާސީ މަސައްކަތްތަކަށް އެހީތެރިކަން ލިބި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތައައްޔަރުވުމާއި މޫސުމަށް އަންނަ ބަދަލުތަކުގެ ސަބަބުން އާންމު ސިއްހަތަށް ހުރި ނުރައްކާތައް ވަޒަންކޮށް މިންކުރުމާއެކު މި ދެ ދާއިރާއިން އެއް މަންސައެއްގައި، ވަށާޖެހޭގޮތަކަށް ލަނޑުދަނޑި ހާސިލުކުރުމަށް މަސައްކަތްކުރެވޭނެއެވެ. އަދި ފަންނީ ތަމްރީނުތައް ހޯދުމުގެ ފުރުސަތު ބޮޑުވެ، މި ކަމަށް ބާރުއެޅޭނެއެވެ.
އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓަކީ، ތިމާވެއްޓަށް އަންނަ ބަދަލުތަކުގެ ސަބަބުން އިންސާނުންގެ ސިއްހަތަށް ކުރިމަތިވެފައިވާ ނުރައްކާތައް ހައްލުކުރުމުގެ ގޮތުން 2004 ވަނަ އަހަރު އެކުލަވާލި ފޯރަމެކެވެ. ގައުމުތަކުން މި ފޯރަމުގައި ބައިވެރިވަނީ ވޮލަންޓަރީކޮށެވެ. މި ފޯރަމުގައި ބައިވެރިވުމުން، މި ފޯރަމްގެ ތެރެއިން އިންތިޒާމުކުރާ ތީމެޓިކް ވާކިންގް ގްރޫޕްތަކުގައި އެކި ދާއިރާތަކުން މަސައްކަތްކުރުމުގެ ފުރުސަތު ލިބޭނެއެވެ. އަދި ގައުމުން ފޯރަމްގެ ޗެއަރމަންޝިޕް އަދާކުރުމުގެ ފުރުސަތު ލިބިގެންދާނެއެވެ.
މި ފޯރަމްގެ މަގްސަދަކީ، ސަރަހައްދީ އަދި ގައުމީ ފެންވަރުގައި ސިއްހީ ދާއިރާއާއި ތިމާވެށީގެ ދާއިރާތަކުގެ މެދުގައި އެއްބާރުލުން ދިނުމުގެ މަންސައެއް މެދުވެރިކޮށްދިނުމާއި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތައައްޔަރުވުމާއި، މޫސުމަށް އަންނަ ނޭދެވޭ ބަދަލުތަކުން އާންމު ސިއްހަތަށް ހުރި ނުރައްކާތައް ކުޑަކުރުމަށް ގައުމުތަކުން އަޅަންޖެހޭ ފިޔަވަޅުތަކާއި، ސިޔާސަތުތަކާއި ކުރަންޖެހޭ މަސައްކަތްތަކާ ގުޅޭގޮތުން ވަކާލާތުކުރުމާއި، ދެމެހެއްޓެނިވި ތަރައްގީގެ ލަނޑުދަނޑިތައް، ޕެރިސް އެގްރީމަންޓް، ނެޝަނަލީ ޑިޓާމައިންޑް ކޮންޓްރިބިއުޝަން، މިނަމާޓާ ކޮންވެންޝަންސް އަދި ގްލޯބަލް ބަޔޯޑައިވާސިޓީ ފްރޭމްވާކްގެ މައިގަނޑު އަސާސްތަކާ އެއްގޮތްވާގޮތުގެ މަތިން ތިމާވެށި ހިމާޔަތްކޮށް، އާންމު ސިއްހަތު ރައްކާތެރިކުރުމަށްޓަކައި ދަތުރުފަތުރާއި، ތައުލީމާއި، ހަކަތަ އާއި، ވިޔަފާރީގެ ދާއިރާ ފަދަ އެހެނިގެން ދާއިރާތައް ކުރިއެރުވުމެވެ.
މި ފޯރަމުގައި ބައިވެރިވުމުން ދައުލަތުން އަދި އާންމު ފަރުދުން އެއްވެސް އިލްތިޒާމެއް އުފުލާކަށް ނުޖެހޭނެއެވެ.
