އިގްތިސާދު އަނބުރާ ކޮޅަށް ޖެހުމަށްޓަކައި ރަނގަޅު އަމުޒެއް އެބައޮތް ކަމަށާއި ބަޖެޓު ޑެފިސިޓް ޑަބަލް ޑިޖިޓުން ސިންގަލް ޑިޖިޓަށް ކުޑަކޮށްދެއްވާނެ ކަމަށް ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު ވިދާޅުވީ، މިސަރުކާރުން ގައުމުގެ އިގްތިސާދާ މެދު ގެންގުޅޭ ދެކޮޅު ނުޖެހޭ ސިޔާސަޔަތުގެ ސަބަބުން ދަރަނި 114 ބިލިއަން ރުފިޔާއަށް އަރާފައިވާ ކަމަށެވެ. އަދި ސަރުކާރު ކުންފުނިތަކުގެ ދަރަނި 32 ބިލިއަން ރުފިޔާއަށް އަރާފައިވާ ކަމަށް ވެސް މުއިއްޒު ފާހަގަ ކުރެއްވިއެވެ.
މުއިއްޒު ވިދާޅުވި، 114 ބިލިއަން ރުފިޔާގެ ތެރޭގައި މި ހިންގަމުންދާ ދައުރުގައި އުފެއްދި ދަރަނީގެ އަދަދު 60 ބިލިއަން ރުފިޔާއަށް އަރާ ކަމަށާއި އެހެން ކަމުން ޖުމްލަ ދަރަނި 146 ބިލިއަން ރުފިޔާ އަރާ ކަމަށެވެ. މިއީ 10 ބިލިއަން ޑޮލަރު ކަން މުއިއްޒު ފާހަގަ ކުރެއްވިއެވެ.
މިސަރުކާރުން ނަގާފައިވާ ދަރަނިތަކުގެ ތެރޭގައި އެކިއެކި މަޝްރޫއުތަކަށް ނަގާފައިވާ ފައިސާ ހިމެނޭ ކަމަށާއި، އަދި އެއްވެސް އުސޫލެއް އަދި ހަމައެއް ނެތި ކޮރަޕްޝަނަށް މަގުފައިވާ ގޮތަށް ހިންގަމުންދާ ކަންތައްތަކާއި އަދި ބޭނުމެއް ނެތް ގޮތެއްގައި ދެމުންދާ ސިޔާސީ މަގާމުތަކަށް ފައިސާ ދެމުންދާ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ، ކުރީގެ ރައީސް އަބްދުﷲ ޔާމީންގެ ވެރިކަން ނިމުނު އިރު ބޮލަކަށް އާމްދަނީގެ ގޮތުގައި 10000 ޑޮލަރު ނިސްބަތެއް ޖެހޭ ކަމަށާއި އެއީ ވެރިކަމާ ޔާމީން ހަވާލުވެ ވެޑައިގެންނެވިއިރު ޖެހޭ ވަރަށް ވުރެ 35 ޕަސެންޓު މަތީ އަދަދެއް ކަމަށެވެ.
އެހެންނަމަވެސް މިދައުރުގައި އާމްދަނީއަށް ވުރެެ ދަރަނި އިތުރުކަން ފާހަގަކުރައްވާ މުއިއްޒު ވިދާޅުވީ، ހަރަދާއި އެއްވަރަށް އައުޓްޕުޓެއް ނުފެންނަ ކަމަށެވެ.
މިސަރުކާރުން ފައިސާ ޗާޕުކުރުމުގައި ބޮއްސުންލާފައިވާ ކަމަށާއި ޓީބިލް ވިއްކުމުގެ އިތުރަށް ބޮންޑާއި ސުކޫކް ބައިނަލްއަގުވާމީ މާކެޓުގައި ވެސް ވިއްކަމުންދާ ކަން ފާހަގަކުރައްވާ މުއިއްޒު ވިދާޅުވީ، މިކަމުގެ ސަބަުން ހުރިހާ ގެއްލުމެއް ވަނީ ރައްޔިތުންނަށް ކަމަށެވެ.
