އޭޝިޔާ ސަރަހައްދުގެ މަދަނީ ޖަމިއްޔާ ޖަމާއަތްތަކުގެ ލާބަ އާއި މަންފާ އަށް މަސައްކަތްކުރައްވާނެ ކަމަށް ކޮމަންވެލްތު މަދަނީ ޖަމިއްޔާގެ އޭޝިޔާގެ ގަވަރުނަރަކަށް އައްޔަން ކުރި ސަފާތު އަހުމަދު ޒާހިރު ވިދާޅުވެއްޖެއެވެ.
ކޮމަންވެލްތު މަދަނީ ޖަމިއްޔާގެ އޭޝިޔާގެ ގަވަރުނަރަކަށް ވިމެން އެންޑް ޑިމޮކްރަސީ ޖަމިއްޔާގެ ބާނީ އަދި ފޮރިން މިނިސްޓްރީގެ ކޮމިއުނިކޭޝަން ހެޑް ސަފާތު އަހުމަދު ޒާހިރު އައްޔަން ކޮށްފައިވަނީ އޭޝިޔާއިން ކުރިމަތިލި 600 އެއްހާ މީހުންގެ ތެރެއިންނެވެ.
މިއަހަރުގެ ފެބްރުއަރީ މަހު ހުޅުވާލި ފުރުސަތުގެ ދަށުން ކޮމެންވެލްތުގެ ފަސް ސަރަހައްދު ކަމުގައިވާ އެފްރިކާ, އޭޝިޔާ, ކެރޭބިޔަން އެންޑް އެމެރިކާސް, ޕެސިފިކް އަދި ޔޫރަޕަށް ވަނީ ގަވަރުނަރުން އައްޔަންކޮށްފައެވެ.
މި ގޮތުން އޭޝިޔާ ސަރަހައްދުން އައްޔަންކޮށްފައިވާ، ސަފާތު ކުރެއްވި ޓުވިޓެއްގައި ވިދާޅުވީ މި ސަރަހައްދުން ހޮވާލެވުނު 5 މެންބަރުންގެ ތެރޭގައި ހިމެނުމަކީ ލިބުނު ޝަރަފެއް ކަަމަށެވެ. އަދި ކުރިއަށް އޮތް ދެ އަހަރު އޭޝިޔާ ސަރަހައްދުގެ ކުރިއެރުމަށް މަސައްކަތްކުރުމާ އެކު ޖަމިއްޔާ ޖަމާއަތްތަކުގެ ކަންބޮޑުވުންތަކަށް ވަކާލާތު ކުރާނެކަމަށް ސަފާތު ވިދާޅުވިއެވެ. އިތުރަށް ސަފާތު ވިދާޅުވީ އެންމެން ގުޅިގެން މިންތީގެ ހަމަހަމަކަމާ ޑިމޮކްރަސީ އަދި އިންސާނީ ހައްގުތައް ހިފެހެއްޓުން ފަދަ ކަންކަން ހާސިލްކުރަން މަސައްކަތްކުރުމަކީ ވަރަށް ބޮޑު އުއްމީދެއް ކަމަށެވެ.
މަޝްހޫރު ފޯބްސް މެގަޒިން އިން ހޮވާ އޭޝިއާގެ އެންމެ ނުފޫޒުގަދަ 30 ޒުވާނުންގެ ތެރޭގައިވެސް ސަފާތު އަކީ މިހާރުވެސް އަންހެނުންގެ މަދަނީ އެކިއެކި ހައްގުތައް ރައްކާތެރިކުރުމަށާއި ސިޔާސީ ދާއިރާގައި އެމީހުންގެ ހަރަކާތްތެރިކަން އިތުރުކުރުމަށްޓަކައި ގިނަ މަސައްކަތްތަކެއް ކުރަމުން އަންނަ ކަނބަލެކެވެ.
ސަފާތު އަށްވަނީ ކޮމަންވެލްތު ގައުމުތަކުން ފާހަގަކޮށްލެވޭ ޒުވާނުންނަށް އިނގިރޭސި ރާނީ އެލިޒަބަތުގެ ފަރާތުން ދެމުން ގެންދާ “ކުއީންސް ޔަންގް ލީޑާސް އެވޯޑު”, ރާނީގެ އަތްޕުޅުން 2016 ވަނަ އަހަރު އަރުވާފައެވެ.
