ޗައިނާގެ މިނިސްޓްރީ އޮފް ޕަބްލިކް ސެކިއުރިޓީން އިންތިޒާމުކޮށްގެން ހިންގާ "ސެމިނާ ފޯ އިންޓަމީޑިއެޓް އެންޑް ސީނިއާ ޕޮލިސް އޮފިސާސް" ގައި ބައިވެރިވުމަށް ދިވެހި ފުލުހުންގެ ހިދުމަތުގެ 15 އޮފިސަރުން އިއްޔެ ޗައިނާއަށް ފުރައިފިއެވެ.
މިއަދުން ފެށިގެން މި މަހުގެ 14 ވަނަ ދުވަހުގެ ނިޔަލަށް ކުރިއަށްދާ މި ސެމިނާ ބޭއްވުމަށް ހަމަޖެހިފައިވަނީ ޗައިނާގެ ހައިނަން ޕްރޮވިންސްގެ ހައިކޫގައެވެ.
މި ސެމިނާގައި ބައިވެރިވާ އޮފިސަރުންގެ ތެރޭގައި ހިމެނެނީ ސުޕްރިންޓެންޑެންޓް އޮފް ޕޮލިސް ރަހްމާ ސައީދު، ޗީފް އިންސްޕެކްޓާ އޮފް ޕޮލިސް މުހައްމަދު ދިމްހާމް އަދި ނަސްރުﷲ ޖަލީލުގެ އިތުރުން އިންސްޕެކްޓާ އޮފް ޕޮލިސް ރޭންކުގެ 12 ފުލުހުންނެވެ.
މި ސެމިނާގައި ބައިވެރިވާ އޮފިސަރުންނަށް ޗައިނާގެ ރައީސް ޝީ ޖިންޕިންގެ ގާނޫނީ ވިސްނުންފުޅުތަކާއި، ޗައިނާގެ ފުލުހުންގެ ސްޓްރެޓެޖީ، ފުލުހުންގެ ލީޑާޝިޕް، ފްރޯޑް ހުއްޓުވުން، ކޮމިއުނިޓީ ޕޮލިސިން ނިޒާމު އަދި އާންމު ރައްޔިތުންގެ ސަލާމަތާއި ރައްކާތެރިކަމާ ގުޅޭ ދާއިރާތަކުން މައުލޫމާތާއި ތަޖުރިބާ ހިއްސާކުރާނެ ކަމަށް ފުލުހުންގެ އިދާރާއިން ބުނެއެވެ.
މީގެ އިތުރުން، މައްސަލަތައް ތަހުގީގު ކުރުމާއި، ކެލިގްރަފީ އަދި ސްވޮޓް ޓެކްޓިކްސް އަދި ތާއި ޖީ (ސެލްފް ޑިފެންސް)އާ ގުޅޭ އަމަލީ ތަމްރީނުތައް ވެސް މި ސެމިނާގައި ހިމެނެއެވެ.
މި ސެމިނާގައި ބައިވެރިވުމަކީ ދިވެހި ފުލުހުންގެ ހިދުމަތުގެ އޮފިސަރުންނަށް ޗައިނާގެ ފުލުހުންގެ ތަޖުރިބާއިން އުނގެނި، އަދި ދެ ގައުމުގެ ފުލުހުންނާ ގުޅުން އިތުރަށް ބަދަހިކުރުމަށް ލިބިގެންދާ މުހިއްމު ފުރުސަތެއް ކަމަށް ފުލުހުން ބުނެއެވެ.