މުއިއްޒު ވިދާޅުވީ، ރައީސް ޔާމީން ވެރިކަން ނިމުނުއިރު ރިޒާވްގައި 712 މިލިއަން ޑޮލަރު ހުރި ކަމަށާއި ނަމަވެސް މިހާރު 594 މިލިއަށް ޑޮލަރަށް ތިރިވެފައިވާ ކަމަށެވެ.
މި ފަސް އަހަރު ނިމިދާއިރު ބަޖެޓު ޑެފިސިޓް 15 ޕަސެންޓުގައި ހުރިއިރު މުއިއްޒުގެ ވެރިކަމެއްގައި އިގުތިސާދީ މަސައްކަތާއެކު އެވްރެޖުކޮށް ބަޖެޓު ޑަބަލް ޑިޖިޓް ސިންގަލް ޑިޖިޓަށް ދަށްކުރައްވާނެ ކަމަށް މުއިއްޒު ވިދާޅުވިއެވެ. އަދި އެކްސްޗޭންޖު ރޭޓު ތިރިކޮށް، އެއްހަމައެއްގައި ހިފަހައްޓައި ދެއްވާ، ރިޒާވް އިތުރުކޮށް، ކުރިއަށްވުރެ މައްޗަށް ގެންދަވާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ، އޭނާ މިހުންނެވީ އިގްތިސާދު އަނބުރާ ކޮޅަށް ޖެއްސެވުމަށްޓަކައި ރަނގަޅު އަމުޒެއްގައި ކަމަށެވެ.
މުއިއްޒު ވަނީ މި ވެރިކަމުގެ ފަސް އަހަރުގެ ތެރޭގައި 8 ބިލިއަން ރުފިޔާ ޗާޕްކޮށްފައިވާ ކަންވެސް ފާހަގަ ކުރައްވާފައެވެ.
މީގެ ކުރިން ވެސް މުއިއްޒު ވަނީ މި ސަރުކާރުން ފައިސާ ޗާޕްކުރަނީ އެއްވެސް ބެލުމެއް ނެތި ކަމަށް ވިދާޅުވެފައެވެ. އެގޮތުން މީގެ ކުރީގެ 40 އަހަރު ހިނގި ހުރިހާ ވެރިކަމެއް އެއްކޮށްުމުން ވެސް އެ 40 އަހަރުގެ ތެރޭގައި ޗާޕްކުރި ޖުމްލަ އަދަދަކީ ގާތްގަނޑަކަށް 6 ބިލިއަން ރުފިޔާކަން މުއިއްޒު ފާހަގަ ކުރެއްވިއެވެ. ނަމަވެސް މި ފަސް އަހަރު އެކަނި 8 ބިލިއަން ޗާޕްކޮށްފައިވާ ކަމަށާއި އަދި ރާއްޖޭގެ އިގްތިސާދީ ހާލަތު ގޯސްވެފައިވާ ކަމަށް މުއިއްޒު ވިދާޅުވިއެވެ.
މުއިއްޒު އިތުރަށް ވިދާޅުވީ، މި ސަރުކާރުން ފައިސާ ޗާޕްކުރަނީ ފިސްކަލް ރެސްޕޮންސިބިލިޓީ ގާނޫނުގައި ބަޔާންކުރާ އެ ކަމާ ގުޅޭ މާއްދާ ސަސްޕެންޑް ކޮށްގެން ކަމަށާއި އެކަން އެ ގޮތަށް ކުރީ ރައްޔިތުންގެ މަޖިލިހުގެ ފުރިހަމަ އަޣުލަބިއްޔަތު މި ސަރުކާރުން އޮތީމައި އޭގެ ނާޖާއިޒް ބޭނުން ކޮށްގެން ކަމަށެވެ.
މުއިއްޒުގެ ވެރިކަމެއްގައި އިގްތިސާދީ ސިޔާސަތަކީ ފައިސާ ޗާޕްކުރުން ހުއްޓާލުން ކަމަށާއި އަދި ފިސްކަލް ރެސްޕޮންސިބިލިޓީ ގާނޫނުގައި ބުނާ މާއްދާ ސަސްޕެންޑް ކޮށްފައި އޮތް އޮތުން އުވާލައްވާނެ ކަމަށްވެސް ވިދާޅުވިއެވެ.
